યુનાઇટેડ સ્ટેટ્સ સેન્ટ્રલ કમાન્ડ (સેન્ટકોમ)ના કમાન્ડર જનરલ માઇકલ કુરિલાએ પાકિસ્તાનને 'આતંકવાદ વિરોધી કામગીરીમાં શાનદાર સાથીદાર' ગણાવ્યું છે. તેમણે આઈએસઆઈએસ-ખોરાસન સામેની કામગીરીમાં ઇસ્લામાબાદની ભૂમિકા પર પણ પ્રકાશ પાડ્યો છે. જનરલ માઇકલ કુરિલાએ યુએસ સંસદમાં હાઉસ આર્મ્ડ સર્વિસીસ કમિટીની સુનાવણી દરમિયાન પાકિસ્તાનના વખાણ કર્યા હતા. એપ્રિલમાં પહેલગામ આતંકવાદી હુમલા પછી ભારતે પાકિસ્તાનને રાજદ્વારી રીતે અલગ પાડવા માટે વૈશ્વિક સ્તરે લોબિંગ કર્યું છે, ત્યારે ટોચના યુએસ લશ્કરી અધિકારીનું આ નિવેદન હલચલ મચાવે તેવી શક્યતા છે.

જનરલ કુરિલાએ પાકિસ્તાન વિશે કહ્યું, 'તે હાલમાં આતંકવાદ સામે લડી રહ્યું છે, અને આતંકવાદ વિરોધી કાર્યવાહીમાં શાનદાર સાથીદાર રહ્યું છે.' યુએસ સંસદની આર્મ્ડ સર્વિસીસ કમિટી સમક્ષ જુબાની આપતા, જનરલ કુરિલાએ ભારત અને પાકિસ્તાન બંને સાથે વ્યૂહાત્મક સંબંધો જાળવવાની ભારપૂર્વક હિમાયત કરી અને ભાર મૂક્યો કે અમેરિકાએ તેના દક્ષિણ એશિયાને શૂન્ય-સમ લેન્સ (એક પક્ષનો ફાયદો, બીજા પક્ષનું નુકસાન) દ્વારા ન જોવું જોઈએ.

તેમણે કહ્યું, 'આપણે પાકિસ્તાન અને ભારત સાથે સંબંધો બનાવવાની જરૂર છે. હું માનતો નથી કે જો આપણા ભારત સાથે સંબંધો હોય, તો આપણે પાકિસ્તાન સાથે સંબંધો રાખી શકતા નથી. આપણે સકારાત્મકતા માટે સંબંધોની યોગ્યતા જોવી જોઈએ. કુરિલાની ટિપ્પણી ભારત દ્વારા સરહદ પાર આતંકવાદને ટેકો આપવા માટે પાકિસ્તાનને જવાબદાર ઠેરવવાના વધતા રાજદ્વારી પ્રયાસોની પૃષ્ઠભૂમિ સામે આવી છે. 22 એપ્રિલના રોજ પહેલગામ આતંકવાદી હુમલામાં 26 લોકોના મોત થયા બાદ, ભારતે 7મેના રોજ પાકિસ્તાન અને પાકિસ્તાન કબજા હેઠળના કાશ્મીરમાં આતંકવાદી માળખા પર સચોટ હુમલા કર્યા. બંને દેશોના ડીજીએમઓ વચ્ચે કરાર થયા બાદ 10 મેના રોજ લશ્કરી તણાવ સમાપ્ત થયો.

વિદેશ પ્રધાન એસ જયશંકરે વારંવાર ભાર મૂક્યો છે કે આતંકવાદના પીડિતો અને ગુનેગારોની સમાનતા કરી શકાતી નથી. કુરિલાએ આઈએસઆઈએસ-ખોરાસન સામે પાકિસ્તાનના લશ્કરી પ્રયાસોની પ્રશંસા કરી. પાકિસ્તાની આર્મી ચીફ જનરલ અસીમ મુનીરનું નામ લેતા, તેમણે કહ્યું કે ઇસ્લામાબાદે આઈએસઆઈએસ લડવૈયાઓને નિશાન બનાવવા માટે અફઘાનિસ્તાન-પાકિસ્તાન સરહદ પર ડઝનબંધ કાર્યવાહી કરી છે. કુરિલાએ જણાવ્યું હતું કે અફઘાનિસ્તાનથી કાર્યરત આઈએસઆઈએસ-ખોરાસન, અમેરિકાની ધરતી સહિત વિશ્વભરમાં હુમલાઓ કરતા સૌથી સક્રિય આતંકવાદી જૂથોમાંનું એક છે.

તેમણે કહ્યું, 'પાકિસ્તાન સાથેની અભૂતપૂર્વ ભાગીદારી દ્વારા, અમેરિકન સૈનિકોએ આઈએસઆઈએસ-ખોરાસન પર હુમલો કર્યો અને ડઝનબંધ આતંકવાદીઓને મારી નાખ્યા. પાકિસ્તાન દ્વારા પૂરી પાડવામાં આવેલી ગુપ્ત માહિતીના કારણે, અમે આઈએસઆઈએસ-ખોરાસનના ઓછામાં ઓછા પાંચ મુખ્ય કમાન્ડરોને પકડી શક્યા.' પકડાયેલા આઈએસઆઈએસ-ખોરાસન કમાન્ડરોમાં, કુરિલાએ મોહમ્મદ શરીફુલ્લાહ ઉર્ફે ઝફરનો ઉલ્લેખ કર્યો, જે 2021ના કાબુલ એરપોર્ટ આત્મઘાતી બોમ્બ વિસ્ફોટમાં કથિત રીતે સામેલ હતો. જેમાં 13 અમેરિકન લશ્કરી કર્મચારીઓ અને 160થી વધુ નાગરિકો માર્યા ગયા હતા. જનરલ કુરિલાએ કહ્યું કે મોહમ્મદ શરીફુલ્લાહ ઉર્ફે ઝફરની ધરપકડ પછી મુનીર (પાકિસ્તાની સેના પ્રમુખ) મને ફોન કરનાર પ્રથમ વ્યક્તિ હતા. તેમણે મને કહ્યું કે મેં તેને પકડી લીધો છે, હું તેને અમેરિકા પરત મોકલવા તૈયાર છું. પ્લીઝ તમારા સંરક્ષણ સચિવ અને રાષ્ટ્રપતિને આ વિશે જણાવો.'

જનરલ કુરિલાએ આતંકવાદને કારણે પાકિસ્તાનમાં થયેલા માનવ નુકસાન વિશે પણ વાત કરી અને ખુલાસો કર્યો કે 2024ની શરૂઆતથી દેશમાં 1,000થી વધુ આતંકવાદી હુમલાઓ થયા છે, જેમાં લગભગ 700 સુરક્ષા કર્મચારીઓ અને 2,500 નાગરિકોના મોત થયા છે. કુરિલાની આ ટિપ્પણી ગયા મહિને ભારત અને પાકિસ્તાન વચ્ચે લશ્કરી મુકાબલા પછી યુદ્ધવિરામને સરળ બનાવવામાં અમેરિકાની મુખ્ય ભૂમિકા હોવાના દાવાઓ પછી આવી છે. રાષ્ટ્રપતિ ડોનાલ્ડ ટ્રમ્પે અનેક વખત ભારત અને પાકિસ્તાન વચ્ચે યુદ્ધવિરામમાં મધ્યસ્થી કરવાનો શ્રેય લીધો છે, જોકે તેમની ટિપ્પણીઓથી નવી દિલ્હીમાં રોષ ફેલાયો છે. ભારતે અનેક વખત પાકિસ્તાન સાથે યુદ્ધવિરામમાં મધ્યસ્થી કરવાના અમેરિકાના દાવાઓને નકારી કાઢ્યા છે.

જયરામ રમેશે આર્મી ડે પર પાક.ને યુએસના આમંત્રણ પર સવાલ ઉઠાવ્યા

પાકિસ્તાનના આર્મી ચીફ અસીમ મુનીર અમેરિકા જઈ રહ્યા છે. તેઓ 14 જૂને વોશિંગ્ટન ડીસીમાં યુએસ આર્મીની 250મી વર્ષગાંઠ નિમિત્તે આયોજિત સમારોહમાં ભાગ લેશે. કોંગ્રેસના નેતા જયરામ રમેશે હવે સોશિયલ મીડિયા હેન્ડલ એક્સ પર પાકિસ્તાન આર્મી ચીફની અમેરિકા મુલાકાત અંગે પોસ્ટ કહ્યું કે અહેવાલ છે કે પાકિસ્તાની આર્મી ચીફ જનરલ અસીમ મુનીરને અમેરિકાના આર્મી ડે નિમિત્તે વોશિંગ્ટન ડીસીમાં આયોજિત કાર્યક્રમમાં આમંત્રણ આપવામાં આવ્યું છે. આ સમાચાર ભારત માટે રાજદ્વારી અને વ્યૂહાત્મક રીતે મોટો આંચકો છે. અસીમ મુનીર અંગે જયરામ રમેશે કહ્યું, આ એ જ વ્યક્તિ છે જેણે પહેલગામ આતંકવાદી હુમલા પહેલા ઉશ્કેરણીજનક ભાષાનો ઉપયોગ કર્યો હતો - પ્રશ્ન એ થાય છે કે અમેરિકાનો ઈરાદો શું છે?