પશ્ચિમ એશિયામાં ચાલી રહેલા તણાવને કારણે સમુદ્રી વ્યાપાર માર્ગો પ્રભાવિત થયા છે. આંતરરાષ્ટ્રીય સ્તરે માલસામાનની હેરફેર મોંઘી થતા અને કાચા માલની અછત સર્જાતા આઈસ્ક્રીમ અને ચોકલેટ ઉત્પાદક કંપનીઓની મુશ્કેલીઓ વધી છે.

કાચા માલના ભાવમાં ૧૫ થી ૨૨% નો ઉછાળો
આઈસ્ક્રીમ અને ચોકલેટ બનાવવા માટે અત્યંત જરૂરી એવા કાચા માલમાં ભાવવધારો જોવા મળ્યો છે. ડ્રાયફ્રૂટ્સ અને નટ્સની વાત કરીએ તો કાજુ, બદામ અને પિસ્તા જેવા ડ્રાયફ્રૂટ્સના ભાવમાં ૧૫% થી ૨૨% સુધીનો વધારો થયો છે. ચોકલેટ અને ચોકલેટ ફ્લેવરના આઈસ્ક્રીમ માટે અનિવાર્ય એવા કોકોની સપ્લાય ખોરવાતા તેના ભાવ આસમાને પહોંચ્યા છે. કાચા માલના વધતા ભાવને કારણે કંપનીઓના પ્રોફિટ માર્જિન પર ભારે દબાણ સર્જાયું છે.

લોજિસ્ટિક્સ અને પેકેજિંગમાં વધારો
માત્ર ખાધ્ય સામગ્રી જ નહીં, પરંતુ તેને ગ્રાહકો સુધી પહોંચાડવાનો ખર્ચ પણ વધ્યો છે. સમુદ્રી માર્ગો પર ચાલી રહેલા સંઘર્ષને કારણે ડિલિવરીમાં વિલંબ થઈ રહ્યો છે, જેના લીધે ટ્રાન્સપોર્ટ અને પેકેજિંગ કોસ્ટમાં મોટો વધારો થયો છે. કંપનીઓ માટે આ વધારાનો ખર્ચ જાતે સહન કરવો હવે મુશ્કેલ બની રહ્યો છે.

કઈ બ્રાન્ડ્સે કેટલો ભાવ વધારો કર્યો?
મોંઘવારીની અસર હવે બજારમાં દેખાવા લાગી છે:

Naturals Ice Cream: આ પ્રખ્યાત બ્રાન્ડે તેના ઉત્પાદનોની કિંમતમાં સરેરાશ ૧૦% સુધીનો વધારો કર્યો છે. કંપનીના ડાયરેક્ટર સિદ્ધાંત કામથે જણાવ્યું હતું કે ડ્રાયફ્રૂટ્સ અને કોકોની અછતને કારણે આ નિર્ણય લેવો પડ્યો છે.

Mother Dairy: મધર ડેરીએ પણ તેના કેટલાક આઈસ્ક્રીમ વેરિઅન્ટ્સના ભાવમાં વધારો કર્યો છે. મેનેજિંગ ડાયરેક્ટર જયતીર્થ ચારીના મતે વૈશ્વિક કોમોડિટીના ભાવ અને વધતા લોજિસ્ટિક્સ ખર્ચ આ માટે જવાબદાર છે.

Dinshaw’s Dairy Foods: કંપનીના ડાયરેક્ટર જર્વિન રાણાએ સંકેત આપ્યો છે કે જો સ્થિતિ આવી જ રહી તો કિંમતો વધારવી એ એકમાત્ર વિકલ્પ બચશે.

આગામી સમયમાં વધુ ભાવવધારાની શક્યતા
હાલમાં કંપનીઓ વધેલા ખર્ચનો સંપૂર્ણ બોજ ગ્રાહકો પર નાખી રહી નથી, પરંતુ જો પશ્ચિમ એશિયામાં તણાવ લાંબો સમય ચાલશે અને સપ્લાય ચેઈન સુધરશે નહીં, તો આઈસ્ક્રીમ અને ચોકલેટના ભાવમાં હજુ પણ ૫ થી ૧૦% નો વધારો જોવા મળી શકે છે. ટૂંકમાં, આ ઉનાળામાં મીઠાશ માણવા માટે ગ્રાહકોએ ખિસ્સા વધુ ઢીલા કરવા તૈયાર રહેવું પડશે.