પૈસા કમાવવા જેટલું જરૂરી છે, તેટલું જ જરૂરી તેને સાચી જગ્યાએ રોકાણ કરવું છે. પરંતુ શું તમે જાણો છો કે રોકાણની કોઈ એક ફોર્મ્યુલા દરેક ઉંમરે કામ નથી લાગતી? ૨૦ વર્ષની ઉંમરે જે જોખમ તમે લઈ શકો છો, તે ૫૦ વર્ષની ઉંમરે નુકસાનકારક સાબિત થઈ શકે છે. તમારા ભવિષ્યને આર્થિક રીતે સુરક્ષિત કરવા માટે SIP, EPF અને NPS ત્રણેયનું સંતુલન હોવું અનિવાર્ય છે. ચાલો જાણીએ તમારી ઉંમર મુજબ કયા ઓપ્શન પર વધારે ભાર મૂકવો જોઈએ.

- ૨૦ થી ૩૦ વર્ષની ઉંમર: જોખમ લેવાનો અને ગ્રોથનો સમય
આ ઉંમરે તમારી પાસે સમય ઘણો વધારે છે, તેથી તમે શેરબજારના ઉતાર-ચઢાવ સહન કરી શકો છો. લાંબા ગાળા માટે ઇક્વિટી મ્યુચ્યુઅલ ફંડમાં SIP શરૂ કરો. ચક્રવૃદ્ધિ વ્યાજનો સૌથી વધુ ફાયદો આ ઉંમરે જ મળે છે.

EPF: જો તમે નોકરી કરતા હોવ તો તેને ચાલવા દો, તે તમારી સુરક્ષા જાળ છે.

NPS: અત્યારે ફરજિયાત નથી, પણ નાની રકમથી શરૂઆત કરી શકાય છે.

- ૩૦ થી ૪૦ વર્ષની ઉંમર: સ્થિરતા અને ટેક્સ બચત
આ ઉંમરે ઘર પરિવાર અને બાળકોના ભવિષ્યની જવાબદારીઓ વધે છે. SIP ચાલુ રાખો પરંતુ સાથે NPS ઉમેરો. NPS નિવૃત્તિ માટે મોટું ભંડોળ તો આપશે જ સાથે આવકવેરામાં વધારાની ટેક્સ બચત પણ કરાવશે. EPF તમારા પોર્ટફોલિયોનો સૌથી સુરક્ષિત હિસ્સો બની રહેશે.

- ૪૦ થી ૫૦ વર્ષની ઉંમર: સુરક્ષા અને સંતુલન
હવે તમારી પાસે મૂડી જમા થઈ ગઈ હશે, તેને બચાવવી જરૂરી છે. ઇક્વિટી SIP માં વધુ પડતું આક્રમક રોકાણ કરવાને બદલે Debt Fund કે NPS માં હિસ્સો વધારવો. બજારના જોખમોથી બચવા માટે રોકાણને સંતુલિત કરો જેથી નિવૃત્તિ નજીક આવતા મૂડી સુરક્ષિત રહે.

- ૫૦ વર્ષથી વધુ ઉંમર: નિયમિત આવક અને મૂડીની સુરક્ષા
નિવૃત્તિ હવે ઉંબરે છે, એટલે હવે પ્રયોગો કરવાનો સમય નથી. EPF અને NPS ને કન્ઝર્વેટિવ મોડમાં રાખો. એવા વિકલ્પો પસંદ કરો જે ગ્રોથ કરતા સ્થિરતા અને નિવૃત્તિ પછી દર મહિને નિયમિત આવક આપી શકે.

સુવર્ણ નિયમ: ઇમરજન્સી ફંડ ક્યારેય ન ભૂલો

કોઈપણ રોકાણ શરૂ કરતા પહેલા તમારા ૬ થી ૯ મહિનાના ખર્ચ જેટલી રકમ અલગ રાખો. આ ફંડ તમને મુશ્કેલીના સમયે રોકાણ તોડતા બચાવશે.