રાજકોટના ધોરાજીમાં ટેકાના ભાવે મગફળીની ખરીદી માટેના કેન્દ્રમાં વિકરાળ આગ લાગવાની ઘટના સામે આવી છે. ધોરાજીના જેતપુર રોડ પર આવેલા અતુલ સોલવન્ટના ગ્રાઉન્ડમાં આ ખરીદ કેન્દ્ર કાર્યરત હતું, જ્યાં મગફળીના સંગ્રહ માટે રાખવામાં આવેલા બારદાનના વિશાળ જથ્થામાં ભીષણ આગ ફાટી નીકળી હતી. આગની જ્વાળાઓ એટલી વિકરાળ હતી કે દૂર દૂર સુધી તેની અસર જોવા મળી હતી. 

આ દુર્ઘટનામાં લાખો રૂપિયાના કિંમતી બારદાન સળગીને સંપૂર્ણ ખાખ થઈ ગયા છે, જે ખેડૂતો પાસેથી ખરીદેલી મગફળીને ભરવા માટે ઉપયોગમાં લેવાના હતા. આ આગના પગલે સમગ્ર વિસ્તારમાં તણાવનો માહોલ સર્જાયો હતો.

આગની ઘટનામાં કોઈ જાનહાનિ થઈ નથી

ઘટનાની જાણ થતાં જ ધોરાજી નગરપાલિકાની ફાયર બ્રિગેડની ટીમ તાત્કાલિક ઘટનાસ્થળે દોડી ગઈ હતી. ફાયર ટીમના જવાનોએ તાત્કાલિક ધોરણે આગને કાબૂમાં લેવાના પ્રયાસો શરૂ કર્યા હતા, પરંતુ બારદાનનો જથ્થો વધુ હોવાને કારણે આગ પર કાબૂ મેળવવામાં મુશ્કેલી પડી રહી હતી. લાંબા સમયની જહેમત બાદ આગને આગળ વધતી અટકાવી શકાય હતી. પરંતુ બારદાનનો મોટો ભાગ ત્યારે સુધીમાં નાશ પામ્યો હતો. આ ઘટનાને કારણે ખરીદ કેન્દ્રના સંચાલકોમાં દોડધામ મચી ગઈ હતી. આગની ઘટનામાં કોઈ જાનહાનિ થઈ નથી, પરંતુ મિલકતને ભારે નુકસાન થયું છે.

આગ લાગવાનું કારણ અકબંધ

મગફળી ખરીદ કેન્દ્રના બારદાનના જથ્થામાં આ ભીષણ આગ કયા કારણોસર લાગી તે અંગેની સચોટ માહિતી હજુ સુધી મળી શકી નથી. શોર્ટ સર્કિટ કે અન્ય કોઈ માનવીય ભૂલને કારણે આગ લાગી છે કે કેમ તે અંગે તપાસ કરવામાં આવી રહી છે. જોકે, આ ઘટનામાં થયેલા લાખો રૂપિયાના નુકસાનને જોતા આ બાબતની ગંભીરતા વધી જાય છે. સરકારી ખરીદ કેન્દ્રમાં આવી ઘટના બનવી એ સુરક્ષા વ્યવસ્થા સામે મોટો સવાલ પેદા કરે છે. ખેડૂતોના હિતમાં ટેકાના ભાવે ખરીદેલી મગફળીને નુકસાન ન થાય તે માટે વહેલી તકે યોગ્ય પગલાં લેવા અને આગ લાગવાના કારણની ઝીણવટભરી તપાસ કરવી અનિવાર્ય છે.