પૂરતી સુવિધા આપવા લોક માંગ

ભાણવડના એક માત્ર સામુહિક આરોગ્ય કેન્દ્રમાં અપૂરતા તબીબ તેમજ દવાઓનો અપૂરતો જથ્થો સહિત અદ્યતન મશીનની સુવિધાના ન હોવાથી સેંકડો દર્દીઓમાં નારાજગી જોવાઇ રહી છે, આ બાબતે મોટા કાલાવડ ગામના ભાવિકભાઇ એ આરોગ્ય ખાતાના વરિષ્ઠ અધિકારીને તાકીદે પત્ર લખી વ્હેલી તકે ખૂટતી સુવિધા આપવા રજૂઆત કરી છે.

ભાણવડ વિસ્તારની જનતાને રાજ્યના આરોગ્ય વિભાગ દ્વારા અન્યાય કરાતો હોવાની ફરિયાદો ઉઠી છે, ખાસ કરીને સામુહિક આરોગ્ય કેન્દ્રમાં અપૂરતા ડોકટરોનો પ્રશ્ર્ન લોકો માટે માથાના દુ:ખાવા સમાન બની રહી છે, ડોકટરોની અપૂરતી સંખ્યાથી સેંકડો દર્દીઓની નિદાન સારવારમાં હેરાનગતિ સહન કરવી પડે છે, જ્યારે ઇમરજન્સીમાં કોઇ દર્દી સારવાર માટે આવે છે, ત્યારે ઓપીડીમાં રાહ જોઇને બેઠેલા દર્દીઓને લાંબો સમય બેસી રહેવું પડે છે.

ઉપરાંત સરકારી હોસ્પિટલોમાં દર્દીઓ માટે રાખેલો દવાનો જથ્થો પણ અપૂરતો હોય છે, જેથી બીમારી દર્દીને બહાર ખાનગી મેડીકલ, સ્ટોરમાંથી મોંઘી દવાઓ ખરીદવી પડે છે, જેમાં ગરીબ વર્ગને આર્થિક રીતે પરવળતું નથી, આ સિવાય સામુહિક આરોગ્ય કેન્દ્રમાં એકસરે મશીન પણ ખૂબ જ જુનું થઇ ગયું છે. હાડકાના દર્દીઓને કેવી ઇજા થઇ છે, તે જાણવામાં ખૂબ જ મુશ્કેલી થાય છે, જેથી સામુહિક આરોગ્ય કેન્દ્રમાં અદ્યતન પ્રકારના એકસરે મશીનની માંગ બુલંદ બની છે.