IT ક્ષેત્રમાં અનિશ્ચિતતા અને વૈશ્વિક દબાણ વચ્ચે, ટાટા ગ્રુપની એક અગ્રણી કંપનીએ રોકાણકારોના ચહેરા પર સ્મિત લાવી દીધું છે. ટાટા કન્સલ્ટન્સી સર્વિસીસ (TCS)એ તેના ત્રીજા ક્વાર્ટરના પરિણામો જાહેર કર્યા છે, જેને બજારમાં ડબલ ધમાકો કહેવામાં આવી રહ્યો છે. નફામાં થોડો ઘટાડો થયો હોવા છતાં, TCSએ તેના શેરધારકોને પ્રતિ શેર રૂ. 57ના ડિવિડન્ડની જાહેરાત કરીને એક મોટી ભેટ આપી છે. આ નિર્ણય કંપનીના મજબૂત રોકડ પ્રવાહ અને શેરધારકો-મૈત્રીપૂર્ણ અભિગમને સ્પષ્ટપણે પ્રતિબિંબિત કરે છે.

૧૨ જાન્યુઆરીના રોજ યોજાયેલી તેની બોર્ડ મીટિંગમાં, TCSએ બે ડિવિડન્ડને મંજૂરી આપી હતી. જેમાં રૂ.૧૧ પ્રતિ શેરનો ત્રીજો વચગાળાનો ડિવિડન્ડ અને રૂ.૪૬ પ્રતિ શેરનો સ્પેશિયલ ડિવિડન્ડ. આનો અર્થ એ થયો કે રોકાણકારોને એકસાથે બે લાભ મળશે. આ જાહેરાત બાદ, બજારમાં પણ સકારાત્મક વલણ જોવા મળ્યું અને ટ્રેડિંગ દિવસના અંત સુધીમાં, TCSના શેર ૦.૮૬ ટકા વધીને રૂ.૩,૨૩૫.૭૦ પર બંધ થયા. IT શેરોમાં મંદીની વચ્ચે આ મજબૂતાઈ રોકાણકારોના વિશ્વાસને દર્શાવે છે.

કોને ડિવિડન્ડ મળશે?

ડિવિડન્ડ ફક્ત એવા રોકાણકારોને જ મળશે જેમના નામ રેકોર્ડ ડેટ પર કંપનીના રજિસ્ટરમાં નોંધાયેલા હશે. TCSએ ડિવિડન્ડ માટે રેકોર્ડ તારીખ શનિવાર, 17 જાન્યુઆરી, 2026 નક્કી કરી છે. શેરબજાર સેટલમેન્ટ T+1 પર આધારિત હોવાથી, આ ડિવિડન્ડ મેળવવા માંગતા રોકાણકારોએ શુક્રવાર, 16 જાન્યુઆરી સુધીમાં તેમના ડીમેટ ખાતામાં TCS શેર રાખવા પડશે. કંપનીએ એ પણ સ્પષ્ટ કર્યું છે કે ડિવિડન્ડની રકમ 3 ફેબ્રુઆરી, 2026 સુધીમાં રોકાણકારોના ખાતામાં ટ્રાન્સફર કરવામાં આવશે.

TCS ત્રિમાસિક પરિણામો

કંપનીના ત્રિમાસિક પરિણામો પર નજર કરીએ તો ઓક્ટોબર-ડિસેમ્બર 2025 ક્વાર્ટરમાં TCSનો ચોખ્ખો નફો વાર્ષિક ધોરણે 13.8 ટકા ઘટીને રૂ.10,720 કરોડ થયો છે, જે ગયા વર્ષના સમાન ક્વાર્ટરમાં રૂ.12,444 કરોડ હતો. જોકે, ઓપરેટિંગ આવક 4.8 ટકા વધીને રૂ.67,087 કરોડ થઈ ગઈ છે. કંપનીએ સ્પષ્ટતા કરી કે નફામાં આ ઘટાડો કોઈ વ્યવસાયિક નબળાઈને કારણે નથી, પરંતુ ભારતમાં લાગુ કરાયેલા નવા શ્રમ સંહિતાના પ્રતિભાવમાં કરવામાં આવેલી વધારાની નાણાકીય જોગવાઈઓનું પરિણામ છે.