ભારત અને દક્ષિણ આફ્રિકા વચ્ચે 30 નવેમ્બર, રવિવારના રોજ ODI શ્રેણીની પહેલી મેચ રમાઈ હતી. આ મેચમાં ભારતીય ટીમના અનુભવી બેટ્સમેન રોહિત શર્મા અને વિરાટ કોહલીએ શાનદાર બેટિંગ કરી. કોહલી અને રોહિતે બીજી વિકેટ માટે શાનદાર સદીની ભાગીદારી કરી. આ 20મી વખત બન્યું જ્યારે આ જોડીએ ODIમાં સદીની ભાગીદારી કરી છે.

આ મેચમાં રોહિત શર્માએ એક મોટો રેકોર્ડ બનાવ્યો. તે હવે ODIમાં સૌથી વધુ છગ્ગા મારનાર બેટ્સમેન બની ગયો છે. આ મેચ પહેલા, રોહિતને પાકિસ્તાનના ભૂતપૂર્વ કેપ્ટન શાહિદ આફ્રિદીનો રેકોર્ડ તોડવા માટે ત્રણ છગ્ગાની જરૂર હતી. તેણે ભારતીય ઇનિંગ્સની 20મી ઓવરમાં માર્કો જેનસેનની બોલ પર છગ્ગા ફટકારીને આફ્રિદીને પાછળ છોડી દીધો. આફ્રિદીએ 398 ODIમાં 351 છગ્ગા ફટકાર્યા હતા, જે રેકોર્ડ રોહિતે હવે તોડી નાખ્યો છે. રોહિતે હવે 277 ODIમાં 352 છગ્ગા ફટકાર્યા છે.

ODIમાં સૌથી વધુ છગ્ગા

૩૫૨* - રોહિત શર્મા (ભારત)

૩૫૧ - શાહિદ આફ્રિદી (એશિયા/પાકિસ્તાન/ICC)

૩૩૧ - ક્રિસ ગેલ (વેસ્ટ ઈન્ડિઝ/ICC)

૨૭૦ - સનથ જયસૂર્યા (એશિયા/શ્રીલંકા)

૨૨૯ - એમએસ ધોની (એશિયા/ભારત)

રોહિત શર્માએ આ મેચમાં ૫૧ બોલમાં ૫૭ રન બનાવ્યા, જેમાં પાંચ ચોગ્ગા અને ત્રણ છગ્ગાનો સમાવેશ થાય છે. રોહિત અને વિરાટ કોહલીએ બીજી વિકેટ માટે ૧૩૬ રનની ભાગીદારી કરી. રોહિતને માર્કો જેન્સેન દ્વારા LBW આઉટ કરવામાં આવ્યો. આ રોહિતનો ૫૦ થી વધુનો સતત ત્રીજો ODI સ્કોર છે.

૩૮ વર્ષીય રોહિત શર્મા આંતરરાષ્ટ્રીય ક્રિકેટમાં વધુ એક ઐતિહાસિક સિદ્ધિ હાંસલ કરવાની ખૂબ નજીક છે. આ 'હિટમેન' ૬૫૦ આંતરરાષ્ટ્રીય છગ્ગા ફટકારનાર વિશ્વનો પ્રથમ બેટ્સમેન બની શકે છે. હાલમાં તેના નામે ૬૪૫ છગ્ગા છે, એટલે કે તેને આ સિદ્ધિ હાંસલ કરવા માટે ફક્ત પાંચ છગ્ગાની જરૂર છે. નોંધનીય છે કે, વિશ્વનો બીજો કોઈ બેટ્સમેન હજુ સુધી ૬૦૦ છગ્ગાનો આંકડો પાર કરી શક્યો નથી. દિગ્ગજ ક્રિસ ગેલ (૫૫૩ છગ્ગા) પણ રોહિતથી ઘણો પાછળ છે.

મેચ માટે દક્ષિણ આફ્રિકાની પ્લેઇંગ ઇલેવન: રાયન રિકેલ્ટન, ક્વિન્ટન ડી કોક (વિકેટકીપર), એડન માર્કરામ (કેપ્ટન), મેથ્યુ બ્રીટ્ઝકે, ટોની ડી જોર્ઝી, ડેવાલ્ડ બ્રુઇસ, માર્કો જેન્સન, કોર્બિન બોશ, પ્રેનેલન સુબ્રાયન, નાન્ડ્રે બર્ગર અને ઓટનિલ બાર્ટમેન.

મેચ માટે ભારતના પ્લેઈંગ 11: રોહિત શર્મા, યશસ્વી જયસ્વાલ, વિરાટ કોહલી, રુતુરાજ ગાયકવાડ, વોશિંગ્ટન સુંદર, કેએલ રાહુલ (વિકેટકીપર/કેપ્ટન), રવિન્દ્ર જાડેજા, હર્ષિત રાણા, કુલદીપ યાદવ, અર્શદીપ સિંહ અને પ્રસિદ્ધ કૃષ્ણ.