ગુજરાતના ખેડૂતોના હિતમાં રાજ્ય સરકાર દ્વારા એક મોટો અને ઐતિહાસિક નિર્ણય લેવામાં આવ્યો છે. ખેતર ફરતે કાંટાળા તારની વાડ બનાવવા માટે અપાતી સહાયના દરમાં મોટો વધારો કરવામાં આવ્યો છે. આ સાથે જ યોજનાના નિયમો વધુ સરળ બનાવવામાં આવ્યા છે, જેથી નાના અને સીમાંત ખેડૂતો પણ પોતાના પાકની સુરક્ષા સુનિશ્ચિત કરી શકે. સરકારના આ નિર્ણયથી રાજ્યના લાખો ખેડૂતોને સીધો આર્થિક ફાયદો થશે.

સહાયના દરમાં પ્રતિ મીટર ₹૧૦૦નો વધારો
સરકારે ખેડૂતો પરનો આર્થિક બોજ ઓછો કરવા માટે સહાયની રકમ વધારી છે:

નવો દર: ખેતર ફરતે તાર ફેન્સિંગ યોજના હેઠળ મળતી સહાયનો દર અત્યાર સુધી પ્રતિ રનિંગ મીટર ₹૨૦૦ હતો, જે હવે વધારીને ₹૩૦૦ કરવામાં આવ્યો છે.

ખર્ચમાં રાહત: લોખંડ અને તારના વધતા ભાવ વચ્ચે આ વધારાથી ખેડૂતોને મોટી આર્થિક રાહત મળશે.

નિયમો સરળ: ૧ હેક્ટર જમીન ધરાવતા ખેડૂતોને પણ લાભ
આ યોજનામાં અગાઉના કડક નિયમોને હળવા કરીને સરકારે વધુ એક મોટો ફેરબદલ કર્યો છે:

નિયમમાં ફેરફાર: અગાઉ આ યોજનાનો લાભ લેવા માટે ઓછામાં ઓછું ૨ હેક્ટરનું ક્લસ્ટર (જમીનનું જૂથ) હોવું અનિવાર્ય હતું.

નાના ખેડૂતોને ફાયદો: હવે સરકારે આ મર્યાદા ઘટાડીને માત્ર ૧ હેક્ટર કરી દીધી છે. એટલે કે, હવે નાના અને મધ્યમ કક્ષાના ખેડૂતો પણ વ્યક્તિગત કે નાના જૂથમાં આ યોજનાનો લાભ સહેલાઈથી મેળવી શકશે.

ચોમાસા પહેલા ૧ લાખ અરજીઓને મંજૂરી અપાશે
સરકારે વહીવટી પ્રક્રિયાને ઝડપી બનાવવા માટે આદેશો જારી કર્યા છે:

​​​​​​​આઈ-ખેડૂત પોર્ટલ: 'આઈ-ખેડૂત' (i-Khedut) પોર્ટલ પર અત્યાર સુધીમાં તાર ફેન્સિંગ માટે મળેલી અંદાજે ૧ લાખ અરજીઓને ચોમાસું શરૂ થાય તે પૂર્વે જ મંજૂરી આપી દેવામાં આવશે, જેથી ખેડૂતો વાવણી પહેલા વાડનું કામ પૂરું કરી શકે.

₹૨૪૦ કરોડનું બજેટ: આ યોજના માટે સરકારે પ્રાથમિક તબક્કે ₹૨૪૦ કરોડ મંજૂર કર્યા છે. સરકારે ખાતરી આપી છે કે જો જરૂર પડશે તો વધારાના ભંડોળ (ફંડ) ની વ્યવસ્થા કરીને પણ તમામ પાત્ર ખેડૂતોની અરજીઓ સ્વીકારવામાં આવશે.