રંગીલા ગણાતા રાજકોટમાં રવિવારે જૂના મોરબી રોડ વિસ્તારમાં સરાજાહેર ગુંડાગીરીનો કિસ્સો પ્રકાશમાં આવ્યો છે. માત્ર બાઈક ધીમું ચલાવવાની સલાહ આપવી એક મહિલા અને નિર્દોષ પોલીસ પરિવારને ભારે પડી હતી. 15થી વધુ શખ્સોના ટોળાએ પોલીસકર્મીના ઘરને નિશાન બનાવી જોરદાર પથ્થરમારો કર્યો હતો, જેના કારણે સમગ્ર વિસ્તારમાં સનસનાટી મચી ગઈ છે.

શું હતી સમગ્ર ઘટના?

ઘટનાની વિગત મુજબ, જૂના મોરબી રોડ પર આવેલી એક શેરીમાં કેટલાક શખ્સો પુરપાટ ઝડપે બાઈક ચલાવી રહ્યા હતા. આ સમયે ત્યાં હાજર એક મહિલાએ તેમને અકસ્માતનો ભય હોવાથી બાઈક ધીમું ચલાવવાનું કહ્યું હતું. આ સામાન્ય સલાહથી શખ્સો ઉશ્કેરાઈ ગયા હતા અને મહિલા સાથે ગાળાગાળી કરવા લાગ્યા હતા. મામલો બિચકતા મહિલા પોતાનો જીવ બચાવવા માટે નજીકમાં આવેલા પોલીસમેન પરેશભાઈ સોઢીયાના ઘરમાં દોડી ગઈ હતી. પીછો કરી રહેલા 15થી વધુ લોકોના ટોળાને એવું લાગ્યું કે આ ઘર તે મહિલાનું જ છે. ઉશ્કેરાયેલા ટોળાએ કાંઈ પણ વિચાર્યા વગર ઘર પર પથ્થરમારો શરૂ કરી દીધો હતો.

નિર્દોષ પોલીસ પરિવાર નિશાન બન્યો

આ ઘટનામાં સૌથી આઘાતજનક બાબત એ છે કે જે પોલીસકર્મીના ઘર પર હુમલો થયો, તેમનો આ વિવાદમાં કોઈ જ વાંક નહોતો. પથ્થરમારાને કારણે ઘરની બારીઓના કાચ ફૂટી ગયા હતા અને પરિવારના સભ્યો ભયના ઓથાર હેઠળ આવી ગયા હતા. હુમલાખોરોએ ઘર પાસે પાર્ક કરેલા વાહનોને પણ નુકસાન પહોંચાડ્યું હોવાની વિગતો મળી છે.

પોલીસની કાર્યવાહી

ઘટનાની જાણ થતા જ પોલીસનો મોટો કાફલો ઘટના સ્થળે દોડી ગયો હતો. પોલીસની હાજરી જોઈને પથ્થરમારો કરતું ટોળું વિખેરાઈ ગયું હતું.​​​​​​​

તપાસ: પોલીસે સીસીટીવી ફૂટેજ અને સ્થાનિકોની પૂછપરછના આધારે તપાસ તેજ કરી છે.

​​​​​​​અટકાયત: સૂત્રોના જણાવ્યા મુજબ, પોલીસે આ મામલે રાયોટિંગનો ગુનો નોંધીને કેટલાક શખ્સોની અટકાયત પણ કરી છે.

રાજકોટમાં જાહેરમાં મહિલાઓ સાથે ગેરવર્તણૂક અને પોલીસના ઘર સુધી પહોંચી જતી આ હિંમત સ્થાનિક રહીશોમાં ચિંતાનો વિષય બની છે. હાલ આ વિસ્તારમાં શાંતિ જળવાય તે માટે ચુસ્ત પોલીસ બંદોબસ્ત ગોઠવી દેવામાં આવ્યો છે.