સરકારે આજે પેટ્રોલ અને ડીઝલ પર એક્સાઇઝ ડ્યુટીમાં 10 ટકાનો ઘટાડો કરવાની જાહેરાત કરી છે. જોકે, જનતાને આનો કોઈ ફાયદો થશે નહીં. સરકારે જણાવ્યું હતું કે તેલ કંપનીઓ દ્વારા થઈ રહેલા નુકસાનને કારણે આ નિર્ણય લેવામાં આવ્યો છે. એ નોંધવું જોઈએ કે ક્રૂડ ઓઇલના ભાવમાં તીવ્ર વધારો થવા છતાં, નાયરા સિવાય અન્ય કોઈ કંપનીએ પેટ્રોલ અને ડીઝલના ભાવમાં વધારો કર્યો નથી, જેના કારણે તેલ કંપનીઓને નોંધપાત્ર નુકસાન થયું છે.

મંત્રાલયે શું કહ્યું

એક નિવેદનમાં, પેટ્રોલિયમ મંત્રાલયે કહ્યું કે પેટ્રોલ અને ડીઝલના રિટેલ પંપ ભાવમાં કોઈ ફેરફાર થશે નહીં. એક્સાઇઝ ડ્યુટી ઘટાડાથી પંપ ભાવ પર કોઈ અસર થશે નહીં. તેનાથી ઓઇલ માર્કેટિંગ કંપનીઓને ફાયદો થશે, જે હાલમાં મોંઘુ ક્રૂડ ઓઇલ ખરીદી રહી છે અને ઓછા ભાવે પેટ્રોલ અને ડીઝલ વેચી રહી છે. સરકારનો એક્સાઇઝ ડ્યુટી ઘટાડવાનો નિર્ણય એવા સમયે આવ્યો છે જ્યારે ક્રૂડ ઓઇલના ભાવ પ્રતિ બેરલ 70થી વધીને 122 ડોલર પ્રતિ બેરલ થઈ ગયા છે. આ ડ્યુટી ઘટાડાથી સરકાર પર રૂ.1.75 લાખ કરોડનો વધારાનો બોજ પડશે.

સરકાર દર 15 દિવસે પેટ્રોલ-ડીઝલના ભાવની સમીક્ષા કરશે

સેન્ટ્રલ બોર્ડ ઓફ ઇન્ડાયરેક્ટ ટેક્સીસ એન્ડ કસ્ટમ્સ (CBIC) ના ચેરમેન વિવેક ચતુર્વેદીએ શુક્રવારે જણાવ્યું હતું કે સરકાર દર 15 દિવસે પેટ્રોલ અને ડીઝલના ભાવની સમીક્ષા કરશે. પશ્ચિમ એશિયામાં ચાલી રહેલા સંઘર્ષ પર નજીકથી નજર રાખવામાં આવી રહી છે.

સરકારે પેટ્રોલ-ડીઝલની નિકાસ પર કર લાદ્યો

પેટ્રોલ પર એક્સાઇઝ ડ્યુટી રૂ.13 પ્રતિ લિટરથી ઘટાડીને રૂ.3 કરવામાં આવી છે, જ્યારે ડીઝલ પર તે રૂ.10થી ઘટાડીને શૂન્ય કરવામાં આવી છે. વધુમાં, સરકારે ડીઝલ પર રૂ,21.5 પ્રતિ લિટર અને ઉડ્ડયન ઇંધણ પર રૂ.29.5 પ્રતિ લિટર નિકાસ ડ્યુટી લાદી છે.

ગુજરાતમાં વારસાઈ સંબંધિત જમીનના આંતરિક વ્યવહારો માટે જંત્રી આધારિત સ્ટેમ્પ ડ્યુટીની જોગવાઈઓમાં રાહત આપવાનો નિર્ણય લેવામાં આવ્યો છે. જેમાં ગુજરાત સ્ટેમ્પ અધિનિયમ 1958ની કલમ 9 હેઠળ રાજ્ય સરકારે જંત્રી આધારિત સ્ટેમ્પ ડ્યુટીની જોગવાઈઓમાંથી રાહત આપીને રૂપિયા 300 ટોકન સ્ટેમ્પ ડ્યુટી લાગુ કરવાનો નિર્ણય કર્યો છે. સ્ટેમ્પ ડ્યુટીમાં રાહત આપતા હવે ખેડૂતોને ખેતીની જમીનની વારસાઈ મિલકતના વેચાણમાં આર્થિક ભાર ઓછો થતાં મોટી રાહત થશે.