જામનગરની વસ્તીના ૨૫ ટકા લોકોના ફોર્મમાં હજુ મતદાર યાદીમાંથી રદ થાય તેવી શકયતા છે, નો મેપીંગમાં આધાર-પુરાવા મળી જશે તો તેમના નામો યાદીમાં સમાવવામાં આવશે. જાણવા મળતી માહિતી મુજબ ૨૦૦૪ પછીના મતદારોના માતા-પિતાના આધાર-પુરાવા રજૂ થયા નથી, જેથી આ તમામને ચૂંટણી પંચ દ્વારા નોટીસ પાઠવવામાં આવશે, એક મહીના દરમ્યાન બીએલઓ દ્વારા મતદારોને પ્રથમ એન્યુમરેશન ફોર્મ અપાયા બાદ બીએલઓ દ્વારા ત્રણ વખત મતદારના ઘરની મુલાકાત લેવામાં આવી છે.


જેમાં ૨૦૦૨ની મતદાર યાદી સાથે મતદારોનું મેપીંગ કરવામાં આવ્યું હતું અને કટઓફ ડેટ તા.૪ ડીસેમ્બર રાખવામાં આવી હતી, હવે તા.૧૪ ડીસેમ્બર સુધી આ ફોર્મ સ્વીકારવામાં આવશે, ત્યારબાદ મતદારોની સુધારણા યાદી બહાર પાડવામાં આવશે. જામનગર ઉત્તરમાં ૨૨ ટકા અને દક્ષિણમાં ૧૭ ટકા મતદારોનું મેપીંગ બાકી હોવાનું ખુલ્યું છે. 


મતદારી યાદીમાંથી ગાયબ એટલે શું...?

જામનગર જિલ્લાની મતદાર યાદી માટે તા.૧૪ ડીસેમ્બર સુધી એસઆઇઆરના ફોર્મ ભરવાના રહેશે ત્યારે કેટલાક નામો મતદાર યાદીમાંથી ગાયબ છે, જેમાં મૃત પામેલા મતદારો, સ્થળાંતર કરેલા મતદારો અને ૨૦૦૪ પછી જન્મેલા લોકોના માતા-પિતાના યોગ્ય આધારો આપી શક્યા નથી, જેમના નામ મતદાર યાદીમાંથી હાલ ગાયબ કરવામાં આવ્યાં છે, તા. ૧૯ના રોજ મતદાર સુધારણા યાદી પાર પડશે તેમાં જે કોઇનું નામ નથી તે અંગે પણ નાયબ ચુંટણી અધિકારીએ જણાવ્યું હતું કે યોગ્ય પુરાવા આપનારના નામ યાદીમાં સમાવેશ કરી દેવામાં આવશે, હાલ જેઓએ પુરાવા આપ્યા નથી તેવા ૧૭૪૨૯૩ મતદારો હાલ તો મતદાર યાદીમાંથી ગાયબ છે, ઉપરાંત ૪૨૯૬૭ મતદારો મૃત્યુ પામ્યા છે, ૩૭૩૮૧ને ગેરહાજર દર્શાવ્યા છે અને ૮૪૮૪૫ લોકોને સ્થળાંતર દર્શાવવામાં આવ્યા છે, એટલે આ બધા મતદાર યાદીમાંથી નામ ગાયબ થઇ ગયા છે.​​​​​​​



નો-મેપીંગ એટલે શું...?, સમજો...

જામનગર શહેર-જિલ્લામાં મતદાર યાદીનું કામ ૧૦૦ ટકા પૂર્ણ કરી લેવામાં આવ્યું છે, ત્યારે નો-મેપીંગ એટલે શું તે અંગે લોકોની પૂછપરછ થઇ રહી છે, નાયબ ચૂંટણી અધિકારી દીપાબેન કોટકના જણાવ્યા મુજબ ૨૦૦૪ પછીના મતદારો હોય અને તેના માતા-પિતાના કોઇ આધાર રજૂ કરવામાં આવ્યા નથી તેથી તેના નામ હાલ મતદાર યાદીમાં નથી, તા.૧૪ ડીસેમ્બર સુધી હજુ પણ ફોર્મ સ્વીકારવામાં આવશે, જેમના નામો ગુમ થયા છે એટલે કે આધાર-પુરાવા રજૂ થયા નથી તે તમામ મતદારોને ઝડપથી પુરાવા આપવા માટે નોટીસ ફટકારવામાં આવશે. ૧૪ સુધીના જેમના ફોર્મ આવ્યા છે તેઓના નામ યાદીમાં આવી જશે. આમ જોઇએ તો જામનગર જિલ્લામાં ૪૨૯૬૭ લોકોને મૃત જાહેર કરાયા છે, યાદીમાં ૩૭૩૮૧ ગેરહાજર દર્શાવાયા છે અને ૮૯૮૪૫ લોકોનું સ્થળાંતર થયું હોવાનું તંત્ર દ્વારા જાહેર કરાયું છે. 


મતદારોએ પણ નામની ચકાસણી કરવા અપીલ

ગુજરાતમાં લગભગ સવા કરોડ મતદાર શંકાના દાયરામાં છે, ૫૩ લાખ મતદારોનું મેપીંગ થયું નથી અને જામનગરમાં પણ ૧.૭૪ લાખ મતદારો નો-મેપીંગમાં આવ્યા છે ત્યારે મેપીંગ માટે લોકોએ પુરાવા આપવાના રહે છે તેમાં તંત્ર દ્વારા જણાવાયું છે કે, મેપીંગ નહીં થનારને નોટીસ ફટકારાશે, પાસપોર્ટ, જાતિ પ્રમાણપત્ર, જન્મ પ્રમાણપત્ર, વન અધિકાર પત્ર સહિત ૧૩ પુરાવામાંથી એક પુરાવો ફરજીયાત છે, પુરાવો ન મળે તો નામ કાપવાની કાર્યવાહી થશે. મૃત્યુના કેસમાં ડેથ સર્ટીફીકેટ આપવાનું રહેશે. સ્થળાંતરીત, પતો ન મળનાર અને મૃત્યુનું પ્રમાણપત્ર ન આપનાર માટે પંચનામુ ફરજીયાત બનાવાયું છે. મતદાર સુધારણા યાદી બહાર પડે ત્યારે ચૂંટણી પંચની વેબસાઇટ ઉપરથી તમારૂ નામ છે કે નહીં તે પણ ચકાસણી કરવાની રહેશે, તા.૧૯ના રોજ અપડેટ થયેલી મતદાર ડ્રાફટ યાદી પંચ દ્વારા બહાર પાડવામાં આવશે. ​​​​​​​