વોલ સ્ટ્રીટ જર્નલના રિપોર્ટ અનુસાર, ઈરાને હિંદ મહાસાગરમાં ઈરાનથી ૪૧૦૦ કિમી દુર આવેલા અમેરિકા અને બ્રિટનના સંયુક્ત સૈન્ય મથક ડિયેગો ગાર્સિયા પર બે લાંબા અંતરની મિસાઈલોથી હુમલો કર્યો છે. આ ઘટના બાદ વૈશ્વિક સ્તરે ખળભળાટ મચી ગયો છે. બ્રિટને ભારતથી નીચે માલદીવ્સ પછી આવેલા ચાગોસ દ્વીપસમુહ્માના ડિયેગો ગાર્સિયા અને ઇંગ્લેન્ડમાં આવેલા ફેરફોર્ડ બેઝનો ઉપયોગ કરવાની મંજુરી અમેરિકાને આપ્યાના થોડા કલાકમાં જ ઈરાને આ હુમલો કર્યો હતો.

રિપોર્ટ મુજબ, ઈરાન દ્વારા છોડવામાં આવેલી બંને મિસાઈલો અમેરિકી સૈન્ય અડ્ડાને ભેદવામાં નિષ્ફળ રહી છે અને બેઝને કોઈ નુકસાન થયું નથી. એક મિસાઈલ લોન્ચ પછી બહુ દુર જી શકી નાહોતી પણ બીજી અમેરિકન બેઝ સુધી પહોંચી રહી હતી ત્યારે તોડી પડાઈ હોવાનો દાવો અમેરિકન સુત્રો દ્વારા કરવામાં આવ્યો છે. અમેરિકાએ આ મિસાઈલને રોકવા માટે પોતાના જંગી જહાજ પરથી એસએમ-3 ઈન્ટરસેપ્ટર લોન્ચ કર્યું હતું. જોકે, ઈન્ટરસેપ્ટર મિસાઈલને હવામાં તોડી પાડવામાં સફળ રહ્યું કે નહીં તેની સ્પષ્ટતા થઈ નથી.

સામાન્ય રીતે ઈરાનની ગતિવિધિઓ અમેરિકી સેન્ટ્રલ કમાન્ડ (મિડલ ઈસ્ટ) હેઠળ આવતી હોય છે, પરંતુ ડિયેગો ગાર્સિયા યુએસ ઈન્ડો-પેસિફિક કમાન્ડના વિસ્તારમાં આવે છે. આ હુમલાથી સાબિત થાય છે કે, હવે યુદ્ધનો વ્યાપ વધી રહ્યો છે અને ઈરાન સીધા અમેરિકાના વ્યૂહાત્મક સ્થળોને નિશાન બનાવી રહ્યું છે. આ હુમલા અંગે વ્હાઇટ હાઉસ કે બ્રિટનના સંરક્ષણ મંત્રાલય દ્વારા હજુ સુધી કોઈ સત્તાવાર ટિપ્પણી કરવામાં આવી નથી. આ ઘટનામાં ઇઝરાયલ કે અન્ય પડોશી દેશોની ભૂમિકા અથવા પ્રતિક્રિયા પર પણ દુનિયાની નજર રહેશે.

મિસાઈલની રેંજ બાબતે ભારે ચર્ચા

ઈરાનથી ડિયેગો ગાર્સિયાનું અંતર અંદાજે 4118 કિલોમીટર છે. આટલે દૂર સુધી ઈરાનની મિસાઈલ પહોંચી જાય એ મુદ્દે નિષ્ણાતોમાં ભારે ચર્ચા ઉઠી છે. ઈરાનની અત્યાર સુધીની જાણીતી મિસાઈલ ક્ષમતા આટલી લાંબી રેન્જની નથી, જે સૂચવે છે કે ઈરાને ગુપ્ત રીતે પોતાની સૈન્ય શક્તિમાં મોટો વધારો કર્યો છે.

ડિયેગો ગાર્સિયાનું મહત્વ

ડિયેગો ગાર્સિયા એ હિંદ મહાસાગરમાં આવેલો એક નાનો ટાપુ છે, જે અમેરિકા અને બ્રિટન માટે વ્યૂહાત્મક રીતે અત્યંત મહત્વનો છે. અહીંથી જ અમેરિકા એશિયા અને મિડલ ઈસ્ટ પર નજર રાખે છે અને બોમ્બર વિમાનોનું સંચાલન કરે છે.