જામનગરમાં પણ એસઆઇઆરની કામગીરી માટે કેટલું દબાણ કરવામાં આવે છે તેનો ચોંકાવનારો કીસ્સો પ્રકાશમાં આવ્યો છે. મતદાર યાદી સઘન સુધારણા કાર્યક્રમ અંતર્ગત સોશીયલ મીડીયા(વોટસએપમાં) ૭૯-જામનગર બીએલઓનું ગ્રુપ બનાવામાં આવ્યું છે. જેમાં ૨૯૭ બીએલઓનો સમાવેશ થાય છે. આ ગ્રુપમાં શુક્રવારે રાત્રીના ૧૨.૩૩ કલાકે એટલે કે મધરાત્રીના હાલમાં બીએલઓ એપ ખૂબજ ઝડપથી ચાલે છે, તો મહેરબાની કરીને મહતમ લાભ લેવાનો મેસેજ મૂકવામાં આવ્યો છે.


મધરાત્રીના આ મેસેજ ગ્રુપમાં મૂકાતા બીએલઓ રાત ઉજાગરા કરીને કામગીરી કરતા હોવાનું તો આ કામગીરી માટે તંત્ર દ્રારા સતત દબાણ કરવામાં આવી રહ્યાનો બોલતો પુરાવો છે. એસઆઇઆરની કામગીરી નિયત સમય મર્યાદામાં પૂર્ણ કરવાની લ્હાયમાં અસહ્ય દબાણથી રાજયમાં બીએલઓના અપમૃત્યુ અને આપઘાતના કરૂણ બનાવ બાદ પણ માનવતા નેવે મૂકાઇ ગઇ હોય તેમ આ કામગીરી કરવા સતત દબાણ ચાલુ રાખવામાં આવતા બીએલઓની અત્યંત દયનીય સ્થિતિમાં મૂકાતા ત્રાહીમામ પોકારી ગયા છે. 


બગડતી માનસીક સ્થિતિ, પરિવારને સમય આપી શકતા નથી, જાયે તો જાયે કહાં

જામનગરમાં એસઆઇઆરની કામગીરી નિયત સમયમર્યાદામાં પૂર્ણ કરવા સતત દબાણ તંત્ર દ્રારા કરવામાં આવતા ખૂબજ તણાવને કારણે માનસીક સ્થિતિ બગડી રહ્યાની ફરિયાદો બીએલઓમાં ઉઠી છે. આટલું જ નહીં મૂળ ફરજ ઉપરાંત આ કામગીરી કરવાની હોવાથી પરિવારને પણ સમય આપી શકતા નથી. જેના કારણે સામજીક પ્રશ્ર્નો ઉભા થતાં મુશ્કેલી બેવડાઇ હોવાનું બીએલઓએ જણાવ્યું છે.આમ છતાં દિવસમાં વારંવાર આટલી કામગીરી આજે પૂર્ણ કરવાની છે તે સહીતની સૂચના અને દબાણથી જાયે તો જાયે કહાં અને કરવું તો શું કરવું તેવી દયનીય સ્થિતિમાં મૂકાયા હોવાની રાવ બીએલઓમાં ઉઠી છે.


જામનગરના અમુક વિસ્તારોમાં એક ફોર્મ મળ્યાની મતદારોમાં ફરિયાદો

રાજયની સાથે જામનગરમાં પણ એસઆઇઆરની કામગીરી ચાલી રહી છે. જે અંતર્ગત બીએલઓ દ્રારા શરૂઆતમાં મતદોને ફોર્મ વિતરણ કરવામાં આવ્યું હતું. જેમાં બે ફોર્મ મતદારોને આપવાના હતાં. પરંતુ શહેરના અમુક વિસ્તારોમાં બીએલઓ દ્રારા એક જ ફોર્મ આપવામાં આવ્યાની ફરિયાદો મતદારોમાં ઉઠી છે. બીજી બાજુ એક ફોર્મ આપતા મતદારો દ્રારા બીજા ફોર્મની માંગણી કરાતા મોબાઇલમાં ફોટો પાડી પ્રીન્ટ કાઢી લેવા બીએલઓ દ્રારા જણાવામાં આવતું હોવાની ફરિયાદો મતદારોમાં ઉઠી છે. ​​​​​​​