નવસારી જિલ્લાના ચીખલી તાલુકામાંથી માનવતાને શરમાવતી અને હૃદયને હચમચાવી દે તેવી એક અત્યંત ગંભીર ઘટના પ્રકાશમાં આવી છે. એક નરાધમ સાવકા પિતાએ પોતાની જ બે સગીર દીકરીઓ પર વારંવાર દુષ્કર્મ ગુજારી તેમને ગર્ભવતી બનાવી હોવાનો સનસનીખેજ ખુલાસો થયો છે. રક્ષક જ ભક્ષક બનવાની આ ઘટનાએ સમગ્ર પંથકમાં ભારે રોષ અને અરેરાટી ફેલાવી દીધી છે.

પાપનો ઘડો કેવી રીતે ફૂટ્યો?

આ શરમજનક ઘટના ત્યારે સામે આવી જ્યારે નાની દીકરીને અચાનક પેટમાં અસહ્ય દુખાવો ઉપડ્યો હતો. પરિવાર તેને તાત્કાલિક સારવાર માટે કુકેરી પી.એચ.સી. સેન્ટર ખાતે લઈ ગયો હતો. ત્યાં ફરજ પરના તબીબોને સગીરાની સ્થિતિ જોઈને શંકા જતાં સોનોગ્રાફી કરાવવાની સલાહ આપી હતી. સોનોગ્રાફીના રિપોર્ટમાં જ્યારે એવું બહાર આવ્યું કે માસૂમ સગીરાને ૫ માસનો ગર્ભ છે, ત્યારે હોસ્પિટલના સ્ટાફ સહિત પરિવારના સભ્યોના પગ નીચેથી જમીન સરકી ગઈ હતી.

બંને દીકરીઓ સાથે નરાધમનું દુષ્કૃત્ય

ઘટનાની ગંભીરતા જોઈ માતાએ જ્યારે નાની દીકરીની આકરી પૂછપરછ કરી, ત્યારે તેણે રડતા રડતા પોતાના સાવકા પિતા અનિલ અમૃતભાઈ રાઠોડની કાળી કરતૂતો વિશે જણાવ્યું હતું. આટલું ઓછું હોય તેમ, શંકાના આધારે જ્યારે મોટી દીકરીની પણ તપાસ કરાવવામાં આવી, ત્યારે ચોંકાવનારો ખુલાસો થયો કે તે પણ ૨ માસની ગર્ભવતી છે. આરોપી અનિલ રાઠોડ બંને દીકરીઓને જંગલમાં લાકડા વીણવા જવાના બહાને અથવા રાત્રિના સમયે જ્યારે પરિવારના અન્ય સભ્યો ઊંઘતા હોય ત્યારે પોતાની હવસનો શિકાર બનાવતો હતો.

ભૂખ્યા રાખવાની ધમકી આપી મોઢું બંધ રખાવ્યું

તપાસમાં બહાર આવ્યું છે કે માસૂમ દીકરીઓ લાંબા સમયથી આ નરક જેવી પીડા સહન કરી રહી હતી. આરોપી પિતા તેમને સતત માનસિક અને શારીરિક રીતે ધમકાવતો હતો. તે માસૂમોને એવી ધમકી આપતો હતો કે, "જો તમે આ વાત કોઈને પણ કહેશો, તો હું તમને અને તમારી મમ્મીને જમવાનું આપીશ નહીં અને ભૂખ્યા રાખીશ." ગરીબ અને લાચાર દીકરીઓ જમવાનું નહીં મળે અને મમ્મી હેરાન થશે તેવા ડરથી આ અત્યાચાર મૂંગા મોઢે સહન કરતી રહી હતી.

પોલીસ કાર્યવાહી અને ધરપકડ

આ મામલે સગીરાઓની માતાએ હિંમત દાખવી ચીખલી પોલીસ મથકે ફરિયાદ નોંધાવી છે. પોલીસે આ ઘટનાની ગંભીરતાને ધ્યાને લઈ તુરંત એક્શન લીધા છે. આરોપી અનિલ રાઠોડ વિરુદ્ધ પોક્સો (POCSO) એક્ટ અને ભારતીય ન્યાય સંહિતાની વિવિધ કઠોર કલમો હેઠળ ગુનો દાખલ કરવામાં આવ્યો છે. ચીખલી પોલીસે ગણતરીના કલાકોમાં જ આરોપી નરાધમ પિતાની ધરપકડ કરી લીધી છે.​​​​​​​

સમાજ માટે લાલબત્તી સમાન કિસ્સો

આ ઘટનાએ ફરી એકવાર સમાજમાં સુરક્ષા અને નૈતિકતા સામે મોટા સવાલો ઉભા કર્યા છે. ઘરની ચાર દીવાલો વચ્ચે જ્યારે પિતા જેવું પવિત્ર પાત્ર જ ભક્ષક બને ત્યારે દીકરીઓ ક્યાં સુરક્ષિત રહેશે? હાલ પોલીસ આ કેસમાં ટેકનિકલ અને મેડિકલ પુરાવાઓ એકત્ર કરી રહી છે જેથી આ નરાધમને કાયદાના શરણે લાવી કડકમાં કડક સજા અપાવી શકાય. લોકોમાં એવી માંગ ઉઠી રહી છે કે આવા ગુનેગારોને ફાંસી જેવી કડક સજા મળવી જોઈએ જેથી ભવિષ્યમાં કોઈ આવું હીન કૃત્ય કરતા સો વાર વિચારે.