હું ધારગણીનો ઘૂઘા વાળા બોલું છું, અમારા વિસ્તારમાં કેરીનો બગીચો રાખવો હોય તો મને એક લાખ આપવા પડશે તેમ ઉનાના માણેકપુર ગામના આધેડને ફોન કરી ધમકી આપતા શખસ સામે ચલાલા પોલીસમાં ફરિયાદ નોંધાવાઈ છે.

ઉનાના માણેકપૂર ગામે રહેતા કાનાભાઇ નાનજીભાઈ શિયાળ (ઉ.વ.44) નામના આધેડ હાલ કેરીની સીઝન હોવાથી કેરીના બગીચાઓના હીજારા ભાગમાં રાખે છે. આધેડએ આ વર્ષે ધારીના ધારગણી ગામની સીમમાં આવેલા દિનેશભાઇ ગજેરાની માલિકીનો કેરીનો બગીચો ચંદાભાઈ સોલંકી પાસેથી હિજારામાં રાખ્યો છે અને પરિવાર સાથે ત્યાંજ રહે છે. દરમિયાન આધેડને મોબાઈલમાં ફોન આવ્યો હતો અને હું ધારગણીથી ઘૂઘાભાઈ રામકુભાઇ વાળા બોલું છું, તે અહીંયા બગીચો મારા ગામમાં કોને પૂછીને રાખ્યો છે? તારે અમારા વિસ્તારમાં બગીચો રાખવો હોય તો મને એક લાખ રૂપિયા આપવા પડશે નહિતર બગીચો મૂકીને જતો રહેજે તેમ ધમકીઓ અને ગાળો આપી હતી. 

આધેડએ કોઈ જવાબ ન આપતા વારંવાર ફોન કરી ગાળાગાળી કરી ધમકીઓ આપતો હતો. એમ છતાં આધેડ પોતાનું કામ કરતા હતા. ફરી તા.29ના ઘુઘા વાળાએ આધેડને ફોન કરી કહ્યું હતું કે, તને શેનો પાવર છે ?અમારા ગામના દરબારો તને સપોર્ટ કરે છે એટલે હું કહું છું એમ નથી કરતો ને ? હવે તું જોઈ લેજે, તું મને ઓળખતો નથી તને અને તારા દીકરાને મારી નાખું આમ ધાક ધમકી આપતા અંતે કંટાળી આધેડએ ચલાલા પોલીસ મથકમાં ફરિયાદ નોંધાવતા પોલીસે ઘૂઘા વાળા સામે ગુનો નોંધી આગળની કાર્યવાહી હાથ ધરી છે.