મુંબઈના છત્રપતિ શિવાજી મહારાજ આંતરરાષ્ટ્રીય એરપોર્ટ (CSMIA) પર મંગળવારે સાંજે અચાનક આવેલી નેટવર્ક ખામીના કારણે ચેક-ઇન પ્રક્રિયા ખોરવાઈ ગઈ હતી. સાંજે આશરે 7:05 વાગ્યે શરૂ થયેલી આ તકનીકી સમસ્યાને કારણે લગભગ 50 મિનિટ સુધી ડિપાર્ચર હોલમાં મુસાફરોને ભારે હેરાનગતિનો સામનો કરવો પડ્યો હતો.

તકનીકી ખામીના કારણે મુખ્યત્વે ઇન્ડિગો અને એર ઇન્ડિયાની ઉડાણોના મુસાફરોને ભારે તકલીફ પડી હતી અને એરપોર્ટના ડિપાર્ચર હોલમાં અફરાતફરી જેવો માહોલ સર્જાયો હતો. નેટવર્કમાં ગરબડના કારણે ચેક-ઇન પ્રક્રિયા ધીમી પડી ગઈ હતી, બોર્ડિંગ ગેટ બદલવા પડ્યા હતા અને વિમાનના ક્રૂ મેમ્બર્સની અવરજવરમાં વિલંબ થયો હતો.

નેટવર્કની આ સમસ્યાના કારણે એર ઇન્ડિયાની આશરે 11 અને ઇન્ડિગોની 3 ઉડાણોની ચેક-ઇન પ્રક્રિયા પ્રભાવિત થઈ હતી. જોકે, ચેક-ઇન કામગીરી ધીમી ચોક્કસ પડી હતી પરંતુ સંપૂર્ણપણે બંધ થઈ નહોતી.

મેન્યુઅલ પદ્ધતિથી શરૂ કરવામાં આવ્યું કામ
જરૂરી કામકાજ ચાલુ રાખવા અને મુસાફરોને ઓછી હેરાનગતિ થાય તે માટે એરપોર્ટની ટીમોએ પ્રોટોકોલ હેઠળ મેન્યુઅલ (માનવસર્જિત) રીતે કામ કરવાનું શરૂ કરી દીધું હતું. રિપોર્ટ મુજબ, બોર્ડિંગ દરમિયાન મુસાફરોના ટિકિટ સ્કેન કરતા મશીનોની સ્પીડ પણ ધીમી પડી ગઈ હતી.

​​​​​​​એરપોર્ટ સંચાલકના જણાવ્યા અનુસાર ઉડાણોના સમગ્ર સંચાલન પર આની કોઈ વ્યાપક અસર પડી નથી. નેટવર્કની ક્ષતિ સામે આવ્યા બાદ એરપોર્ટ પર કામકાજ સામાન્ય બનાવવા માટે ટેકનિકલ ટીમોએ ત્વરિત કામગીરી હાથ ધરીને સ્થિતિ પર કાબૂ મેળવ્યો હતો.