જામનગરના આંગણે VYO દ્વારા દિવ્ય ‘હોલી રસિયા’ અને ફૂલ-ફાગ મહોત્સવની ભવ્ય ઉજવણી

પૂ. પા. ગો. ૧૦૮ શ્રી વ્રજરાજકુમારજી મહોદયશ્રીના પાવન સાન્નિધ્યમાં લાલપુર રોડ ખાતે હજારો વૈષ્ણવો ભક્તિરસમાં તરબોળ થયા: આગામી સમયમાં વિશાળ વ્રજધામ હવેલી અને સંકુલનું નિર્માણ થશે.

જામનગરના આંગણે વલ્લભ યુથ ઓર્ગેનાઈઝેશન (VYO) દ્વારા લાલપુર રોડ ખાતે આવેલા વ્રજધામ હવેલીના પટાંગણમાં ભવ્યાતિભવ્ય ‘હોલી રસિયા’ અને ફૂલ-ફાગ મહોત્સવનું આયોજન કરવામાં આવ્યું હતું. વૈષ્ણવાચાર્ય પૂ. પા. ગો. ૧૦૮ શ્રી વ્રજરાજકુમારજી મહોદયશ્રીના મંગલ અને પાવન સાન્નિધ્યમાં યોજાયેલા આ દિવ્ય મહોત્સવમાં જામનગરના હજારો વૈષ્ણવ ભક્તો ઉમટી પડ્યા હતા. પુષ્ટિમાર્ગીય સંપ્રદાયની પરંપરા અનુસાર, ભક્તો પ્રભુ ભક્તિમાં સંપૂર્ણપણે લીન થઈને હોલીના રસિયાના નાચગાન વચ્ચે રંગબેરંગી વિવિધ ફૂલોની વર્ષા કરી એકબીજા સાથે ફૂલ-ફાગ રમવા ઘેલા બન્યા હતા અને ‘સંગ ફૂલ ફાગ ઉત્સવ’ અંતર્ગત આ અલૌકિક ઉત્સવનો અનેરો લ્હાવો લીધો હતો.

આ ભક્તિમય કાર્યક્રમ દરમિયાન જેજે શ્રી વ્રજરાજકુમારજી મહોદયશ્રી ખાસ ઉપસ્થિત રહ્યા હતા અને પોતાના આશીર્વચન પાઠવ્યા હતા. તેમણે પોતાના મનનીય વક્તવ્યમાં જણાવ્યું હતું કે, VYO જામનગર દ્વારા પ્રતિવર્ષના ક્રમ અનુસાર આ વર્ષે પણ આટલા મોટા, દિવ્ય અને ભવ્ય હોલી રસિયા ફૂલ-ફાગ ઉત્સવનું આયોજન થયું છે, જે અત્યંત આનંદની વાત છે. વધુમાં તેમણે એક મહત્વપૂર્ણ અને હર્ષોલ્લાસભરી જાહેરાત કરતા જણાવ્યું હતું કે, આ જ પવિત્ર જગ્યા પર VYO દ્વારા ટૂંક સમયમાં જ એક વિશાળ અને ભવ્ય ‘વ્રજધામ હવેલી’નું નિર્માણ કાર્ય શરૂ થવા જઈ રહ્યું છે. આ હવેલીમાં સાક્ષાત ભગવાન શ્રીનાથજી બિરાજમાન થશે. આ સંકુલ માત્ર દર્શન પૂરતું સીમિત નહીં રહે, પરંતુ તેમાં સત્સંગ હોલ, બાળકો માટે અત્યાધુનિક પ્રી-સ્કૂલ, જ્ઞાનવર્ધક લાયબ્રેરી, ગેસ્ટહાઉસ અને અન્ય વિવિધ સામાજિક-ધાર્મિક પ્રવૃત્તિઓને સાકાર કરવામાં આવશે. આ હવેલીના નિર્માણ કાર્ય હેતુ ભૂમિદાન આપનાર દાતા, ઉદ્યોગપતિ અને જામનગર જિલ્લા પ્રભારી સુરેશભાઈ કાછડીયા તથા લીનાબેન કાછડીયાને જેજે શ્રીએ હૃદયપૂર્વક અભિનંદન પાઠવ્યા હતા. આ નવનિર્મિત સંકુલ બાળકોથી લઈને યુવાનો અને વૃદ્ધો સુધીના પ્રત્યેક હિન્દુ અને વૈષ્ણવ માટે આશીર્વાદરૂપ બની રહેશે.

સમાજ નિર્માણ અને સંસ્કાર સિંચનની દિશામાં VYO દ્વારા થઈ રહેલા કાર્યોની પ્રશંસા કરતા જેજે શ્રી મહોદયે ઉમેર્યું હતું કે, આજે જામનગરમાં ૪૦૦થી વધુ બાળકો VYO દ્વારા એજ્યુકેશન મેળવી રહ્યા છે, જ્યાં તેમને હિન્દુ ધર્મ અને ઉચ્ચ ભારતીય સંસ્કારોથી સિંચિત કરવામાં આવી રહ્યા છે. આપણું મુખ્ય લક્ષ્ય શ્રેષ્ઠ શિક્ષણ અને વિવિધ પ્રવૃત્તિઓ થકી પ્રત્યેક બાળકને એક સારો અને સાચો માનવી બનાવવાનું છે. માનવ જીવનની ફિલસૂફી સમજાવતા તેમણે માર્મિક શબ્દોમાં કહ્યું હતું કે, "આજે માણસ, માણસ બને એ જ સૌથી મોટી વાત છે. માણસની એક તરફ દેવ છે અને બીજી તરફ દાનવ છે. જો માણસ સારા સત્કર્મો કરે તો તે દેવ બની શકે છે, અને જો ખોટા કામ કરે તો તે દાનવ બની જાય છે." આપણી આવનારી ભાવિ પેઢીને સદાચારી અને ઉત્તમ માનવી બનાવવાનું આપણું ધ્યેય છે. એક શ્રેષ્ઠ, સંસ્કારી અને આદર્શ સમાજનું નિર્માણ કરવા તરફ વલ્લભ યુથ ઓર્ગેનાઈઝેશન સતત ગતિશીલ અને કાર્યરત છે.

આ દિવ્ય મહોત્સવની શોભા વધારવા માટે દેશ-વિદેશથી અનેક મહાનુભવો અને શ્રેષ્ઠીઓ વિશેષ રૂપે ઉપસ્થિત રહ્યા હતા. જેમાં સિડનીથી ખાસ પધારેલા શ્યામભાઈ મોરડ ઉપરાંત જાણીતા ઉદ્યોગપતિઓ ધીરુભાઈ શિંગાળા, મુકેશભાઈ અકબરી અને જીતુભાઈ કમાણી વગેરેએ હાજરી આપીને કાર્યક્રમની ગરિમા વધારી હતી. આ હોલી રસિયા અને ફૂલ-ફાગ ઉત્સવને સફળ બનાવવા માટે મુખ્ય દાતા (મનોરથી) તરીકે ગંગાસ્વરૂપ શારદાબેન રમેશભાઈ દોંગા, રુચિરભાઈ રમેશભાઈ દોંગા અને તેમના ધર્મપત્ની નિર્મળાબેને ઉદાર હાથે સહયોગ આપ્યો હતો. જેજે શ્રી મહોદયે આ તમામ મનોરથી પરિવાર અને વિશેષ દાતાઓને પ્રભુ સેવાના આ ઉત્તમ કાર્ય બદલ વિશેષ આશીર્વાદ અને સાધુવાદ પાઠવ્યા હતા.

કોઈ પણ મોટા ઉત્સવની સફળતા પાછળ એક મજબૂત અને સમર્પિત ટીમની મહેનત હોય છે. જામનગરના આ ઐતિહાસિક ફૂલ-ફાગ મહોત્સવના આયોજનને નિર્વિઘ્ને પાર પાડવા માટે VYO ની આયોજક ટીમની ભારે જહેમત રહી હતી. VYO જામનગરના પ્રમુખ દીપકભાઈ વૈષ્ણવ, સહ-પ્રભારી આર.પી. ઘાડિયાના માર્ગદર્શન હેઠળ આરતીબેન વૈષ્ણવ, કેવલભાઈ ગુસાણી, પ્રીતિબેન પટેલ અને ક્રિષ્ના સંસ્કાર વર્લ્ડના સક્રિય સભ્ય અરજણભાઈ સોજીત્રા સહિતના કાર્યકર્તાઓએ આયોજનમાં અવિરત સેવાઓ આપી હતી. તમામ વૈષ્ણવો માટે આ મહોત્સવ એક યાદગાર અને અવિસ્મરણીય આધ્યાત્મિક અનુભવ બની રહ્યો હતો, જેની સુવાસ જામનગરના ભક્તિમય વાતાવરણમાં લાંબા સમય સુધી મહેકતી રહેશે