છેલ્લા કેટલાક વર્ષોમાં સોનાના બજારમાં જબરદસ્ત તેજી જોવા મળી છે અને હવે ફરી એકવાર સોનાના ભાવમાં મોટા વધારાનું અનુમાન વ્યક્ત કરવામાં આવ્યું છે. તાજેતરના ત્રિમાસિક બુલિયન અહેવાલ અનુસાર, સ્થાનિક બજારમાં આગામી ૬ થી ૧૨ મહિનામાં સોનાનો ભાવ વધીને ૧.૬૦ લાખથી ૧.૬૮ લાખ રૂપિયા પ્રતિ ૧૦ ગ્રામ સુધી પહોંચી શકે છે. કેન્દ્રીય બેંકો દ્વારા સતત કરવામાં આવતી ખરીદી અને રોકાણકારોની મજબૂત માંગ સોનાના ભાવને મોટો ટેકો પૂરો પાડી રહી છે. બીજી તરફ, આંતરરાષ્ટ્રીય બજારમાં મધ્યમ ગાળામાં સોનાનો ભાવ ૪,૫૦0થી ૪,૭૦0 ડોલર પ્રતિ ઔંસ સુધી જવાની ધારણા છે, જ્યારે ટૂંકા ગાળામાં સ્થાનિક બજારમાં ભાવ આશરે ૧.૪૮ લાખ રૂપિયા પ્રતિ ૧૦ ગ્રામની આસપાસ રહી શકે છે.

સોનાના ભાવમાં આ ઉછાળા પાછળ વૈશ્વિક સ્તરે પ્રવર્તતી આર્થિક અને રાજકીય અનિશ્ચિતતાઓ મુખ્ય કારણ છે, જેના કારણે રોકાણકારો સોનાને સૌથી સુરક્ષિત રોકાણ વિકલ્પ તરીકે જોઈ રહ્યા છે. આ ઉપરાંત, અમેરિકન ફેડરલ રિઝર્વની વ્યાજદર સંબંધિત નીતિઓ, મોંઘવારીનો દર અને ડોલરની ચાલ પણ સોનાના બજારને સીધી અસર કરી રહી છે. વર્ષ ૨૦૨૫માં સોનામાં સતત તેજી રહી હતી, પરંતુ ૨૦૨૬માં સ્થિતિ અલગ રહી હતી; જાન્યુઆરી ૨૦૨૬માં આંતરરાષ્ટ્રીય બજારમાં સોનું ૫,૬00 ડોલર પ્રતિ ઔંસના રેકોર્ડ સ્તરે પહોંચ્યા બાદ ઘટીને 4,000 ડોલરથી નીચે ગયું હતું અને ત્યારબાદ તેમાં ફરી સુધારો જોવા મળ્યો હતો.

લાંબાગાળાના રોકાણની દૃષ્ટિએ સોનાએ છેલ્લા એક દાયકામાં શાનદાર રિટર્ન આપ્યું છે. વર્ષ ૨૦૧૬માં દિવાળીની આસપાસ સ્થાનિક બજારમાં સોનાનો ભાવ આશરે ૩૦,૦૦૦ રૂપિયા પ્રતિ ૧૦ ગ્રામ હતો, જે ૨૦૨૬માં વધીને આશરે ૧.૫ લાખ રૂપિયા પ્રતિ ૧૦ ગ્રામ સુધી પહોંચી ગયો છે. એટલે કે માત્ર એક જ દાયકામાં સોનાનો ભાવ લગભગ પાંચ ગણો વધી ગયો છે. આમ છતાં, સોનાના ભાવની દિશા આગામી સમયમાં અમેરિકાના વ્યાજદરો, મોંઘવારી, ડોલરની મજબૂતાઈ, બોન્ડ રિટર્ન અને કેન્દ્રીય બેંકોની સોનાની ખરીદી જેવા વૈશ્વિક પરિબળો દ્વારા જ નક્કી થશે.

જો તમે પણ સોનામાં રોકાણ કરવાનું વિચારી રહ્યા હોવ, તો માત્ર ૧.૬૮ લાખ રૂપિયા સુધી પહોંચવાના અંદાજને આધારે જ ઉતાવળમાં નિર્ણય ન લેવો જોઈએ. આ વર્ષે સોનામાં મોટો ઘટાડો પણ જોવા મળ્યો છે, તેથી બજારના ઉતાર-ચઢાવને ધ્યાનમાં રાખવું જરૂરી છે. રોકાણ કરતા પહેલાં તમારી નાણાકીય જરૂરિયાતો, રોકાણનો સમયગાળો અને જોખમ ઉઠાવવાની ક્ષમતાનું આકલન કરવું અનિવાર્ય છે. એકસાથે મોટી રકમનું રોકાણ કરવાને બદલે તબક્કાવાર (SIP પદ્ધતિથી) રોકાણ કરવાનો વિકલ્પ પણ વિચારી શકાય છે અને નાણાકીય નિર્ણય લેતા પહેલાં પ્રમાણિત નાણાકીય સલાહકારની સલાહ અવશ્ય લેવી જોઈએ.