વિશ્વની સૌથી મૂલ્યવાન કંપની એનવીડિયાએ ભારતમાં કામ કરતા તેના કર્મચારીઓની મોટી સંખ્યાને સ્ટોક બોનસ આપ્યું છે. એનવીડિયાના ભારતમાં આશરે 10,000 કર્મચારીઓ છે અને તેમાંથી મોટાભાગનાને આ બોનસ મળ્યું છે. આ રકમ રૂ. પાંચ લાખથી એક કરોડ સુધીની છે. આ બોનસ આગામી ચાર વર્ષમાં ધીમે ધીમે વહેંચવામાં આવશે. એનવીડિયા માર્કેટ કેપ દ્વારા વિશ્વની સૌથી મૂલ્યવાન કંપની છે, જેનું મૂલ્ય હાલમાં 4.776 ટ્રિલિયન ડોલર છે.

એક અહેવાલ મુજબ, એનવિડિયાના ભારતીય કર્મચારીઓને સીઇઓ જેન્સન હોંગ તરફથી એક વખતની ખાસ સ્ટોક ગ્રાન્ટ મળી હતી. આ માહિતી યુએસ સ્થિત પગાર ટ્રેકર સીક્સફિગરના ડેટા પર આધારિત છે. જેન્સન સ્પેશિયલ ગ્રાન્ટ 2024માં રજૂ કરવામાં આવી હતી. આ એક વખતનો સ્ટોક એવોર્ડ છે જે કર્મચારીઓને તેમના પ્રારંભિક પ્રતિબંધિત સ્ટોક યુનિટ્સના વધારાના 25 ટકા આપે છે.

આ રકમ ચાર વર્ષ દરમિયાન કર્મચારીઓને આપવામાં આવશે. આ મૂલ્ય સ્થાનિક ચલણમાં નિર્ધારિત કરવામાં આવે છે અને એનવીડિયા શેરના સરેરાશ ભાવ 898.2 ડોલરના આધારે પ્રતિ ડોલર 82.9 રૂપિયાના વિનિમય દરે રૂપાંતરિત થાય છે. 6.25 ટકાનો પ્રથમ હપ્તો 18 સપ્ટેમ્બર, 2024થી શરૂ થાય છે. ત્યારબાદના હપ્તાઓ 2028 સુધી ત્રિમાસિક ધોરણે ચૂકવવામાં આવશે.

એક મધ્યમ સ્તરના કર્મચારીને ખાસ ગ્રાન્ટ તરીકે રૂ.5.3 લાખના આઠ વધારાના આરએસયુ મળ્યા. આ રૂ.21.5 લાખની વાર્ષિક ઇક્વિટી ગ્રાન્ટ ઉપરાંત છે. આનાથી કર્મચારીની કુલ ઇક્વિટી 156 આરએસયુ થઈ ગઈ છે, જે ગયા વર્ષે એપ્રિલ સુધીમાં રૂ.1.2 કરોડથી વધુ મૂલ્યની છે.

અહેવાલો અનુસાર, એનવીડિયા ઇન્ડિયા ખાતે સ્ટોક-આધારિત પગાર કુલ વળતરના 50થી 75 ટકા સુધીનો છે. ટોચના ઇજનેરો વાર્ષિક બે કરોડથી ત્રણ કરોડ રૂપિયાની વચ્ચે કમાય શકે છે. આઇસી6-સ્તરનો સોફ્ટવેર એન્જિનિયર વાર્ષિક રૂ.1.8 કરોડ સુધી કમાય શકે છે. જોકે, એન્ટ્રી લેવલ પર વળતર ઓછું છે. સિક્સફિગર મુજબ, આઇસીવનની ભૂમિકાઓ રૂ.10 લાખથી રૂ.22 લાખ સુધીની છે, જ્યારે આઇસીટુની ભૂમિકા રૂ.23 લાખથી રૂ.32 લાખ સુધીની છે. મધ્યમ સ્તરના આઇસીથ્રીનો પગાર રૂ.27 લાખથી રૂ.51 લાખ સુધીનો છે, જ્યારે ટોચના પ્રદર્શન કરનારાઓ રૂ.85 લાખ સુધીની કમાણી કરી શકે છે.