ગુજરાતમાં છેલ્લા થોડા દિવસોથી પેટ્રોલ અને ડીઝલની અછતને લઈને ચાલી રહેલી વિવિધ ચર્ચાઓ અને અફવાઓ વચ્ચે એક અત્યંત મહત્વના અને રાહત આપનારા સમાચાર સામે આવ્યા છે. સોશિયલ મીડિયા પર વહેતી થયેલી ખોટી અફવાઓ અને તેના કારણે લોકોમાં ફેલાયેલા ડરને લીધે 'પેનિક બાઈંગ' (ગભરાટમાં આવીને જરૂરિયાત કરતાં વધુ ખરીદી કરવી) શરૂ થઈ ગયું હતું. આના કારણે રાજ્યના કેટલાક પેટ્રોલ પંપો પર ટૂંકા સમય માટે સ્ટોક ખાલી થવાની સ્થિતિ સર્જાઈ રહી છે. જોકે, આ પરિસ્થિતિ વચ્ચે રાજ્ય સરકાર અને દેશની અગ્રણી ઓઈલ કંપનીઓએ સત્તાવાર રીતે સ્પષ્ટ કર્યું છે કે ગુજરાતમાં ઈંધણની કોઈ જ કમી નથી, માત્ર લોકો દ્વારા અચાનક કરવામાં આવી રહેલી વધુ પડતી ખરીદીના કારણે જ આ પ્રકારની ક્ષણિક સ્થિતિ ઊભી થઈ છે. પરંતુ, અફવાઓના કારણે વેચાણમાં અચાનક ૮૦ ટકાથી વધુનો માસિક વધારો થઈ ગયો છે.

રાજ્યના કેટલાક મુખ્ય શહેરો અને ગ્રામીણ વિસ્તારોમાં પેટ્રોલ પંપો પર વાહનોની લાંબી લાઈનો અને કેટલાક સ્થળોએ 'નો સ્ટોક' ના બોર્ડ જોવા મળતા સામાન્ય નાગરિકોમાં ચિંતાનો માહોલ જોવા મળ્યો હતો. આ સમગ્ર બાબતે સ્પષ્ટતા કરતાં અન્ન, નાગરિક પુરવઠા અને ગ્રાહક બાબતોના વિભાગે જણાવ્યું છે કે, આ સ્થિતિ કોઈ વાસ્તવિક કે માળખાકીય અછતને કારણે સર્જાઈ નથી. જેવો પેટ્રોલ પંપ પર નવો સ્ટોક આવે છે, તે ગણતરીના કલાકોમાં જ વેચાઈ જાય છે. ઓઈલ ટર્મિનલ પરથી નવો જથ્થો લોડ થઈને પંપ સુધી ન પહોંચે ત્યાં સુધીના ટૂંકા ગાળા માટે જ પંપો 'ડ્રાય' જોવા મળી રહ્યા છે, જે ગંભીર ચિંતાનો વિષય નથી.

નાગરિકોની મૂંઝવણ દૂર કરવા માટે રાજ્ય સરકારે સત્તાવાર નિયમો જાહેર કરીને સ્પષ્ટતા કરી છે કે, સામાન્ય જનતા માટે પોતાના વાહનોમાં પેટ્રોલ કે ડીઝલ પુરાવવા પર કોઈ જ પ્રકારનો પ્રતિબંધ, કાપ કે મર્યાદા લાદવામાં આવી નથી. વાહનચાલકો પોતાની જરૂરિયાત મુજબ ગમે તેટલું ઈંધણ ભરાવી શકે છે. આ ઉપરાંત, આર્થિક અને કૃષિ પ્રવૃત્તિઓ ખોરવાય નહીં તે માટે પણ ખાસ જોગવાઈઓ ચાલુ રાખવામાં આવી છે. ખેડૂતોને ખેતીના કામો માટે બેરલમાં ૨૦૦ લીટર સુધી ડીઝલ આપવાની સરકારે મંજૂરી આપી છે. કનેક્ટિવિટી જળવાઈ રહે તે માટે મોબાઈલ ટાવર્સ માટે ૧,૦૦૦ લીટર સુધી ડીઝલનો જથ્થો મળી શકશે. અન્ય ઇન્ફ્રાસ્ટ્રક્ચર કે ઔદ્યોગિક એકમોને તેમના અગાઉના નિયમિત વપરાશના ઇતિહાસના આધારે પૂરતો ડીઝલનો જથ્થો પૂરો પાડવામાં આવશે.

ઈંધણનો પુરવઠો સતત અને અવિરત જળવાઈ રહે તે માટે ગુજરાતના પુરવઠા વિભાગ દ્વારા યુદ્ધના ધોરણે એક્શન પ્લાન શરૂ કરવામાં આવ્યો છે. વહીવટી તંત્ર દ્વારા હવે દરેક જિલ્લામાં કયા પેટ્રોલ પંપ પર સ્ટોક ઓછો છે તેનું 'રીઅલ-ટાઈમ મેપિંગ' કરવામાં આવી રહ્યું છે. ઇન્ડિયન ઓઇલ, ભારત પેટ્રોલિયમ અને હિન્દુસ્તાન પેટ્રોલિયમ જેવી જાહેર ક્ષેત્રની સરકારી ઓઈલ કંપનીઓ સાથે દરરોજ ઉચ્ચ સ્તરીય સમીક્ષા બેઠકો યોજવામાં આવી રહી છે. જે અંતર્ગત, જે પંપો પર જથ્થો ઓછો હોય ત્યાં પ્રાધાન્યના ધોરણે તાત્કાલિક ટેન્કરો રવાના કરવા સૂચના આપવામાં આવી છે.

આ સાથે જ, વીડિયો કોન્ફરન્સિંગના માધ્યમથી તમામ જિલ્લાના સપ્લાય ઓફિસરોને પોતાની સ્થાનિક ઇન્વેન્ટરી પર કડક નજર રાખવા આદેશ અપાયા છે. જો કોઈ સ્થળે ઈંધણનું ગેરકાયદે વેચાણ, કાળોબજાર કે સંગ્રહખોરી થતી માલૂમ પડશે, તો તેની સામે કાયદાકીય રીતે અત્યંત કડક પગલાં લેવાની સૂચના પણ તંત્રને આપી દેવામાં આવી છે.

સરકારે વધુમાં ઉમેર્યું છે કે, જો કોઈ ચોક્કસ વિસ્તારમાંથી પેટ્રોલ પંપ ડ્રાય હોવાની ફરિયાદ કે માહિતી મળે છે, તો કંટ્રોલ રૂમ અને ઓઈલ કંપનીઓ દ્વારા મિનિટોમાં તેની ખરાઈ કરીને ત્યાં નવો જથ્થો રવાના કરી દેવાય છે. આ વ્યવસ્થાને પગલે ગુજરાતની જનતાએ સહેજ પણ ગભરાવાની કે પેનિક થવાની કોઈ જ જરૂર નથી.

અફવાઓથી દૂર રહેવા જનતાને અપીલ

ગુજરાત સરકારે નાગરિકોને ખાતરી આપતા મક્કમતાપૂર્વક જણાવ્યું છે કે, રાજ્યમાં પેટ્રોલ અને ડીઝલનો પૂરતો જથ્થો ઉપલબ્ધ છે અને પુરવઠાની એકંદર સ્થિતિ સંપૂર્ણપણે સામાન્ય છે. સોશિયલ મીડિયા અથવા અન્ય માધ્યમો દ્વારા ફેલાવવામાં આવતી અછત અંગેની ખોટી અફવાઓ અને ભ્રામક મેસેજો પર નાગરિકોએ સહેજ પણ વિશ્વાસ ન કરવો. તંત્ર દ્વારા જનતાને માત્ર પોતાની રોજિંદી જરૂરિયાત પૂરતું જ ઈંધણ ખરીદવા માટે નમ્ર અપીલ કરવામાં આવી છે.