છેલ્લા કેટલાક મહિનાઓથી શેરબજારમાં મોટી ઉથલ પાથલ થવાથી રોકાણકારોનું કરોડો રૂપિયાનું ધોવાણ થયું છે. ખાસ કરીને નાના રોકાણકારોને રાતા પાણીએ રોવાનો વારો આવ્યો છે. શેરબજારની આ ઉથલ પાથલમાં યુનિવર્સીટી રોડ પર આવેલી બી.ટી.સવાણી કિડની હોસ્પિટલમાં ઓટી આસીસ્ટન્ટ તરીકે નોકરી કરતો યુવક પૈસા હારી જતા એસિડ પી આપઘાતનો પ્રયાસ કરતા સારવાર માટે સિવિલ હોસ્પિટલમાં ખસેડવામાં આવ્યો છે.

પ્રાપ્ત વિગત મુજબ મૂળ પોરબંદરનો વતની અને હાલ યુનિવર્સીટી રોડ પર ગંગોત્રી રોડ પર શિલ્પન નોવામાં રહેતો અનિલ બાબુભાઇ સાદીયા (ઉ.વ.25)ના યુવકે સાંજે પાંચેક વાગ્યે ઘરે હતો ત્યારે એસિડ પી લેતા સારવાર માટે સિવિલ હોસ્પિટલમાં ખસેડવામાં આવ્યો હતો. બનાવ અંગે હોસ્પિટલ ચોકીના સ્ટાફે યુનિવર્સીટી પોલીસને જાણ કરી હતી. યુવક બે અઢી વર્ષથી રાજકોટમાં રહી બી.ટી.સવાણી કિડની હોસ્પિટલમાં ઓટી આસીસ્ટન્ટ તરીકે નોકરી કરે છે. શેર બજારમાં પૈસા હારી જતા નુકશાન થવાથી ચિંતામાં આવી પગલું ભરી લીધાની પ્રાથમિક વિગતો સામે આવી છે. વધુ તપાસ યુનિવર્સીટી પોલીસે હાથ ધરી છે.

લક્ષ્મીના ઢોળે રહેતી પરિણીતાએ ફિનાઈલ પીધું

કાલાવડ રોડ પર લક્ષ્મીના ઢોળે રહેતા મધુબેન હાર્દિકભાઈ સોંદરવા (ઉ.વ.20)ની પરિણીતાએ રાત્રીના દોઢેક વાગ્યે ફિનાઈલ પી લેતા સારવાર માટે સિવિલમાં ખસેડવામાં આવી હતી. બનાવ અંગે હોસ્પિટલ ચોકીના સ્ટાફે યુનિવર્સીટી પોલીસને જાણ કરતા પોલીસે કારણ જાણવા તપાસ હાથ ધરી છે.