ગુજરાત સરકારે પર્યાવરણની જાળવણી અને પ્લાસ્ટિકના વપરાશને ઘટાડવા માટે મહત્વપૂર્ણ અને સરાહનીય નિર્ણય લીધો છે. રાજ્યની તમામ સરકારી કચેરીઓમાં હવે પ્લાસ્ટિકની ફાઇલો અને ફોલ્ડરનો ઉપયોગ તબક્કાવાર રીતે (ફેઝ વાઇઝ) સંપૂર્ણપણે બંધ કરવામાં આવશે. સરકારના આ પર્યાવરણલક્ષી નિર્ણયથી હવે સરકારી તંત્રમાં ‘ગ્રીન ફાઇલ’ સંસ્કૃતિની શરૂઆત થશે, જેમાં ફાઇલ અંદરના કાગળો અને કામગીરી યથાવત્ રહેશે પરંતુ તેના કવર બદલાઈ જશે.

નવા આદેશ મુજબ, સરકારી કચેરીઓમાં પ્લાસ્ટિકના બદલે હવે પર્યાવરણમૈત્રી એવા કાગળ, શણ (જૂટ) અને કાપડમાંથી બનાવેલા ફાઇલ કવરનો ઉપયોગ કરવાની સ્પષ્ટ સૂચના આપવામાં આવી છે. જોકે, નાણાકીય બગાડ અટકાવવા માટે હાલ જે કચેરીઓમાં પ્લાસ્ટિક ફાઇલોનો સ્ટોક ઉપલબ્ધ છે, તે પૂર્ણ થયા બાદ જ નવી પર્યાવરણમૈત્રી (ઈકો-ફ્રેન્ડલી) ફાઇલોની ખરીદી કરવામાં આવશે.

આ મહત્વપૂર્ણ નિર્ણયનો અમલ ગાંધીનગર સચિવાલયથી લઈને રાજ્યના તમામ ખાતાના વડાની કચેરીઓ સુધી કડક રીતે કરવામાં આવશે. માત્ર સરકારી વિભાગો જ નહીં, પરંતુ તમામ બોર્ડ-કોર્પોરેશન અને સરકારી કંપનીઓને પણ આ સૂચનાનો અમલ કરવાનો રહેશે. આ ઉપરાંત રાજ્યની તમામ યુનિવર્સિટીઓ, સ્થાનિક સ્વરાજ્યની સંસ્થાઓ (મહાનગરપાલિકાઓ અને નગરપાલિકાઓ) તેમજ ગ્રાન્ટ-ઇન-એઇડ સંસ્થાઓને પણ આ નિર્ણયના દાયરામાં આવરી લેવામાં આવી છે.

સરકારના આ પગલાથી માત્ર પર્યાવરણનું રક્ષણ જ નહીં થાય, પરંતુ શણ અને કાપડની ફાઇલોના ઉત્પાદનથી સ્થાનિક ગૃહઉદ્યોગો અને નાના કલાકારોને પણ પ્રોત્સાહન મળશે. સરકારી તંત્ર દ્વારા લેવાયેલો આ 'ગ્રીન ઇનિશિયેટિવ' આગામી દિવસોમાં પ્લાસ્ટિક મુક્ત ગુજરાત તરફનું એક મજબૂત કદમ સાબિત થશે.