સલમાન ખાનની એક્સ ગર્લફ્રેન્ડ સોમી અલી અવારનવાર પોતાના નિવેદનોને કારણે ચર્ચામાં રહે છે. હાલ સમાચાર છે કે સોમી અલી પર હુમલો થયો છે. અભિનેત્રી અને સામાજિક કાર્યકર્તા સોમી અલી પર માનવ તસ્કરીનો ભોગ બનેલી વ્યક્તિને બચાવવાનો પ્રયાસ કરતી વખતે કથિત રીતે હુમલો કરવામાં આવ્યો હતો, જેમાં તે ઘાયલ થઈ હતી. અભિનેત્રીએ પોતે આ વાતનો ખુલાસો કર્યો છે. હાલમાં તે દર્દથી પીડાઈ રહી છે.

સલમાન ખાનની એક્સ ગર્લફ્રેન્ડ સોમી અલી પર હુમલો

સોમી અલીએ કહ્યું કે હું પીડિતોને બચાવવા માટે પોલીસ સાથે મળીને કામ કરું છું. જ્યાં સુધી તેઓ પીડિતાને ઘરની બહાર ન લઈ જાય ત્યાં સુધી મને મારી કારમાંથી બહાર નીકળવાની મંજૂરી નથી. 17 વર્ષમાં મારી સાથે આ નવમો હુમલો થયો હતો. અમે તે જ સમયે પીડિતા અને તસ્કરોની રાહ જોઈ રહ્યા હતા, પીડિતાને ખ્યાલ નહોતો કે તે એવા ઘરમાં જવાની છે જ્યાં તેને લાગે છે કે તેને સાફ સફાઈ માટે રાખવામાં આવી છે પરંતુ ત્યાં તસ્કરો પીડિતોને છુપાવે છે.

સોમી અલી પર કેવી રીતે હુમલો કરવામાં આવ્યો

આ ઘટના વિશે વાત કરતા સોમીએ જણાવ્યું કે કેવી રીતે માનવ તસ્કરીનો શિકાર બનેલી મહિલાને બચાવતા તેના પર હુમલો કરવામાં આવ્યો હતો. અભિનેત્રીએ કહ્યું જયારે પીડિતા ઘર તરફ જઈ રહી હતી તો મેં વિચાર્યું કે તેણે ઘરની અંદર ન જવું જોઈએ.  કારણ કે જો તસ્કરો પહેલેથી જ ઘરમાં ઘૂસી ગયા હોય તો શું થશે. પોલીસે મને કહ્યું હતું કે તેઓ આવી રહ્યા છે અને ઘર ખાલી હતું. હું મારી કારમાંથી બહાર આવી ત્યારે તસ્કરોએ વારાફરતી ઘર અને અમારા પર હુમલો કર્યો હતો. તેમાંથી એકે મારો ડાબો હાથ પકડ્યો અને તેને મરોડ્યો. ભગવાનનો આભાર માનું છું કે તે માત્ર હેરલાઇન ફ્રેક્ચર હતું, પરંતુ હું ખૂબ પીડામાં છું અને પથારીવશ છું.

તેણે વધુમાં જણાવ્યું કે ડોક્ટરના જણાવ્યા અનુસાર તેને સાજા થવામાં 6-8 અઠવાડિયાનો સમય લાગશે. અલીએ એ પણ જણાવ્યું કે તેના ડાબા કાંડા અને હાથ પર ખૂબ જ સોજો આવી ગયો હતો અને તે તેને હલાવી પણ નહોતી શકતી. તેણે કહ્યું કે હવે તે થોડો સમય આરામ પર છે.