મહારાષ્ટ્રના પાલઘર જિલ્લામાંથી સરકારી આરોગ્ય વ્યવસ્થાને ઉજાગર કરતી એક ઘટના પ્રકાશમાં આવી છે. ફરી એકવાર સરકારી તંત્રની બેદરકારી સામે આવી છે. જોગલવાડી ગામના એક આદિવાસી મજૂરને તેની મૃત નવજાત પુત્રીના મૃતદેહને પ્લાસ્ટિકની થેલીમાં લપેટીને બસમાં 90 કિમી દૂર તેના ગામ લઈ જવો પડ્યો.

આદિવાસી મજૂરનો આરોપ છે કે નાસિક સિવિલ હોસ્પિટલે મૃતદેહને લઈ જવા માટે એમ્બ્યુલન્સ આપવાનો ઇનકાર કર્યો હતો. કાટકરી આદિવાસી સમુદાયમાંથી આવતા સખારામ કવરે કહ્યું, આરોગ્ય વ્યવસ્થાની બેદરકારી અને ઉદાસીનતાને કારણે મેં મારી પુત્રી ગુમાવી દીધી.

સખારામ અને તેની પત્ની અવિતા દૈનિક વેતન મજૂર તરીકે કામ કરીને ગુજરાન ચલાવે છે. તાજેતરમાં તેઓ બદલાપુર (થાણે) માં ઈંટના ભઠ્ઠામાં કામ કરતા હતા. સખારામ અને તેની પત્ની અવિતા સુરક્ષિત પ્રસૂતિ માટે તેમના ગામ પાછા ફર્યા. જ્યારે ૧૧ જૂને પ્રસૂતિ પીડા શરૂ થઈ, ત્યારે સરકારી એમ્બ્યુલન્સ ન આવી અને અંતે અનેક હોસ્પિટલોમાં ગયા પછી, ૧૨ જૂનની રાત્રે નાસિકમાં બાળક મૃત હાલતમાં જન્મ્યું. બીજા દિવસે સવારે હોસ્પિટલે મૃતદેહ સોંપ્યો, પરંતુ પરિવહન માટે કોઈ વ્યવસ્થા કરી નહીં.

સખરામે કહ્યું, મેં ૨૦ રૂપિયામાં બેગ ખરીદી, બાળકને કપડામાં લપેટીને બસ દ્વારા ગામ પાછો ફર્યો.' તેમણે કહ્યું કે જ્યારે તેઓ ૧૩ જૂને પોતાની પત્નીને ઘરે લાવવા માટે નાસિક પાછા ફર્યા, ત્યારે પણ એમ્બ્યુલન્સ આપવામાં આવી ન હતી. આરોગ્ય અધિકારીઓએ આરોપોને ફગાવી દીધા અને કહ્યું કે સખરામે પોતે એમ્બ્યુલન્સ લેવાનો ઇનકાર કર્યો હતો અને હોસ્પિટલે જરૂરી બધી મદદ પૂરી પાડી હતી.