રાજકોટ શહેરના રૈયા રોડ પર આવેલા શીતલ પાર્ક વિસ્તારમાં પૂર્વ પતિ દ્વારા છૂટાછેડા લીધેલી પત્નીના ઘરે જઈને બેફામ ગાળાગાળી કરવા અને પરિવાર સહિત તમામને જાનથી મારી નાખવાની ધમકી આપવાનો સનસનાટીભર્યો કિસ્સો પ્રકાશમાં આવ્યો છે. આ મામલે પીડિત મહિલાએ ગાંધીગ્રામ પોલીસ સ્ટેશનમાં ફરિયાદ નોંધાવતા પોલીસે સીસીટીવી ફૂટેજના આધારે આરોપીની શોધખોળ તેજ કરી છે.

View this post on Instagram

A post shared by Aajkaal (@aajkaaldaily)

ફરિયાદી અફસાનાબેન ચૌહાણ દ્વારા નોંધાવવામાં આવેલી વિગતો મુજબ, તેમના પ્રથમ લગ્ન વર્ષ 2015માં થયા હતા, જેનાથી તેમને સંતાનમાં એક દીકરો અને એક દીકરી છે. પ્રથમ પતિ સાથે અણબનાવ બનતા વર્ષ 2023માં કાયદેસરના છૂટાછેડા થયા હતા. ત્યારબાદ, ગત 5 ફેબ્રુઆરી 2025ના રોજ અફસાનાબેને અલ્તાફ બસીર ખિયાણી સાથે કોર્ટ મેરેજ કર્યા હતા. જોકે, આ બીજા લગ્નજીવનમાં પણ સુખ નસીબ થયું નહોતું. લગ્નના થોડા જ સમયમાં અલ્તાફ સાથે રોજબરોજના ઝઘડા શરૂ થતા, માત્ર 6 મહિનાના ટૂંકા ગાળામાં જ અફસાનાબેને અલ્તાફ સાથે પણ છેડો ફાડી નાખ્યો હતો અને છૂટાછેડા લઈ લીધા હતા.

નંબર પ્લેટ વગરની થાર ગાડીમાં આવી મચાવ્યો આતંક

ગઈકાલે સાંજના પાંચ વાગ્યાના અરસામાં અફસાનાબેન પોતાના ઘરે હતા, ત્યારે અલ્તાફે ફોન કરીને પૂછ્યું હતું કે "તું શું કરે છે?". અફસાનાબેને જવાબ આપ્યો કે તેઓ ઘરની અંદર જ છે. આટલી વાતના થોડી જ વારમાં અલ્તાફ ખિયાણી કાળા કલરની નંબર પ્લેટ વગરની થાર ગાડી લઈને અફસાનાબેનના ઘરે પહોંચી ગયો હતો. અલ્તાફને ઘર પાસે જોઈ અફસાનાબેન, તેમના માતા-પિતા, બહેન અને ભાભી ઘરની બહાર આવ્યા હતા.

પરિવાર સામે બેફામ ગાળાગાળી અને ધમકી

જ્યારે અફસાનાબેનના પિતાએ અલ્તાફને અટકાવતા કહ્યું કે, "તારે હવે અમારે ઘરે આવવાનું નહીં, અહીં કેમ આવ્યો છે?", ત્યારે અલ્તાફ ઉશ્કેરાઈ ગયો હતો. તેણે શેરીની વચ્ચે જ બેફામ ગાળાગાળી શરૂ કરી દીધી હતી. અલ્તાફે જાહેર મર્યાદા નેવે મૂકીને અફસાનાબેનને ધમકી આપી હતી કે, "જો તું ફરી મારી સાથે રહેવા નહીં આવે, તો હું તને, તારા મા-બાપ અને તારા બાળકોને જાનથી મારી નાખીશ." આ દરમિયાન અફસાનાબેનનો ભાઈ હૈદર પણ ત્યાં પહોંચ્યો હતો અને અલ્તાફને સમજાવવાનો પ્રયાસ કર્યો હતો, પરંતુ તે કોઈની વાત માનવા તૈયાર નહોતો.

પોલીસ કાર્યવાહી અને સીસીટીવી તપાસ

ભયભીત થયેલા અફસાનાબેને તાત્કાલિક ગાંધીગ્રામ પોલીસનો સંપર્ક સાધ્યો હતો. પોલીસે અલ્તાફ બસીર ખિયાણી વિરુદ્ધ આઈપીસીની સંબંધિત કલમો હેઠળ ગુનો નોંધી કાયદેસરની કાર્યવાહી હાથ ધરી છે. ઘટના સ્થળની આસપાસના સીસીટીવી ફૂટેજ ચકાસવામાં આવી રહ્યા છે જેથી આરોપી જે ગાડીમાં આવ્યો હતો તેની અને તેના લોકેશનની વધુ માહિતી મળી શકે. પૂર્વ પતિના આ હંગામાને કારણે શીતલ પાર્ક વિસ્તારમાં થોડીવાર માટે અફરાતફરીનો માહોલ સર્જાયો હતો. હાલ પોલીસ આરોપીને પકડવા માટે ચક્રો ગતિમાન કરી રહી છે.