જામનગર શહેરમાં પોલીસે જુગાર અંગે સુભાષ પરા તેમજ ગોકુલ નગર વિસ્તારમાં જુગારના બે દરોડા પાડ્યા છે, અને પાંચ આરોપીઓની અટકાયત કરી લઈ જુગારનું સાહિત્ય કબજે કર્યું છે.

જુગારનો સૌપ્રથમ દરોડો જામનગરમાં ગોકુલનગર નજીક પાણાંખાણ વિસ્તારમાં પાડવામાં આવ્યો હતો. ત્યાંથી જાહેરમાં ગંજી પાના વડે હારજીતનો જુગાર રમી રહેલા મનસુખ મોહનભાઈ નંદા, જીતેન્દ્ર લક્ષ્મીદાસ કનખરા, અને સંજય મગનભાઈ જૈન વાણીયાની પોલીસે અટકાયત કરી લીધી છે, અને તેઓ પાસેથી રૂપિયા ૫,૮૦૦ ની રોકડ રકમ અને જુગારનું સાહિત્ય કબજે કર્યું છે.

આ ઉપરાંત જુગાર અંગેનો બીજો દરોડો જામનગરમાં સુભાષ પરા વિસ્તારમાં પાડવામાં આવ્યો હતો. ત્યાંથી જાહેરમાં વરલી મટકા ના આંકડા લખી રહેલા સંજય ઉર્ફે ચંકી પાંડે તેમજ વિનોદ ભૂરાભાઈ નામના બે શખ્સોને ઝડપી લીધા છે, અને તેઓ પાસેથી રોકડ રકમ, મોબાઈલ ફોન, અને બાઇક સહિત રૂપિયા ૨૨,૭૯૦ ની માલમતા કબજે કરી છે.

જે બંને શખ્સો શંકરટેકરી સુભાષ પરામાં રહેતા પરેશ રાઠોડ પાસે વરલીના આંકડાની કપાત કરતા હોવાથી તેને ફરારી જાહેર કરાયો છે.