હીટવેવમાંથી મુક્ત થયા બાદ તુરંત જ હવે તોફાની પવન માટેની ચેતવણી હવામાન વિભાગ દ્વારા આપવામાં આવી છે. હવામાન વિભાગના જણાવ્યા મુજબ સૌરાષ્ટ્ર-કચ્છ અને ઉત્તર ગુજરાતના આજથી પ્રતિ કલાકના 20 થી 30 કીલોમીટરની ઝડપે ધૂળની ડમરી ઉડાડતા તોફાની પવનો ફુકાશે અને આ માટે આજે અને આવતીકાલ એમ બે દિવસનું યલો એલર્ટ જાહેર કરવામાં આવ્યું છે.઼

ઈસ્ટના મોટાભાગના રાજ્યોમાં પવનની ગતિ વધુ તેજ બનશે

જોકે ઇન્ડિયન મેટ્રોલોજીકલ ડિપાર્ટમેન્ટ એ તોફાની પવનનું આવું એલર્ટ આગામી પાંચ થી સાત દિવસ માટે જાહેર કર્યું છે. રાજસ્થાન બિહાર જમ્મુ કશ્મીર લદાખ હિમાચલ પ્રદેશ સહિતના અનેક રાજ્યોમાં પ્રતિ કલાકના 40 થી 50 કિલોમીટરની ઝડપે અને અમુક તબક્કે તે વધીને 70 કીલોમીટરની ઝડપે પવન ફૂંકાશે તેવી ચેતવણી આપવામાં આવી છે, હવામાન વિભાગના જણાવ્યા મુજબ નોર્થ ઈસ્ટના મોટાભાગના રાજ્યોમાં પવનની ગતિ વધુ તેજ બનશે.

દેશભરમાં ચોમાસુ સારું રહેશે

ગ્રામ્ય વિસ્તારના લોકો આ બાબતને ચૈત્રી દનૈયા તપવાની ગણાવી રહ્યા છે. હવામાન ખાતાના જાણકારો અને ગ્રામ્ય વિસ્તારના લોકોના જણાવ્યા મુજબ ગઈકાલથી જ ચૈત્રી દનૈયા તપવાનું શરૂ થઈ ગયું છે. ચૈત્ર વદ પાંચમ થી શરૂઆત થઈ ગઈ છે અને પ્રથમ દનૈયુ ખૂબ સારું રહ્યું છે. દેશભરમાં ચોમાસુ સારું રહેશે અને સામાન્યથી વધુ વરસાદ પડશે તેવી આગાહી સ્કાયમેટ નામની ખાનગી સંસ્થા અને હવામાન વિભાગ દ્વારા કરવામાં આવી છે. પરંતુ ગ્રામ્ય વિસ્તારના લોકોના જણાવ્યા મુજબ જો નવમાંથી પાંચ ચૈત્રી દરમિયાન સારા તપે તો ચોમાસું સારું જશે.

તાપમાન ત્રણથી ચાર ડિગ્રીનો વધારો થશે

હિટવેવ પૂરો થયા પછી મહત્તમ તાપમાનમાં ઘટાડો શરૂ થયો છે અને હજુ ત્રણ દિવસ તાપમાન ઘટશે. પરંતુ ત્યાર પછી તેમાં ક્રમશઃ ત્રણથી ચાર ડિગ્રીનો વધારો થશે, શુક્રવારે રાજકોટમાં 42.8 સુરેન્દ્રનગરમાં 42.5 ભાવનગરમાં 41.2 કંડલામાં 43.8 ભુજમાં 41 વડોદરામાં 40.6 વલ્લભ વિદ્યાનગરમાં 40.3 ગાંધીનગરમાં 41.6 ડીસામાં 41.6 અને અમદાવાદમાં 42.6 ડિગ્રી મહત્તમ તાપમાન નોંધાયું હતું