ગુજરાતમાં અત્યારે રાજકોટ અમરેલી સુરેન્દ્રનગર ભુજ કંડલા વડોદરા ગાંધીનગર ડીસા અમદાવાદ સહિત અને શહેરોમાં મહત્તમ તાપમાન નો પારો 40 થી 42.7 ડિગ્રી છે. આજે અને આવતીકાલે તેમાં મામૂલી ફેરફાર થશે પરંતુ સોમવારથી ગરમીના પ્રમાણમાં વધારો થશે તેવી આગાહી હવામાન ખાતા દ્વારા કરવામાં આવી છે.

હવામાન ખાતાના જણાવ્યા મુજબ સોમવારથી પાંચ દિવસ માટે ગુજરાતમાં મહત્તમ તાપમાનમાં ત્રણથી પાંચ ડિગ્રીનો વધારો થશે અને તેના કારણે અનેક જગ્યાએ 45 ડિગ્રી કે તેનાથી વધુ તાપમાન થઈ જશે. ગુજરાત ઉપરાંત પંજાબ હરિયાણા ચંદીગઢ દિલ્હી અને રાજસ્થાનમાં પણ મહત્તમ તાપમાનમાં પાંચ ડિગ્રી સુધી વધારાની ચેતવણી હવામાન ખાતા દ્વારા આપવામાં આવી છે. રાજસ્થાનમાં તો રાત્રિનું તાપમાન પણ ઊંચું રહેશે તેવી ચેતવણી હવામાન વિભાગે આપી છે.

ગુજરાત બિહાર ઝારખંડ તામિલનાડુ પુડીચેરી કેરલા આંધ્ર પ્રદેશમાં તારીખ 27 થી આગામી તારીખ 1 મે સુધી ગરમ અને ભેજવાળું વાતાવરણ રહેવાનું એલર્ટ પણ હવામાન વિભાગ દ્વારા આપવામાં આવ્યું છે. હવામાન ખાતાના જણાવ્યા મુજબ ઉત્તર પ્રદેશ મધ્યપ્રદેશ મહારાષ્ટ્ર અને પૂર્વના અનેક રાજ્યો ઉપરાંત મધ્ય ભારતમાં ગરમીના પ્રમાણમાં ચાર ડિગ્રી સુધીનો ઘટાડો થવાની શક્યતા છે.

ગુજરાતની વાત કરીએ તો શુક્રવારે ભુજમાં 42.7 કંડલા એરપોર્ટ પર 40.6 અમરેલીમાં 41.9 રાજકોટમાં 42.2 સુરેન્દ્રનગરમાં 42.1 અમદાવાદમાં 42.1 ડીસામાં 40.8 ગાંધીનગરમાં 41.6 અને વડોદરામાં 40.4 ડિગ્રી મહત્તમ તાપમાન નોંધાયું હતું. આજે અને આવતીકાલે બે દિવસ મહત્તમ તાપમાનમાં ખાસ વધઘટ થવાની શક્યતા નથી. પરંતુ સોમવારથી મહત્તમ તાપમાનનો પારો પાંચ ડિગ્રી સુધી ઉંચે ચડવાની ચેતવણી હવામાન વિભાગે આપી છે. આ પાંચ દિવસ દરમિયાન સૌરાષ્ટ્ર કચ્છ સહિત રાજ્યના અમુક શહેરોમાં હીટ વેવ માટેનું એલર્ટ પણ આગામી દિવસોમાં જાહેર થાય તેવું જણાઈ રહ્યું છે.