આજે મુંબઈમાં શિવસેના (UBT)ના વડા ઉદ્ધવ ઠાકરે અને મહારાષ્ટ્ર નવનિર્માણ સેના (MNS)ના વડા રાજ ઠાકરેએ મુખ્ય ચૂંટણી કમિશનર જ્ઞાનેશ કુમાર વિરુદ્ધ સંયુક્ત વિરોધ રેલીનું નેતૃત્વ કર્યું હતું. જેમા હજારોની સંખ્યમાં લોકો જોડાયા હતા. સહભાગીઓએ મહારાષ્ટ્રમાં મતદાર યાદીઓના સ્પેશિયલ ઇન્ટેન્સિવ રિવિઝન (SIR)ને રદ કરવાની માંગ કરી. રેલી પછી ભીડને સંબોધતા, ઉદ્ધવ ઠાકરેએ સરકાર પર મેક ઇન ઇન્ડિયાના નારાની આડમાં સરમુખત્યારશાહી લાવવાનો પ્રયાસ કરવાનો આરોપ લગાવ્યો.

વધુમાં જણાવ્યું હતું કે, અમે અહીં સરમુખત્યારશાહીને દફનાવવા માટે ભેગા થયા છીએ, તમને યાદ હશે કે જ્યારે મોદી પહેલી વાર વડા પ્રધાન બન્યા હતા, ત્યારે તેમણે 'મેક ઇન ઇન્ડિયા'નો નારા આપ્યો હતો. યાદ છે? અમે તેમાં માનીએ છીએ. પરંતુ જો 'મેક ઇન ઇન્ડિયા'ના આડમાં તમે આપણા દેશમાં એક સરમુખત્યારશાહી બનાવવાના છો, તો અમે આજે તે સરમુખત્યારશાહીને દફનાવવા અને નાશ કરવા માટે અહીં ભેગા થયા છીએ."

વિરોધ પ્રદર્શન પહેલાં બોલતા, શિવસેના (UBT)ના નેતા સંજય રાઉતે જણાવ્યું હતું કે આ પ્રદર્શન લોકશાહી સંસ્થાઓ, ચૂંટણી પ્રક્રિયાઓ અને નાગરિકોના બંધારણીય અધિકારોને નબળા પાડવાના પ્રયાસો સામે સામૂહિક પ્રતિક્રિયા હતી.

આ ૧૮૫૭નો બળવો છે

તેમણે પત્રકારોને જણાવ્યું હતું કે, આ વિરોધ દેશમાં પ્રવર્તતા હિટલર જેવા શાસન, ચૂંટણીઓ હાઇજેક કરવા, ચૂંટણી પંચ અને સુપ્રીમ કોર્ટને પોતાના ખિસ્સામાં રાખવા, સરમુખત્યારશાહી ચલાવવા, મતો અને ચૂંટણીઓ ચોરી કરવા અને સાંસદો અને ધારાસભ્યોને વિભાજીત કરવા સામે છે. આ બધી બાબતો સામે બળવો છે, જેમ ૧૮૫૭માં થયું હતું.

ચૂંટણી કમિશનરોની નિમણૂકની પ્રક્રિયા અંગે પ્રશ્નો ઉઠાવવામાં આવ્યા

ઠાકરેએ કહ્યું, મને ચૂંટણી કમિશનરોની નિમણૂક અંગે શંકા છે. ચૂંટણી કમિશનરોની નિમણૂક ચૂંટણી દ્વારા થવી જોઈએ. અગાઉ, ભારતના મુખ્ય ન્યાયાધીશ, વડા પ્રધાન અને વિરોધ પક્ષના નેતાની બનેલી એક સમિતિ હતી. તેમણે આ સમિતિમાંથી મુખ્ય ન્યાયાધીશને દૂર કર્યા. મુખ્ય ન્યાયાધીશની જગ્યાએ, તેમણે વડા પ્રધાન દ્વારા પસંદ કરાયેલા મંત્રીની નિમણૂક કરી. તે મંત્રી અમિત શાહ છે. અદાલતોમાં સતત સુનાવણીઓ ચાલી રહી છે, પરંતુ કોઈ જવાબદારી નથી.

તેમણે આગળ કહ્યું, પહેલો પ્રશ્ન એ છે કે જ્ઞાનેશ કુમારની નિમણૂક કેવી રીતે કરવામાં આવી? શું ગૃહ મંત્રાલય પાસે કોઈ વ્યક્તિના નાગરિકત્વના અધિકારો રદ કરવાની સત્તા છે? તેઓ જ્ઞાનેશ કુમાર દ્વારા તે સત્તાનો ઉપયોગ કરી રહ્યા છે, અને તેથી જ અમે જ્ઞાનેશ કુમારને ઇચ્છતા નથી. પહેલા ભ્રષ્ટાચાર વિરુદ્ધ ભારત હતું, અને હવે મત ચોર વિરુદ્ધ ભારત છે... ભાજપને સરકાર કેવી રીતે ચલાવવી તે ખબર નથી... તમે જે રીતે સરકાર ચલાવી રહ્યા છો તે શાસન નથી. તે બદલાની ભાવના છે.