ભારે પવન, વરસાદ અને હિમવર્ષાથી હિમાચલ પ્રદેશની હાલત ખરાબ કરી નાખી છે. ગઈકાલે ચંબા, કિન્નૌર, કુલ્લુ, લાહૌલ-સ્પિતિ અને મંડીમાં ભારે હિમવર્ષા થઈ હતી. સતત બરફવર્ષાને કારણે ઘણા રસ્તાઓ થીજી ગયા હતા, જેના કારણે વાહનચાલકોને ભારે મુશ્કેલીનો સામનો કરવો પડ્યો હતો. મનાલીના બહારના વિસ્તારમાં સતત બીજા દિવસે પણ બરફવર્ષા ચાલુ રહી હતી. પરિણામે, રોહતાંગ નજીક અટલ ટનલ પાસે સેંકડો વાહનો ફસાયા હતા. લોકો કલાકો સુધી પોતાની કારમાં ફસાયેલા રહ્યા હતા. પોલીસ અને વહીવટીતંત્રની ટીમોએ બચાવ કામગીરી શરૂ કરી અને રવિવાર રાતથી ફસાયેલા ઘણા વાહનોને સુરક્ષિત રીતે મનાલી પહોંચાડ્યા હતા.

હવામાન વિભાગે આગામી ત્રણ દિવસ માટે રાજ્યના દસ જિલ્લાઓમાં વીજળી પડવાની અને ભારે પવન ફૂંકવાની ચેતવણી જારી કરી છે. આ જિલ્લાઓમાં 50થી 60 કિલોમીટર પ્રતિ કલાકની ઝડપે પવન ફૂંકાઈ શકે છે. ચંબા, કાંગડા, કુલ્લુ, મનાલી, સોલન અને મંડી માટે યલો એલર્ટ જારી કર્યું છે, જ્યારે 19 માર્ચ માટે ભારે વરસાદ માટે ઓરેન્જ એલર્ટ જાહેર કરવામાં આવ્યું છે.

ગઈકાલે, રાજ્યના ઘણા ઊંચાઈવાળા વિસ્તારોમાં બરફવર્ષા થઈ હતી. નીચાણવાળા વિસ્તારોમાં વરસાદ અને કરા પડ્યા હતા. રાજધાની શિમલામાં, બપોરે અચાનક હવામાન બદલાયું, ભારે વરસાદ અને કરા પડ્યા હતા. થોડી જ વારમાં, શહેરના રસ્તાઓ અને છત પર કરાનો સફેદ પડ જામી ગયો, જેના કારણે આખું શહેર સફેદ ચાદરમા ઢંકાઈ ગયું હતું.

હવામાન વિભાગના જણાવ્યા અનુસાર, સોમવારે ચંબા, કિન્નૌર, કુલ્લુ, લાહૌલ-સ્પિતિ અને મંડી જિલ્લાના ઘણા ભાગોમાં બરફવર્ષા થઈ હતી. કાંગડા જિલ્લાના ધૌલાધર પર્વતો પણ બરફથી ઢંકાયેલા હતા. ચંબા જિલ્લાના પર્યટન સ્થળ ડેલહાઉસીમાં પણ બરફવર્ષા નોંધાઈ હતી. બપોરે ત્રણ વાગ્યાની આસપાસ, શિમલા સહિત ઘણા વિસ્તારોમાં અચાનક હવામાન બદલાયું અને આકાશ વાદળછાયું થઈ ગયું હતું, જેના કારણે ઘણી જગ્યાએ દિવસ અંધકારમાં ફેરવાઈ ગયો હતો. ગઈકાલે, શિમલામાં તાપમાન 2.2 ડિગ્રી ઘટીને 4.4 ડિગ્રી થયું હતું. ઉનામાં, તાપમાન 9 ડિગ્રી ઘટીને 8.6 ડિગ્રી થયું. ચંબામાં તાપમાન 16 ડિગ્રી ઘટીને 11.2 ડિગ્રી થયું હતું.