દેશભરમાં તહેવારોની તારીખોને લઈને દર વર્ષે ઉદ્ભવતી ગૂંચવણને દૂર કરવા માટે અખિલ ભારતીય ધર્મ સંઘ દ્વારા એક મહત્વપૂર્ણ અને સંયુક્ત પહેલ હાથ ધરવામાં આવી છે. મધ્યપ્રદેશના વિદિશા જિલ્લામાં આવેલા વૈકુંઠધામ શ્રી લક્ષ્મી નારાયણ મંદિરમાં યોજાયેલા વાર્ષિક સંમેલનમાં દેશભરના જાણીતા જ્યોતિષીઓ, ધર્માચાર્યો અને વૈદિક વિદ્વાનો એકત્ર થયા હતા. સંમેલન દરમિયાન પંચાંગ પદ્ધતિ, પરંપરાગત ગણતરીઓ, જ્યોતિષ શાસ્ત્ર અને ખગોળીય પરિસ્થિતિઓના વિગતવાર અભ્યાસના આધારે આવનારા વર્ષના મુખ્ય હિન્દુ તહેવારોની તારીખો જાહેર કરવામાં આવી.

અખિલ ભારતીય ધર્મ સંઘના પ્રતિનિધિઓએ જણાવ્યું કે તહેવારોની તારીખોને લઈને અલગ અલગ પંચાંગ અને પ્રાદેશિક પરંપરાઓને કારણે સામાન્ય લોકોમાં ગેરસમજ અને મતભેદ સર્જાતા હોય છે. અનેક વખત એક જ તહેવાર અલગ અલગ દિવસોએ ઉજવાતા હોવાને કારણે ધાર્મિક અનુયાયીઓ મૂંઝવણમાં મુકાય છે. આ પરિસ્થિતિને ધ્યાનમાં રાખીને સર્વસંમતિથી એકરૂપ પંચાંગ આધારીત તારીખો જાહેર કરવાનો નિર્ણય લેવાયો છે.

સંમેલનમાં હાજર વિદ્વાનોએ જણાવ્યું કે તહેવારોની નિર્ધારિત તારીખો નક્કી કરતી વખતે તિથિ, નક્ષત્ર, યોગ, કરણ, સૂર્યોદય-સૂર્યાસ્ત સમય, ચંદ્રની સ્થિતિ અને ગ્રહોની ગતિ સહિતના તમામ પરિબળોને ધ્યાનમાં લેવામાં આવ્યા છે. આધુનિક ખગોળીય સોફ્ટવેર અને પરંપરાગત ગણિતીય સૂત્રોના સંયોજનથી ચોક્કસ ગણતરીઓ કરવામાં આવી હોવાનું પણ જણાવાયું.

ધર્મ સંઘના આગેવાનોએ ઉમેર્યું કે આ પહેલનો મુખ્ય હેતુ દેશભરમાં ધાર્મિક એકતા અને સમન્વય વધારવાનો છે. જો તહેવારો એકસરખી તારીખે ઉજવાશે તો સમાજમાં એકતા અને ભક્તિભાવ વધુ મજબૂત બનશે. સાથે સાથે મંદિર વ્યવસ્થાપન, ધાર્મિક સંસ્થાઓ અને યાત્રાધામો માટે આયોજન કરવું પણ સરળ બનશે.

આ જાહેરાત બાદ અનેક ધાર્મિક સંસ્થાઓ અને સંત સમુદાયે આ પહેલનું સ્વાગત કર્યું છે. જોકે કેટલાક પ્રાદેશિક પંચાંગ સમૂહોએ સ્થાનિક પરંપરાઓને પણ સમાન મહત્વ આપવાની માંગ વ્યક્ત કરી છે. ધર્મ સંઘે જણાવ્યું છે કે તેઓ તમામ પક્ષો સાથે સંવાદ માટે તૈયાર છે અને સર્વમાન્ય પદ્ધતિ વિકસાવવાનો પ્રયત્ન ચાલુ રાખશે. આ સંમેલનને ધાર્મિક દૃષ્ટિએ મહત્વપૂર્ણ માનવામાં આવી રહ્યું છે અને આવનારા સમયમાં તહેવારોની ઉજવણીમાં વધુ એકરૂપતા આવશે તેવી અપેક્ષા વ્યક્ત કરવામાં આવી રહી છે.

તહેવારોની નિશ્ચિત કરાયેલી તારીખો

-ગુડી પડવો - નવરાત્રી

19 માર્ચ, 2026થી શરૂ થશે

- શ્રી રામ નવમી

27 માર્ચ, 2026

-શ્રી હનુમાન જયંતી

2 એપ્રિલ, 2026

-અક્ષય તૃતીયા

20 એપ્રિલ, 2026

-શ્રી જગન્નાથ રથયાત્રા

જુલાઈ 16, 2026

-શ્રી કૃષ્ણ જન્માષ્ટમી

4 સપ્ટેમ્બર, 2026

-અનંત ચતુર્દશી

25 સપ્ટેમ્બર, 2026

-વિજયા દશમી

ઑક્ટોબર 20, 2026

-દિવાળી

8 નવેમ્બર, 2026

-શ્રી હરિપ્રબોધિની એકાદશી

20 નવેમ્બર, 2026

-મકરસંક્રાંતિ

જાન્યુઆરી 15, 2027

-મહાશિવરાત્રી

6 માર્ચ, 2027

-હોલિકા દહન

21 માર્ચ, 2027