એક મહિલા તેની પ્રસૂતિ રજા પૂરી થયા પછી ઓફિસમાં પાછી આવી ત્યારે તેણે બધાને કહ્યું કે તે ફરીથી ગર્ભવતી છે. આ મુદ્દે કંપનીએ તેને કામ પરથી કાઢી મૂકી હતી. મહિલાએ કોર્ટનો સંપર્ક કર્યો અને કંપનીને દોષી ઠેરવતા કોર્ટે 30 લાખ રૂપિયાથી વધુનો દંડ ફટકાર્યો હતો.

પીડિતા એ કહાની સંભળાવી

પીડિત મહિલાનું નામ નિકિતા ટ્વિચેન છે. નિકિતા યુકે સ્થિત ફર્સ્ટ ગ્રેડ પ્રોજેક્ટ્સમાં કામ કરતી હતી. તેના પ્રથમ બાળકની ડિલિવરી સમયે તેણે ઓફિસમાંથી પ્રસૂતિ રજા લીધી હતી. જો કે, જ્યારે નિકિતા કામ પર પાછી આવી અને ઓફિસના લોકોને ખબર પડી કે તે ફરીથી ગર્ભવતી છે, ત્યારે તેઓએ નિકિતાને નોકરીમાંથી કાઢી મૂકી હતી.

એમડીનું વર્તન બદલાઈ ગયું

નિકિતાએ કંપની વિરુદ્ધ ફરિયાદ નોંધાવી હતી. એમ્પ્લોયમેન્ટ ટ્રિબ્યુનલમાં અરજી દાખલ કરતાં નિકિતાએ કહ્યું કે તેને અયોગ્ય રીતે બરતરફ કરવામાં આવી છે. કામ પર પાછા ફરતી વખતે તેમણે તેમના મેનેજિંગ ડિરેક્ટર (MD) જેરેમી મોર્ગન સાથેની મીટિંગમાં હાજરી આપી હતી. જેરેમી નિકિતાના વાપસીને લઈને ખૂબ જ ખુશ દેખાઈ રહ્યો હતો. મીટિંગ સમાપ્ત થયા પછી જ્યારે નિકિતાએ જેરેમીને કહ્યું કે તે ફરીથી ગર્ભવતી છે, ત્યારે તેનું વર્તન બદલાવા લાગ્યું.

પ્રસૂતિ પગાર આપવામાં આવતો નથી

નિકિતાના કહેવા પ્રમાણે, તે અને જેરેમી ખૂબ સારા મિત્રો હતા, પરંતુ પ્રેગ્નન્સી વિશે સાંભળ્યા બાદ જેરેમીએ અલગ રહેવાનું શરૂ કર્યું. નિકિતાની પ્રસૂતિ રજા માર્ચ 2022માં સમાપ્ત થઈ ગઈ હતી. પરંતુ ઓફિસમાં કોઈએ તેમને કામ પર પાછા આવવા વિશે પૂછ્યું ન હતું. જ્યારે નિકિતા કામ પર પાછી આવી ત્યારે 4 એપ્રિલે તેણે તેના બોસને મેટરનિટી લીવનો પગાર માંગતો ઈમેલ કર્યો. પણ નિકિતાને કોઈ જવાબ ન મળ્યો. 11 અને 18 એપ્રિલના રોજ તેણે તેના બોસનો સંપર્ક કર્યો અને જાણ્યું કે કંપની નાણાકીય મુશ્કેલીઓનો સામનો કરી રહી છે અને તેનો પગાર ચૂકવી શકાતો નથી.

કોર્ટે આપ્યો ન્યાય

એટલું જ નહીં  જેરેમીએ નિકિતાને કહ્યું કે કંપનીએ નવા સોફ્ટવેર પર કામ કરવાનું શરૂ કરી દીધું છે અને નિકિતાને તેની જાણ નથી. તેથી હવે નિકિતા પાસે ઓફિસમાં કોઈ કામ બાકી નથી. આમ કહીને જેરેમીએ તેને નોકરીમાંથી કાઢી મૂકી હતી. નિકિતાની તરફેણમાં ચુકાદો આપતા કોર્ટે કહ્યું કે કંપની કોઈ નાણાકીય સંકટનો સામનો કરી રહી નથી અને કંપનીમાં સતત નવા લોકોની ભરતી કરવામાં આવી રહી છે. ત્યારે કંપનીને દોષિત માનતા કોર્ટે 28 હજાર પાઉન્ડ એટલે કે 30 લાખ 42 હજારનું વળતર ચૂકવવાનો આદેશ આપ્યો છે. હવે કંપની નિકિતાને આ રકમ ચૂકવશે. મહિલાને 2022માં નોકરીમાંથી કાઢી મૂકવામાં આવી હતી, પરંતુ 2 વર્ષ બાદ મહિલાને ન્યાય મળ્યો છે.