સંયુક્ત આરબ અમીરાતએ યમનમાં તૈનાત તેના બાકીના લશ્કરી એકમોને પાછા ખેંચવાનો નિર્ણય લીધો છે. યમનમાં લશ્કરી કાર્યવાહીને લઈને સાઉદી અરેબિયા સાથે વધતા તણાવ વચ્ચે આ પગલું લેવામાં આવ્યું છે. યુએઈના સંરક્ષણ મંત્રાલયે એક નિવેદનમાં જણાવ્યું હતું કે તાજેતરના વિકાસ અને તેમના આતંકવાદ વિરોધી કામગીરીની સુરક્ષા અને અસરકારકતા પર સંભવિત અસરને ધ્યાનમાં રાખીને આ નિર્ણય સ્વૈચ્છિક રીતે લેવામાં આવ્યો છે.

સાઉદીની આગેવાની હેઠળના ગઠબંધન દળોએ યમનના બંદર શહેર મુકલ્લા પર ભારે બોમ્બમારો કર્યો. જોકે, હુમલાનું લક્ષ્ય ઈરાન સમર્થિત હુતી બળવાખોરો નહોતા, પરંતુ સાઉદી અરેબિયાના નજીકના સાથી, સંયુક્ત આરબ અમીરાત (યુએઈ) દ્વારા મોકલવામાં આવેલા શસ્ત્રોનો જથ્થો હતો. આ લશ્કરી કાર્યવાહીએ બે ખાડી દેશો વચ્ચેના મતભેદોને જાહેરમાં ઉજાગર કર્યા છે અને આ ક્ષેત્રમાં નવા યુદ્ધનું જોખમ ઊભું કર્યું છે.

સાઉદી જેટ્સે હુમલા પહેલા નાગરિકોને વિસ્તાર ખાલી કરવાની ચેતવણી આપી હતી અને પછી શસ્ત્રોનો ભંડાર નાશ કર્યો હતો. તરત જ, સાઉદી સમર્થિત યેમેની પ્રેસિડેન્શિયલ કાઉન્સિલએ યુએઈ સાથેનો પોતાનો સુરક્ષા કરાર રદ કર્યો અને અમીરાત દળોને 24 કલાકની અંદર યમન છોડી દેવા માટે કડક અલ્ટીમેટમ આપ્યું.

સાઉદી અરેબિયા માટે, અલગતાવાદીઓને સશસ્ત્ર બનાવવું એ લાલ રેખા હતી જે પાર કરવા માટે અસ્વીકાર્ય હતી. તાજેતરના અઠવાડિયામાં, એસટીસીએ યમનના તેલ સમૃદ્ધ પ્રાંતો હદ્રામૌત અને માહરાને કબજે કરી લીધા છે, જે સાઉદી અરેબિયા અને ઓમાનની સરહદે છે. રિયાધ આને તેની રાષ્ટ્રીય સુરક્ષા માટે સીધો ખતરો માને છે. દરમિયાન, યુએઈ ના વિદેશ મંત્રાલયે આ આરોપોને સ્પષ્ટપણે નકારી કાઢ્યા છે.

જહાજોમાં કોઈ શસ્ત્રો નહોતા: સાઉદી અરેબિયાની સ્પષ્ટતા

અબુ ધાબીનું કહેવું છે કે જહાજોમાં કોઈ શસ્ત્રો નહોતા પરંતુ યમનમાં યુએઈના પોતાના આતંકવાદ વિરોધી એકમ દ્વારા ઉપયોગ માટે બનાવાયેલ વાહનો હતા. યુએઈએ સાઉદી અરેબિયાના સાર્વભૌમત્વનું સંપૂર્ણ સન્માન કરવાની પ્રતિજ્ઞા લીધી છે અને ભારપૂર્વક જણાવ્યું છે કે તે સાઉદી અરેબિયાને અસ્થિર કરતી કોઈપણ પ્રવૃત્તિઓમાં સામેલ નથી. વધતા તણાવને ધ્યાનમાં રાખીને, યુએઈ એ જાહેરાત કરી છે કે તે યમનમાંથી તેના બાકીના દળોને પાછા ખેંચી લેશે.

વિવાદનું ઇઝરાયલ સાથે કનેક્શન

મધ્ય પૂર્વના નિષ્ણાતો માને છે કે આ તણાવ ફક્ત પ્રાદેશિક રાજકારણ દ્વારા જ નહીં પરંતુ વ્યાપક વ્યૂહાત્મક હિતો દ્વારા પણ પ્રેરિત છે. 2020 માં અબ્રાહમ કરાર હેઠળ યુએઈએ ઇઝરાયલ સાથેના સંબંધો સામાન્ય કર્યા. એવા અહેવાલો છે કે ઇઝરાયલ લાલ સમુદ્ર અને બાબ અલ-મંડેબ જેવા મહત્વપૂર્ણ દરિયાઈ માર્ગો પર પોતાની પકડ મજબૂત કરવા માટે દક્ષિણ યમનમાં એક સ્વતંત્ર રાજ્યને માન્યતા આપવાનું વિચારી શકે છે. સાઉદી અરેબિયા એકીકૃત યમન ઇચ્છે છે, જ્યારે યુએઈ દક્ષિણ યમનમાં સ્વતંત્રતા મેળવવા માંગતા જૂથોનો પક્ષ લે છે. આ અલગ અલગ દ્રષ્ટિકોણ હવે મોટા લશ્કરી અને રાજદ્વારી મુકાબલામાં પરિણમ્યા છે.

યુએઈના બે સશસ્ત્ર જહાજો પરવાનગી વિના મુકલ્લા પહોંચ્યા હોવાનો સાઉદી અરેબિયાનો આરોપ

સાઉદી અરેબિયાએ આરોપ લગાવ્યો હતો કે યુએઈના ફુજૈરાહ બંદરથી બે જહાજો પરવાનગી વિના મુકલ્લા પહોંચ્યા હતા. આ જહાજોએ તેમની ટ્રેકિંગ સિસ્ટમ બંધ કરી દીધી હતી. રિયાધના જણાવ્યા અનુસાર, આ જહાજો સધર્ન ટ્રાન્ઝિશનલ કાઉન્સિલ અલગતાવાદીઓ માટે શસ્ત્રો અને સશસ્ત્ર વાહનોનો મોટો જથ્થો લઈ જઈ રહ્યા હતા