ઇલોન મસ્કે જાહેરાત કરી કે તેમની એઆઇ કંપની એક્સએઆઇએ એક્સ (અગાઉનું ટ્વિટર) હસ્તગત કરી લીધું છે. આ સોદો 45 બિલિયન ડોલર (12 બિલિયન ડોલર દેવા સહિત)મા ઓલ-સ્ટોક ટ્રાન્ઝેક્શનમાં પૂર્ણ થયો છે. મસ્કે એક્સ પર પોસ્ટ કરીને કહ્યું, 'એક્સએઆઇ અને એક્સનું ભવિષ્ય એકબીજા સાથે જોડાયેલું છે. આજે, આપણે ડેટા, મોડેલ, ગણતરી, વિતરણ અને પ્રતિભાને જોડવાની દિશામાં એક મોટું પગલું ભરી રહ્યા છીએ. તેમણે એમ પણ કહ્યું કે આ મર્જર પછી, સંયુક્ત કંપનીનું કુલ મૂલ્ય 80 બિલિયન ડોલર થશે.

બે વર્ષ પહેલાં રચાયેલ, એક્સએઆઇ ઝડપથી વિશ્વની અગ્રણી એઆઇ પ્રયોગશાળાઓમાંની એક બની ગઈ છે. મસ્કે કહ્યું કે એક્સએઆઇ અને એક્સનું ભવિષ્ય એકબીજા સાથે જોડાયેલું છે. આજે, અમે સત્તાવાર રીતે ડેટા, મોડેલ, ગણતરી, વિતરણ અને પ્રતિભાને જોડવાનું પગલું ભરીએ છીએ. આ સંયોજન એક્સએઆઇની અદ્યતન એઆઇ ક્ષમતાઓ અને કુશળતાને એક્સની વ્યાપક પહોંચ સાથે જોડીને અપાર શક્યતાઓને ખોલશે. સંયુક્ત કંપની સત્ય શોધવા અને જ્ઞાનને આગળ વધારવાના તેના મુખ્ય મિશન પ્રત્યે વફાદાર રહીને અબજો લોકોને વધુ સ્માર્ટ, વધુ અર્થપૂર્ણ અનુભવો પ્રદાન કરશે. આનાથી આપણે એક એવું પ્લેટફોર્મ બનાવી શકીશું જે ફક્ત વિશ્વને પ્રતિબિંબિત કરશે જ નહીં. પરંતુ માનવ પ્રગતિને સક્રિય રીતે વેગ આપશે.

એક્સએઆઇ, જે 2023 મા લોન્ચ કરવામાં આવ્યું હતું. તેણે તાજેતરમાં 40 બિલિયન ડોલરના મૂલ્યાંકન પર રોકાણકારો પાસેથી 6 બિલિયન ડોલર એકત્ર કર્યા હતા. ફેબ્રુઆરીમાં, મસ્કે ઓપનએઆઇ ખરીદવા માટે 97.4 બિલિયન ડોલરની ઓફર કરી હતી, પરંતુ ઓપનએઆઇએ તેને નકારી કાઢી હતી. એક્સએઆઇ હવે મેગા સુપર કોમ્પ્યુટર કોલોસસ બનાવી રહ્યું છે, જે વિશ્વનું સૌથી મોટું ડેટા સેન્ટર ક્લસ્ટર હોવાનું કહેવાય છે. ફેબ્રુઆરીમાં, એક્સએઆઇએ તેનું નવું એઆઇ ચેટબોટ ગ્રોક-3 લોન્ચ કર્યું હતું, જે ઓપનએઆઇ અને ચીનની ડીપસીક જેવી કંપનીઓ સાથે સ્પર્ધા કરી રહ્યું છે.

ઉલ્લેખનીય છે કે, વર્ષ 2022 માં, મસ્કે એક્સ (ટ્વિટર)ને 44 બિલિયન ડોલરમાં ખરીદ્યું અને પછી કહ્યું, 'પક્ષી મુક્ત થઈ ગયું છે'. હવે એક્સએઆઇ અને એક્સના વિલીનીકરણ સાથે, એક્સને એઆઇ સંચાલિત સોશિયલ મીડિયા પ્લેટફોર્મ તરીકે વિકસાવવાની યોજના બનાવવામાં આવી રહી છે.