ગુજરાત રાજ્ય માધ્યમિક અને ઉચ્ચત્તર માધ્યમિક શિક્ષણ ક્ષેત્રે અત્યંત મહત્વપૂર્ણ ગણાતી 'ટાટ હાયર સેકન્ડરી' (TAT-HS) મુખ્ય પરીક્ષાના તાજેતરમાં જાહેર થયેલા પરિણામને લઈને સમગ્ર રાજ્યના ઉમેદવારોમાં ભારે રોષ અને અસંતોષ જોવા મળી રહ્યો છે. આ પરીક્ષાના પરિણામમાં અંદાજે 30 હજાર જેટલા પરીક્ષાર્થીઓ નાપાસ જાહેર થતાં રાજ્યભરમાંથી મોટી સંખ્યામાં ઉમેદવારો ગાંધીનગર ખાતે ઉમટી પડ્યા હતા. ઉમેદવારોએ ગાંધીનગરના સેક્ટર-21 ખાતે આવેલા ગુજરાત રાજ્ય પરીક્ષા બોર્ડની કચેરી સામે ઉગ્ર વિરોધ પ્રદર્શન કર્યું હતું અને સત્તાધીશોને આવેદનપત્ર પાઠવીને પરિણામની નિષ્પક્ષ તપાસ કરવાની માંગણી કરી હતી.
47 હજારમાંથી માત્ર 16 હજાર ઉમેદવારો જ સફળ
રાજ્યની ઉચ્ચત્તર માધ્યમિક શાળાઓમાં શિક્ષક બનવા માટેની આ મહત્વની મુખ્ય પરીક્ષા રાજ્યભરમાંથી અંદાજે 47 હજાર જેટલા લાયક ઉમેદવારોએ આપી હતી. જોકે, રાજ્ય પરીક્ષા બોર્ડ દ્વારા જ્યારે પરિણામ જાહેર કરવામાં આવ્યું ત્યારે ચોંકાવનારા આંકડા સામે આવ્યા હતા. કુલ 47 હજાર ઉમેદવારોમાંથી આશરે 30 હજાર જેટલા પરીક્ષાર્થીઓને નાપાસ જાહેર કરવામાં આવ્યા છે, જ્યારે માત્ર 16 હજાર જેટલા જ પરીક્ષાર્થીઓ સફળ થયા છે. આટલી મોટી સંખ્યામાં ઉમેદવારો નાપાસ થવાથી પરીક્ષાની મૂલ્યાંકન પ્રક્રિયા સામે ગંભીર સવાલો ઊભા થયા છે.
ગોલ્ડ મેડાલિસ્ટ અને પીએચ.ડી ધારકોના પરિણામથી આશ્ચર્ય
આ પરીક્ષાના પરિણામમાં સૌથી વધુ આશ્ચર્યજનક બાબત એ છે કે અનેક તેજસ્વી અને ઉચ્ચ લાયકાત ધરાવતા ઉમેદવારો પણ નાપાસ થયા છે. પરીક્ષાર્થીઓના જણાવ્યા અનુસાર, વર્ષોનો શૈક્ષણિક અનુભવ ધરાવતા સ્ટાફ, ગોલ્ડ મેડાલિસ્ટ વિદ્યાર્થીઓ અને પીએચ.ડી (Ph.D) જેવી ઉચ્ચ ડિગ્રી ધરાવતા ઉમેદવારોના પરિણામો પણ અપેક્ષા કરતા ખૂબ જ નીચા અને વિપરીત આવ્યા છે. આ કારણે ઉમેદવારોમાં એવી લાગણી પ્રબળ બની છે કે ઉત્તરવહીઓની તપાસણીમાં કોઈ મોટી ક્ષતિ રહી ગઈ છે.
પારદર્શિતા માટે ઉમેદવારોની મુખ્ય માંગણીઓ
રાજ્ય પરીક્ષા બોર્ડને આવેદનપત્ર પાઠવીને ઉમેદવારોએ પરીક્ષા પદ્ધતિમાં સંપૂર્ણ પારદર્શિતા લાવવાની માંગ કરી છે. ઉમેદવારોની મુખ્ય માંગણી છે કે TAT-HS મુખ્ય પરીક્ષાના બંને પેપરોના માર્ક અલગ-અલગ જાહેર કરવામાં આવે. આ ઉપરાંત, દરેક ઉમેદવારની ઉત્તરવહી અને સત્તાવાર આન્સર કી જાહેર કરવામાં આવે, જેથી ઉમેદવારો પોતાનું મૂલ્યાંકન જાતે ચકાસી શકે. વધુમાં, મૂલ્યાંકન પદ્ધતિ અને તેના ચોક્કસ નિયમો સ્પષ્ટ કરવાની સાથે પેપર-1 આપનાર અને નાપાસ થયેલા તમામ પરીક્ષાર્થીઓને તેમના ગુણની વિગતવાર માહિતી પૂરી પાડવામાં આવે તેવી ઉગ્ર રજૂઆત કરવામાં આવી છે.