ફેબ્રુઆરીમાં રાષ્ટ્રીય રાજધાની દિલ્હીમાં રોકાવું સામાન્ય લોકોની પહોંચની બહાર છે. ફાઇવ સ્ટાર હોટલોમાં રૂમના ભાવ અચાનક રેકોર્ડ સ્તરે પહોંચી ગયા છે. એક રાત્રિનો ખર્ચ રૂ.2.32 લાખથી વધુ થઈ ગયો છે. આ કોઈ તહેવાર કે લગ્નની મોસમને કારણે નથી, પરંતુ રાજધાનીમાં યોજાઈ રહેલા એક મોટા આંતરરાષ્ટ્રીય કાર્યક્રમને કારણે છે, જેણે હોટેલ ઉદ્યોગમાં ભારે હલચલ મચાવી દીધી છે.

ઇન્ડિયા એઆઈ ઇમ્પેક્ટ સમિટ 2026 જે 16થી 20 ફેબ્રુઆરી દરમિયાન નવી દિલ્હીના ભારત મંડપમ ખાતે યોજાવાની છે. આ આર્ટિફિશિયલ ઇન્ટેલિજન્સ કોન્ફરન્સમાં દેશ અને દુનિયાભરમાંથી હજારો પ્રતિનિધિઓ હાજરી આપશે. અહેવાલો અનુસાર, અત્યાર સુધીમાં 35,000થી વધુ રજિસ્ટ્રેશન થઈ ચૂક્યા છે, જેના કારણે રાજધાનીમાં હોટલની માંગમાં વધારો થયો છે.

એક અહેવાલ મુજબ, ૧૬ ફેબ્રુઆરી સુધીમાં દિલ્હીની પ્રતિષ્ઠિત ઇમ્પિરિયલ હોટેલમાં એક રૂમનું મૂળ ભાડું આશરે રૂ.૧.૯૭ લાખ છે. ટેક્સ ઉમેર્યા પછી આ રકમ રૂ.૨૩૨,૫૧૮ થાય છે.  હયાત રીજન્સી હોટલ એક રાત આશરે રૂ.૫૦,૦૦૦ ચાર્જ કરી રહી છે. લીલા પેલેસ એક રાત આશરે રૂ.૭૮,૦૦૦માં રૂમ ઓફર કરી રહી છે, જેમાં ટેક્સનો પણ સમાવેશ થાય છે.

ડેટા એ પણ દર્શાવે છે કે શાંગરી-લા ઇરોસ હોટેલ 18 ફેબ્રુઆરી માટે સંપૂર્ણપણે બુક થઈ ગઈ છે. જોકે, 16 ફેબ્રુઆરીના રોજ એક રાત્રિનો ભાવ, કર સહિત, આશરે રૂ.89,000 હોવાનો અંદાજ છે. હોટેલ ઉદ્યોગના આંતરિક સૂત્રો કહે છે કે કોન્ફરન્સને કારણે, ઘણી તારીખો પહેલાથી જ સંપૂર્ણપણે ભરાઈ ગઈ છે.

ધ લલિત સૂરી હોસ્પિટાલિટી ગ્રુપના હોટેલ મેનેજર વિનીત કપૂરના જણાવ્યા અનુસાર 19 અને 20 ફેબ્રુઆરીના રોજ એઆઇ સમિટ અને અન્ય શહેર-સ્તરીય કાર્યક્રમો લગભગ વેચાઈ જવાની ધારણા છે. તેમણે સમજાવ્યું કે સ્યુટ્સ સહિત તમામ રૂમ કેટેગરીની માંગ મજબૂત છે, અને ઘણા આંતરરાષ્ટ્રીય પ્રતિનિધિઓ અને નેતાઓ ત્યાં રોકાશે.

ઇન્ડિયા એઆઈ ઇમ્પેક્ટ સમિટ 2026માં 100થી વધુ દેશોના પ્રતિનિધિઓ ભાગ લેશે. આમાં 15-20 રાષ્ટ્રના વડાઓ 50થી વધુ મંત્રીઓ અને 40થી વધુ મોટી વૈશ્વિક અને ભારતીય કંપનીઓના પ્રતિનિધિઓ શામેલ હશે. હોટેલ મેનેજમેન્ટના મતે, સામાન્ય સમયની તુલનામાં રૂમના દરમાં 30થી 50 ટકાનો વધારો જોવા મળ્યો છે.