રામ મંદિરમાં દાનની ચોરી અને ઉચાપતની તપાસ કરી રહેલી સ્પેશિયલ ઇન્વેસ્ટિગેશન ટીમ (એસઆઇટી)એ તેની પ્રારંભિક તપાસમાં દાનની ગણતરી અને સંચાલનમાં નોંધપાત્ર અનિયમિતતાઓ શોધી કાઢી છે. એસઆઇટીને ગણતરી સ્ટાફ પર દેખરેખ રાખવામાં અને પ્રોટોકોલનું પાલન ન કરવામાં નોંધપાત્ર ખામીઓ મળી આવી છે. એસઆઇટીનો પ્રારંભિક તપાસ રિપોર્ટ શ્રી રામ જન્મભૂમિ તીર્થ ક્ષેત્ર ટ્રસ્ટને સુપરત કરવામાં આવ્યો છે. જોકે, રિપોર્ટ પર કોઈ ચર્ચા કરવામાં આવી નથી કારણ કે અંતિમ રિપોર્ટ 15 જુલાઈ સુધીમાં રજૂ કરવામાં આવશે. પ્રારંભિક રિપોર્ટ મુજબ, 27 એપ્રિલથી પાંચમી જૂન સુધીના સીસીટીવી ફૂટેજમાં સ્ટાફે કથિત રીતે તેમના કપડાં, ખિસ્સા, જૂતા અને ગણતરી ખંડની અંદરના અન્ય સ્થળોએ ચલણી નોટોના બંડલ અને છૂટક રોકડ છુપાવી હોવાનું દર્શાવવામાં આવ્યું છે. 

રિપોર્ટમાં આવી લગભગ 70 શંકાસ્પદ ઘટનાઓનો ઉલ્લેખ છે. એસઆઇટી જણાવે છે કે આ કથિત અનિયમિતતાઓ અલગ-અલગ ઘટનાઓ નહોતી પરંતુ ઘણા દિવસોમાં બનેલી સુનિયોજિત અને પુનરાવર્તિત પ્રક્રિયા હોવાનું જણાય છે. 27 એપ્રિલ પહેલાના ફૂટેજ મળ્યા નથી. તેથી, આવી ચોરીઓ પહેલા પણ મોટા પાયે થતી હશે.

૨૭ એપ્રિલ પહેલાના સીસીટીવી રેકોર્ડિંગ ઉપલબ્ધ નહોતા કારણ કે મર્યાદિત સ્ટોરેજને કારણે તે આપમેળે ડિલીટ થઈ ગયા હતા. એસઆઇટીએ શોધી કાઢ્યું કે ગણતરી ખંડમાં નિર્ધારિત સુરક્ષા પ્રોટોકોલનું પાલન કરવામાં આવ્યું ન હતું. પ્રવેશ અને બહાર નીકળતી વખતે કર્મચારીઓની તપાસ કરવામાં આવી ન હતી, તેમના અંગત સામાન પર્યાપ્ત રીતે નિયંત્રણ કરવામાં આવ્યું ન હતું, અનેક દાનપેટીઓમાંથી રોકડ એકસાથે ગણવામાં આવી હતી, અને મૂલ્યવાન દાનના દસ્તાવેજીકરણ અને ચકાસણીમાં ગંભીર ખામીઓ હતી.

રિપોર્ટમાં અવિનાશ શુક્લા, અનુકુલ મિશ્રા, લવ કુશ મિશ્રા, મનીષ કુમાર યાદવ, કરુણેશ પાંડે અને રામ શંકર મિશ્રાના નામ આપવામાં આવ્યા છે, જેમાં કહેવામાં આવ્યું છે કે પ્રથમ દ્રષ્ટિએ સંડોવણી સાબિત થઈ છે. આ આરોપીઓ સહિત કુલ આઠ લોકોની ધરપકડ કરવામાં આવી છે. રિપોર્ટ મુજબ, તપાસ શરૂ થાય તે પહેલાં કેટલાક કર્મચારીઓ પાસેથી આશરે રૂ.૭૮.૯૪ લાખ વસૂલ કરવામાં આવ્યા હતા. રિપોર્ટમાં ચોથી જૂને ગણતરી ખંડમાંથી આશરે રૂ.૨.૨૫ લાખની વસૂલાતનો પણ ઉલ્લેખ છે.

એસઆઇટીએ જણાવ્યું હતું કે સંબંધિત કર્મચારીઓના બેંક ખાતાઓની તપાસમાં રોકડ જમા અને નાણાકીય વ્યવહારો તેમની જાહેર કરેલી આવક કરતાં વધુ હોવાનું બહાર આવ્યું હતું, જેના કારણે વિગતવાર નાણાકીય તપાસની જરૂર પડી હતી. આ કર્મચારીઓને સામાન્ય રીતે પગાર તરીકે દર મહિને રૂ.20,000 ચૂકવવામાં આવતા હતા. કપાત પછી, તેમનો હાથમાં રહેલો પગાર ફક્ત રૂ.15,000 હતો. રિપોર્ટમાં જણાવાયું હતું કે ટ્રસ્ટ અને સ્ટેટ બેંક ઓફ ઇન્ડિયાના સંયુક્ત એસઓપીનું પાલન કરવામાં આવ્યું ન હતું. ન તો ખિસ્સા વગરના યુનિફોર્મ લાગુ કરવામાં આવ્યા હતા, ન તો બાયોમેટ્રિક હાજરી કાર્યરત હતી. વધુમાં, ગણતરી કરતા પહેલા બધા દાન પેટીઓમાંથી પૈસા ભેળવી દેવામાં આવ્યા હતા અને વ્યક્તિગત નોટો માટે બંડલ યોગ્ય રીતે ગોઠવવામાં આવ્યા ન હતા. સીસીટીવી મોનિટરિંગ પણ અપૂરતું હતું. એસઆઇટીએ જણાવ્યું હતું કે આ અનિયમિતતાઓએ સંયુક્ત રીતે દાનની ચોરી માટે અનુકૂળ વાતાવરણ બનાવ્યું હતું.