જામનગરમાં દુષ્કર્મના કેસમાં આરોપીને ૧૦ વર્ષની સખત કેદ

પંચમહાલના ડ્રાઈવરને ૨૫ હજારનો દંડ: ભોગ બનનારને ૧ લાખનું વળતર ચૂકવવા હુકમ

જામનગર જિલ્લામાં વર્ષ ૨૦૨૪માં નોંધાયેલા સગીરાના અપહરણ અને બળાત્કારના કેસમાં જામનગરની પોક્સો અદાલતે મહત્ત્વપૂર્ણ ચુકાદો આપ્યો છે. કેસની સુનાવણી દરમિયાન ભોગ બનનારની ઉંમર કાયદેસર રીતે સાબિત ન થઈ શકતાં આરોપીને પોક્સો કાયદાની કલમો હેઠળ શંકાનો લાભ આપવામાં આવ્યો હતો. જોકે, બળાત્કારનો ગુનો પુરવાર થતાં પંચમહાલ જિલ્લાના ડ્રાઈવિંગ કામ સાથે સંકળાયેલા આરોપી ધર્મેશ નાયકને ૧૦ વર્ષની સખત કેદ અને રૂ.૨૫ હજારના દંડની સજા ફટકારવામાં આવી છે. આ ઉપરાંત ભોગ બનનારને સરકારની વળતર યોજના હેઠળ રૂ.૧ લાખનું વળતર ચૂકવવા પણ અદાલતે હુકમ કર્યો છે.

આ કેસની વિગતો મુજબ, જામનગર જિલ્લામાં ૧૩ વર્ષ અને ત્રણ માસની હોવાનું જણાવાયેલી એક સગીરાનું તા.૩ માર્ચ, ૨૦૨૪ના રોજ બદકામના ઇરાદે અપહરણ કરવામાં આવ્યું હોવાની ફરિયાદ નોંધાઈ હતી. તા.૧૦ એપ્રિલ, ૨૦૨૪ના રોજ ભોગ બનનાર બાળા મળી આવ્યા બાદ સમગ્ર બનાવ બહાર આવ્યો હતો. આ બનાવમાં પંચમહાલ જિલ્લાના ડ્રાઈવિંગ કામ સાથે સંકળાયેલા ધીરજ ઉર્ફે ધર્મેશ નાયક સામે અપહરણ, બળાત્કાર અને પોક્સો કાયદાની વિવિધ કલમો હેઠળ ગુનો નોંધી તેની ધરપકડ કરવામાં આવી હતી.

આ કેસની કાર્યવાહી જામનગરની પોક્સો અદાલતમાં ચાલી હતી. સુનાવણી દરમિયાન ભોગ બનનારની ઉંમર કાયદેસર રીતે સાબિત થઈ શકી ન હોવાનું અદાલતના ધ્યાને આવતાં આરોપીને પોક્સો કાયદાની કલમો હેઠળ શંકાનો લાભ આપવામાં આવ્યો હતો. જોકે, બળાત્કારનો ગુનો પુરવાર થતાં અદાલતે આરોપીને ૧૦ વર્ષની સખત કેદની સજા અને રૂ.૨૫ હજારનો દંડ ફટકાર્યો હતો. સાથે જ ભોગ બનનારને સરકારી વળતર યોજના હેઠળ રૂ.૧ લાખ ચૂકવવા તા.૧૫ના રોજ હુકમ કરવામાં આવ્યો હતો. આ ચુકાદામાં અદાલતે ભોગ બનનારની ઉંમર સાબિત ન થઈ શકવાના મુદ્દે પણ ગંભીર નોંધ લીધી હતી અને આગળ વિભાગને નકલ સાથે યાદી મોકલી કાર્યવાહી માટે હુકમ કર્યો હતો.