ગુજરાતભરમાં મેઘરાજા ચોમાસાના બીજા રાઉન્ડમાં રૌદ્ર સ્વરૂપ ધારણ કરી રહ્યા છે. હવામાન વિભાગ દ્વારા આગામી ૫ દિવસ માટે રાજ્યમાં અતિ ભારે વરસાદની ચેતવણી જારી કરવામાં આવી છે. આ સમયગાળા દરમિયાન દરિયાકાંઠાના અને મેદાની વિસ્તારોમાં ૪૫ થી ૬૫ કિલોમીટર પ્રતિ કલાકની ઝડપે તોફાની પવન ફૂંકાવાની શક્યતા વ્યક્ત કરવામાં આવી છે. ૨૩ અને ૨૪ જુલાઈ દરમિયાન રાજ્યના મોટાભાગના વિસ્તારોમાં મેઘતાંડવ થવાની પૂરતી સંભાવના છે.

૧૧ જિલ્લામાં અત્યંત ભારે વરસાદનું રેડ એલર્ટ

હવામાન વિભાગની તાજેતરની આગાહી મુજબ, આજે રાજ્યના ૧૧ જેટલા જિલ્લાઓમાં આકાશી આફત જેવા અત્યંત ભારે વરસાદની ગંભીર સ્થિતિને ધ્યાનમાં રાખીને 'રેડ એલર્ટ' જાહેર કરવામાં આવ્યું છે. જ્યારે અમદાવાદ અને ગાંધીનગર સહિત આઠ જિલ્લાઓમાં ભારેથી અતિભારે વરસાદની શક્યતા હોવાથી 'ઓરેન્જ એલર્ટ' આપવામાં આવ્યું છે. આ ઉપરાંત ગીર સોમનાથ સહિતના અન્ય સાત જિલ્લાઓમાં મધ્યમથી ભારે વરસાદની શક્યતા સાથે 'યલો એલર્ટ' જારી કરાયું છે. ગાજવીજ અને વાવાઝોડા જેવા તોફાની પવન સાથે વરસાદ પડવાની સંભાવનાને પગલે દરિયાકાંઠાના વિસ્તારો અને નીચાણવાળા વિસ્તારોને સતર્ક કરી દેવામાં આવ્યા છે.

5 જિલ્લામાં તમામ શાળાઓ-કોલેજોમાં રજા જાહેર

રાજ્યમાં વધી રહેલા વરસાદી જોખમ અને વિદ્યાર્થીઓની સુરક્ષાને સર્વોચ્ચ પ્રાથમિકતા આપતાં વહીવટી તંત્ર દ્વારા મોટો નિર્ણય લેવામાં આવ્યો છે. અતિભારે વરસાદની આગાહી વચ્ચે વિદ્યાર્થીઓની સલામતી માટે અમદાવાદ, ગાંધીનગર, સુરત, વલસાડ અને નવસારી - આ પાંચ જિલ્લાઓમાં આવતીકાલે એટલે કે ૨૪ જુલાઈના રોજ તમામ શૈક્ષણિક સંસ્થાઓમાં રજા જાહેર કરી દેવાઈ છે.

આ નિર્ણય મુજબ તમામ સરકારી, ગ્રાન્ટેડ તેમજ ખાનગી આંગણવાડીઓ, પ્રાથમિક અને માધ્યમિક શાળાઓ, કોલેજો તથા ટ્યુશન ક્લાસીસ સહિતની શૈક્ષણિક સંસ્થાઓમાં શૈક્ષણિક કાર્ય સંપૂર્ણપણે બંધ રહેશે.​​​​​​​

તંત્રની વાલીઓ અને નાગરિકોને ખાસ અપીલ

હવામાન વિભાગ દ્વારા વીજળીના કડાકા-ભડાકા અને તીવ્ર પવન સાથે તોફાની વરસાદની આગાહી કરવામાં આવી હોવાથી વહીવટી તંત્ર પૂરેપૂરું એલર્ટ મોડ પર આવી ગયું છે. વાલીઓ, વિદ્યાર્થીઓ અને તમામ નાગરિકોને બિનજરૂરી કામ વગર ઘરની બહાર ન નીકળવા અપીલ કરવામાં આવી છે. આ ઉપરાંત વરસાદી પાણી ભરાયા હોય તેવા રસ્તાઓ કે બ્રિજ પરથી પસાર ન થવા અને સ્થાનિક જિલ્લા તંત્ર દ્વારા આપવામાં આવતી સુરક્ષા સૂચનાઓનું ચુસ્તપણે પાલન કરવા અનુરોધ કરાયો છે.