સુરતની એક ખાનગી હોસ્પિટલ, મિશન હોસ્પિટલમાં આજે અચાનક આગ લાગતા ભારે દોડધામ મચી ગઈ હતી. ઘટનાની જાણ થતાં જ તાત્કાલિક ફાયર બ્રિગેડની 10 ગાડીઓ ઘટનાસ્થળે પહોંચી ગઈ હતી અને બચાવ કાર્ય શરૂ કરી દીધું હતું. પ્રાથમિક માહિતી અનુસાર, હોસ્પિટલમાં દાખલ 20 જેટલા દર્દીઓને તાત્કાલિક સ્ટ્રેચર પર રાખીને સુરક્ષિત રીતે બહાર કાઢવામાં આવ્યા છે.

​​​​​​​જો કે, એવી આશંકા સેવાઈ રહી છે કે હોસ્પિટલના કેટલાક ભાગોમાં હજુ પણ દર્દીઓ ફસાયેલા હોઈ શકે છે, જેના કારણે ફાયર બ્રિગેડની ટીમ દ્વારા સઘન બચાવ કામગીરી ચલાવવામાં આવી રહી છે. આગ લાગવાનું કારણ હજુ સુધી જાણી શકાયું નથી, પરંતુ શોર્ટ સર્કિટ અથવા અન્ય કોઈ ટેકનિકલ ખામીને કારણે આગ લાગી હોવાનું અનુમાન લગાવવામાં આવી રહ્યું છે.

હોસ્પિટલમાં આગ લાગવાના કારણે દર્દીઓ અને તેમના પરિવારજનોમાં ભારે ગભરાટનો માહોલ જોવા મળ્યો હતો. ફાયર બ્રિગેડના જવાનો જીવના જોખમે હોસ્પિટલની અંદર ફસાયેલા લોકોને બહાર કાઢવાના પ્રયાસો કરી રહ્યા છે. તંત્ર દ્વારા પણ ઘટના પર નજર રાખવામાં આવી રહી છે અને જરૂરી તમામ મદદ પૂરી પાડવામાં આવી રહી છે. વધુ વિગતો માટે રાહ જોવાઈ રહી છે.