વડોદરા મહાનગરપાલિકામાં ભ્રષ્ટાચારનો વધુ એક કિસ્સો સામે આવ્યો છે. મહાનગરપાલિકાના નાયબ કાર્યપાલક ઇજનેર કૌશિક પરમાર સામે એક કોન્ટ્રાક્ટર પાસેથી ₹3 લાખની લાંચ માંગવા બદલ ગુનો નોંધવામાં આવ્યો છે. આ મામલે એન્ટી કરપ્શન બ્યુરો (ACB) દ્વારા તપાસ હાથ ધરવામાં આવી છે.

પ્રાપ્ત માહિતી અનુસાર આ લાંચ આજવા રોડ બેલેન્સિંગ રીજવાયરના ઓપરેશન અને મેન્ટેનન્સના ટેન્ડર સંદર્ભે માંગવામાં આવી હતી. ઇજનેર કૌશિક પરમારે કોન્ટ્રાક્ટર પાસેથી ટેન્ડરના પાંચ ટકા લેખે ₹3 લાખની ગેરકાયદેસર માંગણી કરી હતી.

​​​​​​​કોન્ટ્રાક્ટરે ઇજનેર સાથે થયેલી ટેલિફોનિક વાતચીતનું રેકોર્ડિંગ કર્યું હતું. આ રેકોર્ડિંગને વૈજ્ઞાનિક ઢબે તપાસીને ટેમ્પરિંગ સર્ટિફિકેટ મેળવવામાં આવ્યું હતું, જેના આધારે ACBએ કૌશિક પરમાર સામે ગુનો નોંધ્યો છે.

ACB દ્વારા હવે ઇજનેર કૌશિક પરમારની મિલકત અંગે પણ તપાસ હાથ ધરવામાં આવી છે. આ ઘટનાથી વડોદરા મહાનગરપાલિકામાં ખળભળાટ મચી ગયો છે અને ભ્રષ્ટાચાર સામે કડક કાર્યવાહીનો સંકેત મળ્યો છે.