પોરબંદરના ગાયત્રી મંદિર પાછળ આવેલા રવિપાર્ક વિસ્તારમાં હાલમાં ભુગર્ભ ગટરનું આડેધડ ખોદકામ થઇ રહ્યુ છે અને નિયમોનો આડેધડ ઉલાળીયો કરીને કોન્ટ્રાકટરો આડેધડ ખોદકામ કરી રહ્યા છે ત્યારે ગઇકાલે રાત્રે એક સીનીયર સીટીઝન અહીંથી બાઇક લઇને પસાર થતા હતા ત્યારે તેમનુ મોટરસાઇકલ ખાડામાં ખાબકયુ હતુ. સદનસીબે તેઓને કોઇ ઇજા થઇ નથી પરંતુ બાઇકને મોટુ નુકશાન થયુ હતુ તેથી લોકો દ્વારા આક્રોશ વ્યક્ત કરીને પાલિકાનું તંત્ર કોન્ટ્રાકટરો પાસે નિયમ મુજબ કામ કરાવે તેવી માંગ ઉઠવા પામી છે. 
બનાવની વિગત એવી છે કે પોરબંદરના ગાયત્રી મંદિર પાછળ આવેલા રવિ પાર્ક વિસ્તારમાં ભૂગર્ભ ગટરની કામગીરી કોન્ટ્રાક્ટરના માણસો આડેધડ અને નીતિનિયમનો ઉલાળીયો કરીને કરી રહ્યા છે જેના કારણે ગઈકાલે રાત્રે એક સિનિયર સિટીઝન મોટરસાયકલ અને પસાર થતા હતા ત્યારે ખોદેલા ખાડામાં તેમનું બાઈક પડ્યું હતું. સદનસીબે તેમને કોઈ ઈજા થઈ ન હતી પરંતુ બાઇકને મહામહેનતે કાઢવામાં આવ્યું હતું. આ વિસ્તારના લોકોએ જણાવ્યું હતું કે અઠવાડિયાથી ખોદકામ થઈ ગયું છે પરંતુ તેનો કાટમાળ છે તે યોગ્ય જગ્યાએ રાખવાની બદલે રોડની વચ્ચોવચ ખડકી દેવામાં આવ્યો છે જેના કારણે આ વિસ્તારમાંથી કોઈ વાહન પસાર કરવું હોય તો પણ મુશ્કેલ બની જાય છે. કોન્ટ્રાક્ટરોને કડક સુચના આપીને નિયમનું પાલન કરાવવામાં આવે તેવી માંગણી કરવામાં આવી છે.
લોકોએ જણાવ્યુ હતુ કે કામ પૂર્ણ થઇ ગયા બાદ પણ તેનો કાટમાળ દૂર કરવાના બદલે દિવસોથી ઢગલા કરીને રાખી દેવામાં આવ્યો છે તેના કારણે અહીં સોસાયટીમાં રહેતા લોકોને આવવા-જવામાં ખુબ મોટી મુશ્કેલી વેઠવી પડી રહી છે તેમ છતાં કોન્ટ્રાકટરના માણસો મનમાની કરી રહ્યા છે. નગરપાલિકાના તંત્રએ જવાબદારો સામે કડક હાથે કામ લેવુ જ‚રી બન્યુ છે. કોઇનો જીવ જાય તે પહેલા તંત્ર યોગ્ય કરાવે તે ઇચ્છનીય છે.