રાજકોટ, લોધિકા અને પડધરી તાલુકાના ૧૮૦ ગામોનું વિશાળ કાર્યક્ષેત્ર ધરાવતા સૌરાષ્ટ્રના સૌથી મોટા એવા રાજકોટ માર્કેટ યાર્ડના શાકભાજી વિભાગમાં આજથી મહારાષ્ટ્રના સંગમનેર ખાતેથી ટમેટા અને ચેન્નાઇથી લીંબુની આવક શરૂ થઇ છે. કાળઝાળ ગરમી વચ્ચે લીંબુ અને ટમેટાની ધૂમ ડિમાન્ડ હોવા છતાં સ્થાનિક આવક પર્યાપ્ત ન થતા હવે આયાત શરૂ કરાઇ છે.

વિશેષમાં યાર્ડના વેપારી વર્તુળોએ જણાવ્યું હતું કે આજે મહારાષ્ટ્રના સંગમનેરથી ટમેટાના ત્રણ ટ્રકની આવક થઇ હતી, તદઉપરાંત કર્ણાટકના બેંગ્લોર ખાતેથી ટમેટાની આવક થઇ રહી છે. આજની હરાજીમાં પ્રતિ કિલોનો ભાવ રૂ.૨૦થી ૩૦ સુધી રહ્યો હતો.

ચેન્નાઇથી કોલ્ડ સ્ટોરેજના લીંબુની આવક શરૂ થઇ

જ્યારે ચેન્નાઇથી કોલ્ડ સ્ટોરેજના લીંબુની આવક શરૂ થઇ છે, સ્થાનિક આવક પણ યથાવત છે પરંતુ ડિમાન્ડ વધતા આયાત શરૂ કરાઇ છે, હાલ યાર્ડની હરરાજીમાં લીંબુ રૂ.૧૫૦થી ૨૦૦ના ભાવે વેંચાઇ રહ્યા છે.

બેડી યાર્ડમાં પ્રિમોન્સૂન કામગીરી શરૂ

ઘઉં અને મસાલાની સીઝન હવે પૂર્ણ થવામાં છે ત્યારે રાજકોટના મુખ્ય બેડી માર્કેટ યાર્ડમાં આવકો ક્રમશ: ઘટવા લાગી છે. દરમિયાન તા.૩થી ૧૧ મે દરમિયાન પ્રિ મોન્સૂન એક્ટિવિટી અંતર્ગત વરસાદની શકયતા હોય બેડી યાર્ડમાં હાલથી જ પ્રિમોન્સૂન કામગીરી શરૂ કરવામાં આવી છે. હવે ઉનાળુ પાકની આવકો શરૂ ન થાય ત્યાં સુધી પખવાડીયું ઓફ સીઝન રહેશે.