મહારાષ્ટ્રના ગોંદિયા જિલ્લામાં ગઈકાલે એક દુ:ખદ ઘટનાએ સમગ્ર વિસ્તારને હચમચાવી દીધો હતો. પોલીસે 22 વર્ષીય મહિલાની તેના નવજાત બાળકની હત્યા કરવાના આરોપમાં ધરપકડ કરી હતી. પોલીસના જણાવ્યા અનુસાર, મહિલાએ તેના 20 દિવસના બાળકને વૈનગંગા નદીમાં ફેંકી દીધું હતું. આ ઘટના 17 નવેમ્બરના રોજ બની હતી, પરંતુ તપાસ દરમિયાન એવો ખુલાસો થયો છે કે માતા સ્વતંત્ર જિંદગી જીવવા માટે પોતાના બાળકને નદીમાં ફેંકી હત્યા કરી હતી. 

એક પોલીસ અધિકારીએ જણાવ્યું કે મહિલાએ શરૂઆતમાં ખોટી વાર્તા બનાવીને પોલીસને ગેરમાર્ગે દોરવાનો પ્રયાસ કર્યો હતો. તેણીએ દાવો કર્યો હતો કે 17 નવેમ્બરના રોજ એક અજાણ્યા વ્યક્તિએ તેનું બાળક ચોરી લીધું હતું. આ નિવેદનના આધારે ગુમ થયેલા બાળકની શોધ શરૂ કરવામાં આવી હતી, પરંતુ તપાસ દરમિયાન, પોલીસને તેની વાત પર શંકા ગઈ. જ્યારે પોલીસે તેની કડક પૂછપરછ કરી ત્યારે તેણે પોતાની ભૂલ સ્વીકારી.

પ્રાથમિક તપાસમાં જાણવા મળ્યું કે મહિલા કથિત રીતે કામ કરવા અને સ્વતંત્ર રીતે પોતાનું જીવન જીવવા માંગતી હતી, જ્યારે તેણીએ ઘરે રહીને બાળકની સંભાળ રાખવી જરૂરી હતી. પોલીસના જણાવ્યા અનુસાર, તેણીને લાગવા લાગ્યું કે બાળક તેને ઘરમાં જ બંધ રાખશે. આ માનસિક દબાણ અને સંજોગોએ તેણીને આ અમાનવીય પગલું ભરવા માટે પ્રેરિત કરી.

પોલીસના જણાવ્યા અનુસાર, આરોપી મહિલાએ બાળકને વૈનગંગા નદીમાં ફેંકી દેવાની કબૂલાત કરી હતી. શોધખોળ બાદ, સ્થાનિક મરજીવો દ્વારા બાળકનો મૃતદેહ નદીમાંથી મળી આવ્યો હતો. પોલીસે મહિલા વિરુદ્ધ હત્યાનો ગુનો નોંધી વધુ તપાસ હાથ ધરી છે. અધિકારીઓ આ ઘટના પાછળ અન્ય કોઈ હેતુ કે દબાણ હતું કે કેમ તેની પણ તપાસ કરી રહ્યા છે. આ ઘટનાથી સ્થાનિક સમુદાયમાં ભારે આઘાત લાગ્યો છે, લોકો અવિશ્વાસ વ્યક્ત કરી રહ્યા છે કે માતા આટલું કડક પગલું કેવી રીતે ભરી શકે.