રિઝર્વ બેંક ઓફ ઈન્ડિયા (આરબીઆઈ)એ તેની નાણાકીય નીતિ બેઠકમાં એક મહત્વપૂર્ણ નિર્ણય લીધો છે, જેમાં રેપો રેટમાં 25 બેસિસ પોઈન્ટનો ઘટાડો કરવામાં આવ્યો છે. રેપો રેટ હવે 5.50 ટકાથી ઘટીને 5.25 ટકા થઈ ગયો છે. આરબીઆઈ ગવર્નર સંજય મલ્હોત્રાએ જણાવ્યું હતું કે રેપો રેટમાં ઘટાડો તાત્કાલિક અમલમાં આવશે. આરબીઆઈના આ નિર્ણયથી હોમ લોન સસ્તી થશે અને ઈએમઆઈમાં ઘટાડો થશે. બેંકો ઓછા દરે લોન પણ આપી શકશે.

સંજય મલ્હોત્રાએ જણાવ્યું હતું કે ગત મહિનો અમારા માટે પડકારજનક રહ્યો હતો, પરંતુ આવનારા મહિનાઓ જીડીપી અને ફુગાવા બંનેની દ્રષ્ટિએ સારા રહેશે. અમારો ફુગાવાનો અંદાજ બે ટકા છે. બીજા ક્વાર્ટરમાં વાસ્તવિક જીડીપી વૃદ્ધિ દર 8.2 ટકા રહ્યો. આ વર્ષના પ્રથમ છ મહિનામાં જીડીપી વૃદ્ધિ આઠ ટકા રહેવાનો અંદાજ છે.

ભારતીય રિઝર્વ બેંકે 2025માં રેપો રેટમાં ચાર વખત ઘટાડો કર્યો છે. ફેબ્રુઆરીમાં, આરબીઆઈએ રેપો રેટમાં 25 બેસિસ પોઈન્ટનો ઘટાડો કર્યો હતો. ત્યારબાદ, એપ્રિલમાં રેપો રેટમાં વધુ 25 બેસિસ પોઈન્ટનો ઘટાડો કરવામાં આવ્યો હતો અને જૂનમાં વર્ષનો સૌથી મોટો કાપ, 50 બેસિસ પોઈન્ટનો ઘટાડો કરવામાં આવ્યો હતો. હવે, વધુ 25 બેસિસ પોઈન્ટનો ઘટાડો કરવામાં આવ્યો છે. કુલ મળીને આ વર્ષે રેપો રેટમાં 125 બેસિસ પોઈન્ટ અથવા 1.25 ટકાનો ઘટાડો કરવામાં આવ્યો છે.

આ વર્ષના ઘટાડા પહેલા, રેપો રેટ બે વાર સ્થિર રહ્યો હતો. જોકે, હવે તે 6.50 ટકાથી ઘટાડીને 5.25 ટકા કરવામાં આવ્યો છે. રેપો રેટમાં ઘટાડા સાથે શેરબજારમાં પણ ઉછાળો જોવા મળ્યો છે. સેન્સેક્સ 200 પોઈન્ટથી વધુ વધીને 85,500ની ઉપર ટ્રેડ કરી રહ્યો છે, જ્યારે નિફ્ટી 75 પોઈન્ટ વધીને 26,110 પર ટ્રેડ કરી રહ્યો છે. નિફ્ટી બેંક 364 પોઈન્ટ વધ્યો છે.

રેપો રેટ ઘટવાથી રિયલ એસ્ટેટ સેક્ટરને બૂસ્ટ મળશે

રેપો રેટ ઘટ્યા પછી બેંકો પણ હાઉસિંગ અને ઑટો જેવા લોન પરના વ્યાજ દરો ઘટાડે છે. વ્યાજ દરો ઓછા થવાથી હાઉસિંગ ડિમાન્ડ વધશે. વધુ લોકો રિયલ એસ્ટેટમાં રોકાણ કરી શકશે. આનાથી રિયલ એસ્ટેટ સેક્ટરને બૂસ્ટ મળશે.