આ મહત્વપૂર્ણ તારણ ફેનોમ ઇન્ડિયા હેલ્થ કોહોર્ટ પર આધારિત સંશોધનમાંથી સામે આવ્યું છે, જે પ્રતિષ્ઠિત જર્નલ ધ લેન્સેટમાં પ્રકાશિત થયું છે. આ અભ્યાસ દરમિયાન ભારતના 27 શહેરોમાં રહેતા 7,700થી વધુ લોકોના સ્વાસ્થ્ય ડેટાનું વિશ્લેષણ કરવામાં આવ્યું હતું. નોંધનીય બાબત એ છે કે દારૂ પીતા લોકોને ઇરાદાપૂર્વક અભ્યાસમાંથી બહાર રાખવામાં આવ્યા હતા, જેથી બિન-આલ્કોહોલિક ફેટી લીવરનું સાચું પ્રમાણ જાણી શકાય.

મેડિકલ ક્ષેત્રે હવે ફેટી લીવર રોગને એનએએફએલડીના બદલે એમએએસએલડી એટલે કે મેટાબોલિક ડિસફંક્શન-એસોસિએટેડ સ્ટીટોટિક લીવર ડિસીઝ તરીકે ઓળખવામાં આવે છે. આ નામ દર્શાવે છે કે રોગનું મુખ્ય કારણ મેટાબોલિક ગડબડ છે, જેમ કે ઇન્સ્યુલિન પ્રતિકાર, વધેલો બ્લડ સુગર, પેટની ચરબી અને સ્થૂળતા. નિષ્ણાતો મુજબ ભારતીય વસ્તી આનુવંશિક રીતે પેટની ચરબી અને ઇન્સ્યુલિન પ્રતિકાર માટે વધુ સંવેદનશીલ હોવાથી જોખમ વધારે છે.

અભ્યાસ મુજબ કુલ વસ્તીના 38.9 ટકા લોકોમાં ફેટી લીવર જોવા મળ્યું. તેમાં લિવર ફાઇબ્રોસિસ એટલે કે લીવરનું સખત થવું 1.7 ટકા લોકોમાં નોંધાયું. પરંતુ ફેટી લીવર ધરાવતા લોકોમાં આ પ્રમાણ 6.3 ટકા સુધી વધી ગયું. સ્થૂળતા અને ડાયાબિટીસ ધરાવતા લોકોમાં ફાઇબ્રોસિસનો ખતરો 8 થી 9 ટકા સુધી જોવા મળ્યો.

ડોક્ટરો કહે છે કે ફેટી લીવર સાયલેન્ટ ડીસીઝ છે, કારણ કે શરૂઆતમાં ખાસ લક્ષણો દેખાતા નથી અને સામાન્ય બ્લડ ટેસ્ટ પણ નોર્મલ આવી શકે છે. જો સમયસર ધ્યાન ન અપાય તો આ સ્થિતિ લિવર ઇન્ફ્લેમેશન, સિરોસિસ, લિવર ફેલ્યોર અને લિવર કેન્સર સુધી પહોંચી શકે છે.

સકારાત્મક બાબત એ છે કે પ્રારંભિક તબક્કામાં ફેટી લીવર ઉલટાવી શકાય છે. નિષ્ણાતો વજનમાં 7–10 ટકા ઘટાડો, સંતુલિત આહાર, ઓછી ખાંડ અને પ્રોસેસ્ડ ફૂડ, તેમજ રોજિંદી કસરતની ભલામણ કરે છે. જોખમ ધરાવતા લોકોએ અલ્ટ્રાસાઉન્ડ, બ્લડ સુગર અને લિપિડ ટેસ્ટ દ્વારા નિયમિત સ્ક્રીનિંગ કરાવવું જરૂરી ગણાવવામાં આવે છે. સ્વાસ્થ્ય નિષ્ણાતોનું માનવું છે કે વધતી જાગૃતિ અને વહેલી તપાસથી આ ઉદ્ભવતા રાષ્ટ્રીય સ્વાસ્થ્ય પડકારને નિયંત્રિત કરી શકાય છે.