યુપીના સિકંદરાબાદમાં આવેલા એક મકાનમાં સિલિન્ડર બ્લાસ્ટ થતા ઓછામાં ઓછા 6 લોકોના મોત નીપજ્યા હતા. આ મકાનમાં 18 થી 19 લોકો રહેતા હોવાનું કહેવાય છે. જો કે 8 વ્યક્તિને બચાવી લેવામાં આવી છે. ઘટનાની જાણ થતા જ ફાયર બ્રિગેડ, પોલીસ, મ્યુનિસિપલ કોર્પોરેશન, મેડિકલ ટીમ અને એનડીઆરએફની ટીમ ઘટનાસ્થળે દોડી ગઈ હતી અને બચાવ કાર્ય હાથ ધર્યું હતું તેમજ ઘાયલોને સારવાર માટે તેમજ મૃતકોને પીએમ માટે ખસેડાયા હતા. વિસ્ફોટનું કારણ જાણવા તજવીજ હાથ ધરવામાં આવી છે.અધિકારીઓએ જણાવ્યું કે, સિકંદરાબાદની આશાપુરી કોલોનીમાં એક ઘરમાં થયેલા સિલિન્ડર બ્લાસ્ટમાં ઓછામાં ઓછા છ લોકોના મોત થયા હતા.
બુલંદશહેરના સિટી મેજિસ્ટ્રેટ ચંદ્ર પ્રકાશ પયર્દિર્શીએ જણાવ્યું હતું કે,પોસ્ટમોર્ટમ માટે અહીં જિલ્લા હોસ્પિટલમાં કુલ છ મૃતદેહો લાવવામાં આવ્યા છે, જેમાં ત્રણ પુરૂષના મૃતદેહો અને ત્રણ મહિલાના મૃતદેહો છે.આશાપુરી કોલોનીના એક ઘરમાં રાત્રે 8:30-9 વાગ્યાની વચ્ચે સિલિન્ડર બ્લાસ્ટ થયો હતો. ઘરમાં 18-19 લોકો હતા, અહીંથી આઠ લોકોને બચાવી લેવામાં આવ્યા હતા જેમની હાલત અત્યંત નાજુક હતી. ત્રણ લોકો હજુ પણ ઘાયલ છે, જેમાંથી એકની હાલત ગંભીર છે પરંતુ તેની સારવાર ચાલી રહી છે. તેમને ઉમેર્યું હતું કે ફાયર બ્રિગેડની ટીમ, પોલીસ વિભાગની ટીમ, મ્યુનિસિપલ કોર્પોરેશનની ટીમ, મેડિકલની ટીમ ઘટનાસ્થળે છે.જિલ્લા મેજિસ્ટ્રેટે જણાવ્યું હતું કે વિસ્ફોટના કારણોની તપાસ કરવામાં આવશે.