આજે ભારતીય શેરબજારોમાં તીવ્ર ઘટાડો જોવા મળ્યો. સેન્સેક્સમાં ૬૭૨ પોઈન્ટનો ઘટાડો થયા બાદ 82,898.31ના સ્તર પર જોવા મળ્યો, જ્યારે નિફ્ટી 200 પોઈન્ટ ઘટીને ૨૫,૫૦૦ ની આસપાસ ગગડી ગયો હતો. વધતા વૈશ્વિક વેપાર તણાવ, વિદેશી રોકાણકારો દ્વારા સતત વેચાણ અને નબળા ત્રિમાસિક પરિણામોને કારણે રોકાણકારોનું સેન્ટિમેન્ટ નબળું પડ્યું હતું. સ્મોલ-કેપ અને મિડ-કેપ શેરોમાં પણ તીવ્ર વેચવાલી જોવા મળી હતી, જેમાં આઈટી, ઉર્જા અને રિયલ એસ્ટેટ શેરોમાં સૌથી મોટો ઘટાડો જોવા મળ્યો હતો.

જાપાનનો નિક્કી ઇન્ડેક્સ લગભગ ૧ ટકા ઘટ્યો હતો. માર્ટિન લ્યુથર કિંગ જુનિયર ડે માટે યુએસ શેરબજારો બંધ હોવા છતાં, યુએસ સ્ટોક ફ્યુચર્સ ૦.૭ ટકા ઘટીને ટ્રેડ થઈ રહ્યા હતા.

યુએસ ફેડરલ રિઝર્વના આગામી ચેરમેનને લઈને અનિશ્ચિતતાથી શેરબજારનું સેન્ટિમેન્ટ પણ નબળું પડ્યું છે. ટ્રમ્પે જણાવ્યું છે કે કેવિન હેસેટને આગામી ચેરમેન તરીકે નિયુક્ત કરવામાં આવશે નહીં અને તેઓ વ્હાઇટ હાઉસ નેશનલ ઇકોનોમિક કાઉન્સિલના ડિરેક્ટર તરીકે રહી શકે છે. હેસેટને વ્યાજ દરમાં ઘટાડાના સમર્થક માનવામાં આવે છે. તેમની નિમણૂક અંગેની અનિશ્ચિતતાએ 2026 માં વ્યાજ દરમાં ઘટાડાની અપેક્ષાઓને નબળી બનાવી છે, જેની અસર વૈશ્વિક શેરબજારો પર પડી છે.

વિદેશી સંસ્થાકીય રોકાણકારોએ સતત નવમા ટ્રેડિંગ દિવસે ભારતીય શેરબજારમાંથી ભંડોળ પાછું ખેંચી લીધું. તેમણે ભારતીય બજારમાં રૂ. 4,346.13 કરોડના શેર વેચ્યા. જિયોજિત ફાઇનાન્શિયલ સર્વિસિસના મુખ્ય રોકાણ વ્યૂહરચનાકાર વીકે વિજયકુમારના જણાવ્યા અનુસાર, જાન્યુઆરીમાં અત્યાર સુધીમાં વિદેશી રોકાણકારોએ કુલ રૂ. 22,529 કરોડનું વેચાણ કર્યું છે. આ વર્ષની શરૂઆતમાં પણ, અન્ય મુખ્ય વૈશ્વિક શેરબજારોની તુલનામાં ભારતનું પ્રદર્શન નબળું રહ્યું.

ડિસેમ્બર ક્વાર્ટરના મિશ્ર પરિણામોએ પણ શેરબજાર પર દબાણ વધાર્યું. આજે ટ્રેડિંગ દરમિયાન નિફ્ટી આઈટી ઇન્ડેક્સ લગભગ 1 ટકા ઘટ્યો. વિપ્રોના શેરમાં સૌથી મોટો ઘટાડો જોવા મળ્યો, જેમાં 9 ટકા ઘટાડો થયો. આઈસીઆઈસીઆઈ બેંકના શેરમાં પણ લગભગ 3 ટકા ઘટાડો થયો. બેંકિંગ શેરોમાં પણ દબાણ હતું. વધુ જોગવાઈઓને કારણે બેંકે ડિસેમ્બર ક્વાર્ટરમાં બજારની અપેક્ષાઓ કરતાં ઓછું પ્રદર્શન કર્યું.