હવામાન વિભાગ દ્વારા આજે સૌરાષ્ટ્રના કેટલાક વિસ્તારમાં ભારે વરસાદની આગાહી કરવામાં આવી હતી. આજે જૂનાગઢ, ગીર સોમનાથ અને દીવમાં રેડ એલર્ટ આપવામાં આવ્યું છે. જ્યારે રાજકોટમાં ભારે વરસાદની આગાહી કરવામાં આવી છે. 

આજે આ જિલ્લાઓમાં ભારે વરસાદની આગાહી

આજે સૌરાષ્ટ્રના જૂનાગઢ, ગીર સોમનાથ અને દીવમાં છૂટાછવાયા સ્થળોએ ભારેથી અતિ ભારે વરસાદ પડવાની શક્યતાને લઈને રેડ એલર્ટ આપવામાં આવ્યું છે. આ ઉપરાંત ગુજરાત રાજ્યના જિલ્લાઓ જેમાં ભરૂચ, સુરત, નવસારી, વલસાડ અને દમણ, દાદરા નગર હવેલી, રાજકોટ, પોરબંદર, અમરેલી અને ભાવનગરમાં ભારે વરસાદ પડવાની શક્યતાને લઈને ઓરેન્જ એલર્ટ આપવામાં આવ્યું છે. જ્યારેઆણંદ, વડોદરા, છોટા ઉદેપુર, નર્મદા, ડાંગ, તાપી, દ્વારકા અને જામનગરમાં મધ્યમ વરસાદ પડવાની શક્યતાને લઈને યેલો એલર્ટ આપવામાં આવ્યું છે. જ્યારે 20 જૂન સુધી દક્ષિણ ગુજરાત અને સૌરાષ્ટ્રમાં અતિભારે વરસાદની આગાહી કરવામાં આવી છે, જ્યારે મધ્ય અને ઉત્તર ગુજરાતમાં હળવાથી ભારે વરસાદની આગાહી કરવામાં આવી છે.