પહેલગામ આતંકવાદી હુમલા બાદ ભારત અને પાકિસ્તાન વચ્ચેના સંબંધોમાં તણાવ વધી રહ્યો હોય તેવું લાગે છે. બંને દેશોએ એકબીજા વિરુદ્ધ અનેક જાહેરાતો કરી છે, જેમાંથી ભારત દ્વારા સિંધુ જળ સંધિ સમાપ્ત કરવાની જાહેરાત એક મોટો નિર્ણય છે, જેના કારણે પાકિસ્તાન ભડક્યું છે. દરમિયાન, વડા પ્રધાન શાહબાઝ શરીફે કહ્યું, પાકિસ્તાનના પાણીને ઘટાડવા અથવા વાળવાના કોઈપણ પ્રયાસનો સંપૂર્ણ તાકાતથી જવાબ આપવામાં આવશે.

પાકિસ્તાનના વડાપ્રધાને કહ્યું કે અમે કોઈપણ એક્શનનો જવાબ આપવા માટે સંપૂર્ણપણે તૈયાર છીએ. આ વિશે કોઈએ ભૂલ ન કરવી જોઈએ. આ 240 મિલિયન લોકોનો દેશ છે, અમે અમારા બહાદુર સશસ્ત્ર દળોની પાછળ ઉભા છીએ. આ સંદેશ સ્પષ્ટ હોવો જોઈએ.

શાહબાઝ શરીફે કહ્યું, શાંતિ અમારી પ્રાથમિકતા છે. અમે અમારી અખંડિતતા અને સુરક્ષા સાથે ક્યારેય સમાધાન કરીશું નહીં. આ પહેલા પાકિસ્તાની નેતા બિલાવલ ભુટ્ટોએ કહ્યું હતું કે કાં તો સિંધુ નદીમાં પાણી વહેશે અથવા તેમનું લોહી વહેશે. સિંધુ નદી અમારી છે અને અમારી જ રહેશે.

સખારમાં સિંધુ નદીના કિનારે એક જાહેર સભાને સંબોધતા બિલાવલ ભુટ્ટોએ કહ્યું, હું સિંધુ નદી પાસે ઊભા રહીને સ્પષ્ટપણે કહેવા માંગુ છું કે સિંધુ નદી આપણી હતી, આપણી છે અને આપણી જ રહેશે. કાં તો આપણું પાણી આ નદીમાંથી વહેશે, અથવા જે આપણો હિસ્સો છીનવી લેવા માંગે છે તેનું લોહી વહેશે.
બિલાવલે કહ્યું કે ફક્ત એટલા માટે કે તેમની (ભારતની) વસ્તી વધુ છે, તેઓ નક્કી કરી શકતા નથી કે તે કોનું પાણી છે. પાકિસ્તાનના લોકો બહાદુર અને ગર્વિત છે, અમે બહાદુરીથી લડીશું, સરહદો પર આપણી સેના દરેક હુમલાનો જવાબ આપવા તૈયાર છે.

બિલાવલે પોતાના નિવેદનમાં સિંધુ નદીને સમગ્ર પાકિસ્તાનનો સહિયારો વારસો ગણાવ્યો અને દેશના લોકોને એકતાની અપીલ કરી અને કહ્યું કે આપણો દરેક પાકિસ્તાની સિંધુનો સંદેશ લેશે અને દુનિયાને કહેશે કે નદીની લૂંટ સ્વીકાર્ય નથી. દુશ્મનની નજર આપણા પાણી પર છે, આખા રાષ્ટ્રે સાથે મળીને આનો જવાબ આપવો પડશે.